JOHANNES 15:24 - BIBEL JAMITA NA DENGGAN

²⁴ Madung Hubaen di tonga-tonga ni halahi angka pangalaho na so jungada dibaen halak na asing sanga ise pe. Sugari na so Hubaen angka na songon i di tonga-tonga ni halahi, ias do halahi sian hasalaan. Saonnari haru pe madung diida halahi angka pangalaho i, hape laing hosom dope roha ni halahi tu Au dohot tu Damang.

JOHANNES 15:24 ပူးပေါင်းရင်းမြစ်များ

MASMUR 81:15

TaluhononKu ma sanga ise na magigi mida Au, salolotna noma halahi hona uhumKu.

HARURUAR 20:5

Ulang unduk marsomba tusia sanga maribadat tusia, angke Au, Tuhan, Debatamu, i ma Debata na so ra padiarkon adong imbangKu. UhumanKu do sanga ise na margoyak ni roha di Au lopus tu sundut patoluhon dohot paopatkon.

PODA 8:36

Sanga ise na so mandapot au, mangarugii dirina sandiri, halak na manghasogohon au, hamatean do dihaholongi.”

MATEUS 11:5

Marnida na mapitung, mardalan na onyangon, malum na huliton, marbinege na maingol, mulak mangolu na mate, dung i dipaboa do Jamita Na Denggan sian Debata tu halak na pogos.

MATEUS 21:32

Haru madung ro si Johannes Pandidi paboahon dalan na tutu tu hamu, hape nada ra hamu manghaporsayai na nidoknia. Hape anggo angka sijagit pajak dohot angka anak boru siparkarosuan, ma pola porsaya disia. Haru pe na dung diida hamu sudena i, hape laing so dipauba hamu dope rohamunu manghaporsayai ia.”

MATEUS 9:33

Hum dipaorot Jesus setan i manigor tarbaen ia ma mangkobari mangulahi. Homang ma roha ni halak na disi i. Angke didok halahi ma, “Na so unjung dope hami ida na songon on di Israel on!”

MARKUS 2:12

Di jolo ni halak na bahat i, jongjong ma manigor halak na onyangon i, dioban ia lagenia i kehe ma ia mardalan. Homang-homang ma sude halak na disi i, dipuji halahi ma Debata. Didok halahi ma, “Inda unjung dope hami ida tarjadi na songon on!”

LUKAS 24:19

“Aha na masa?” ninna Jesus. “I ma na masa tu Jesus halak Nasaret i,” ning halahi mangalusi. “I ma sada panurirang na markuaso situtu hataNa, dohot pambaenanNa pe margogo situtu – di jolo ni Debata dohot di jolo ni jolma pe.

JOHANNES 10:32

Tapi didok Jesus ma tu halahi, “Madung diida hamu Au mambaen angka karejo na denggan, na nisuruhon ni Damang karejohononKu; sian sude parkarejoan i, hara ni karejo na dia ma umbaen giot dangguranmunu Au?”

JOHANNES 10:37

Sugari na so Hukarejohon karejo ni Damang, padiar ma indangkon sai porsaya hamu tu Au.

JOHANNES 12:10

Hara ni i ma dibaen na giot dohot si Lasarus bunuon ni angka sintua ni malim i;

JOHANNES 12:45

Jana sanga ise na marnida Au, diida Ia muse do na marsuru Au.

JOHANNES 14:9

Tapi dialusi Jesus ma, “Sai honok ma Au dung rap dohot hamu sudena, hape laing na so ditanda ho dope Au Pilipus? Sanga ise na marnida Au, madung diida Ia muse Ama i. Biasi dope didokkon ho, ‘Patuduhon ma tu hami Ama i’?

JOHANNES 15:21

Baenon ni halahi ma sudena i tu hamu, hara ni na siseanKu hamu harana nada ditanda halahi sanga ise na marsuru Au.

JOHANNES 15:22

Sugari sura na so jungada Au ro jana nada unjung Huhatahon sudena i tu halahi, nada tarsalahon halahi. Tapi anggo saonnari nada adong be sidalian ni halahi taringot tu dosa ni halahi.

JOHANNES 15:23

Sanga ise na mangkosomi Au, dihosomi ia muse do Damang.

JOHANNES 16:9

PabotohononNia ma bahaso dosa do muda laing so porsaya halahi tu Au,

JOHANNES 3:2

Di sada borngin ro ma ia mandapotkon Jesus jana didok ia ma, “Gurunami, hami boto do Guru na nisuruhon ni Debata ho. Angke nada adong halak na bisa mambaen angka hahomangan songon na nibaenMi, anggo so didongani Debata do ia.”

JOHANNES 5:36

Tapi adong dope di Au hatorangan na ummarga sian na nilehen ni si Johannes. Karejo na nidok ni Damang karejohononKu, i ma karejo na Hubaen saonnari, sudena i patorangkon bahaso Ama i do na marsuru Au.

JOHANNES 6:36

Tapi madung Hudok tu hamu, ‘Bope madung diida hamu Au, tapi nada porsaya hamu.’

JOHANNES 7:31

Tamba ni i, bahat muse do sian angka jolma na bahat i na porsaya tuSia, didok halahi ma, “Muda ro Kristus i tarbaen Ia dope ulaning hahomangan umbahat sian na dung binaenNia on?”

JOHANNES 9:32

Sian parmulaan ni tano on nada unjung dope tarbege adong halak tarbaensa jolma na sorang mapitung gabe marnida.

JOHANNES 9:41

Dialusi Jesus ma, “Anggo sugari mapitung hamu, so na mardosa hamu. Tapi hara ni na nidokmunu i, ‘Marnida do hami,’ i ma patandahon laing na mardosa hamu.”

BAENON NI ANGKA RASUL 10:38

Diboto hamu do, na dung dipili Debata do Jesus halak Nasaret i, jana dilehen tuSia Tondi Parbadia dohot kuaso. Laing diboto hamu do, na dung mardalani Jesus i tudia-tudia mambaen na denggan; dipamalum Ia sudena halak na nitaluhon ni Sibolis, angke didongani Debata do Ia.

BAENON NI ANGKA RASUL 2:22

“Hamu angka halak Israel, tangihon hamu ma hata on: Na humaksud i ma Jesus na sian Nasaret, na dung ditontuhon ni Debata markite-hite hagogoan dohot hahomangan dohot tanda na binaen ni Debata markite-hite Ia di tonga-tongamunu, songon na dung tangkas diboto hamu.

SURAT NI SI PAULUS TU PARLAGUTAN ROM 1:30

manilakoi halak na asing; angka na mangapasi Debata, mangasahon hagogoanna sajo, jungkat ni roha, mamuji dirina, angka na mangajarkon hajahatan, na so mangoloi natorasna;

PANGARATAION 5:9

Ulang unduk marsomba tu angka i sanga marsomba tu sudena i, angke Au, Tuhan Debatamu, i ma Debata na so ra padiarkon adong imbangKu, na mambaloskon hasalahan ni ama-ama tu dakdanakna, lopus tu sundut patoluhon dohot paopatkon sian halak na margoyak ni roha tu Au.

2 TIMOTEUS 3:4

Hum na giot manghianat noma jolma i, nada ginjang marpikir jana bulbul. Gumonan do di halahi hasonangan ni portibi on ulang pado mangihutkon Debata.

JAKOBUS 4:4

Angka jolma na so tigor do hamu! Diboto hamu dehe, muda mardongan hamu dohot portibi on na gabe musu ni Debata do hamu?