JOHANNES 17:12 - BIBEL JAMITA NA DENGGAN

¹² Salolot rap Au dohot halahi di portibi on, madung Hujagohon halahi markite-hite kuaso ni Damang i – i ma kuaso na nilehen ni Damang i tu Au. Madung Huondingi halahi na nipasahat ni Damang tu Au, jana umpe sada sian halahi na mago, asing ni anak mago i; anso laing tulus ma na tarsurat di Buku Na Badia i.

JOHANNES 17:12 ပူးပေါင်းရင်းမြစ်များ

MASMUR 41:9

Salang ale-aleniba na umdonok pe antong, halak na mangan rap dohot iba, madung mangalo tu iba.

JOHANNES 13:18

“Nada tu hamu sudena na Hudokkon on. Huboto do sanga ise na dung Hupili. Tapi angkon laing tarjadi do sanga aha na tarsurat di Buku Na Badia i; songon on do tarsurat disi, ‘Sanga ise na mangan rap dohot Au, i ma ibana na giot mangalo Au.’

JOHANNES 17:6

Madung Hupatorang Ho Amang tu angka jolma na sian portibi on, i ma na dung nipasahatMu tu Au. Ho do Amang nampuna halahi; jana madung dipasahat Ho halahi tu Au. Madung diihutkon halahi hata na nilehenMi.

JOHANNES 18:9

Di na nidokNia songon i, tulus ma tarjadi na nidokNia hian; songon on, “Ale Amang, sian sude na nipasahat ni Damang i tu Au, umpe sahalak na gabe mago.”)

JOHANNES 6:37

Sudena halak na dung dipasahat Damang tu Au, ro ma halahi tu Au. Nada tulahonKu, sanga ise pe na ro tu Au.

PILIPPI 2:9

Hara ni i ma umbaen na nipatuginjang ni Debata Ia sagincat-gincatna, jana dilehen tuSia goar na gumodang sian sandok goar na asing.

2 TESSALONIKA 2:3

Sanga na bia pe i, ulang jabat tartipu hamu dibaen halak. Angke painte so dapot Ari i, angkon jolo masa do na songon on: Bahat ma halak marbalik sian Kristus, jana tangkas ma tarida Jolma Na Jahat na dung ditontuhon hian tu api narako.

IBRANI 2:13

Didok Jesus dope, “Tu Debata noma Au mararop ni roha.” Jana didok Jesus muse dope, “Dison do Au rap dohot angka dakdanak na nilehen ni Debata di Au.”

1 JOHANNES 2:19

Angka halak na dung manadingkon hita do anggo angka musu ni Kristus i, tapi nada halak na masuk tu hita hian halahi. Sugari halak na masuk tu hita hian halahi, tontu angkon tongtong do halahi rap dohot hita. Tapi morot do halahi sian hita anso torang tarida na so masuk tu hita hian sahalak pe sian halahi.

HALUMBAAN 19:12

Songon jilam ni api do mataNa jana bahat do tuku dipake Ia di uluNia i. Adong do sada goar na niuhir di diriNia; jana hum Ia sajo do na umboto astuan ni goar i.