JOHANNES 14:27 - BIBEL JAMITA NA DENGGAN

²⁷ Hasonangan do Hutadingkon di hamu. Hasonangan na sian Au sandiri do na Hulehen tu hamu. Nada songon pangalehen ni portibi on anggo pangalehenKu hasonangan i tu hamu. Ulang pola susa rohamunu; ulang hamu mabiar.

JOHANNES 14:27 ပူးပေါင်းရင်းမြစ်များ

2 JUJUR TAON 20:30

I do dalanna umbaen na sonang si Josafat mamarenta jana dilehen Tuhan tusia antong dame di sude luatnia.

JOB 34:29

Muda diputuskon roha ni Debata manghohom Ia, nada adong sahalak pe manggagaisa. Muda ditabunihon Ia bohiNia, nada adong be sanga ise na marsuohonsa.

MASMUR 11:1

Tu Tuhan i do au maronding-onding; nada parguna adong mandok tu au, “Palua ma dirimu songon unggas na habang tu dolok adu.”

MASMUR 112:7

Nada mabiar ia manjagit barita na jat, porsaya do ia tu Tuhan jana togu rohana.

MASMUR 27:1

Tuhan do hatiuran ni ngolungku dohot sipalua au, nada adong habiaranku. Tuhan do benteng parondinganku, nada pola humitir au.

MASMUR 28:3

Ulang uhumi au rap dohot halak na durako, rap dohot halak sibaen hajahatan na so labo. Tabo-tabo do begeon hatana manarik tu roha, hape gok hagigian do anggo di ate-atena.

MASMUR 29:11

Sai dipargogoi Tuhan ma bangsoNia, jana mangalehen hasonangan di halahi.

MASMUR 56:11

Mararop roha tu Debata do au, nada mabiar au, nada tarkahua jolma au.

MASMUR 56:3

Muda mabiar au, mararop roha tu Ho do au.

MASMUR 72:2

Anso nian diadili bangsoMi mangihutkon aturan, jana dibaen ia na tigor tu halak na nisosakan.

MASMUR 72:7

Salolot di ngoluna, sai mur tu jegesna ma manjarar hatigoran, jana donaon na marlobian saleleng adong dope bulan!

MASMUR 85:10

Marsuo ma da holong dohot habonaran dame dohot hatigoran marsihaolan.

MASMUR 91:5

Ulang pola mabiar ho baenon ni parmaraan borngin, sanga baenon ni na manyonggot di arian.

PODA 3:25

Nada porlu ho mabiar salaho tu parmaraan na ompot ro songon halingsungsung jana na mangalingkup angka halak na jahat.

JESAYA 12:2

Debata do da haluaanku, porsaya tuSia do au. Nada adong na mambaen au mabiar, angke Tuhan Debata do hagogoanku dohot ende-endengku, Debata do na paluahon au, Ia do haluaanku.

JESAYA 41:10

Ulang ho mabiar Au do rap dohot ho, Au do Debatamu, ulang heput ho. Hupatogu do ho, Hulehen pangurupion, Huondihon jana Hupalua ho.

JESAYA 41:14

“Ulang ho mabiar ale ulok-ulok ni Jakob, ale halak Israel! Au do pangurupi di ho, ninna Tuhan, jana na manobus ho, i ma Na Sun Badia, Debata ni Israel.

JESAYA 54:13

Au sandiri mangajari angka anakmu, anso mangolu sonang nian boti makmur.

JESAYA 55:12

Satutuna, na giot kehe noma hamu di bagasan jop ni roha, dipataru tu balian di bagasan sonang. Dolok dohot tor marendei marmoga-moga di jolomu, jana angka hayu pe martopapi.

JESAYA 57:19

BaenonKu ma puji-pujian. Dame, hadameon ma di halak na dao dohot na donok. Didok Tuhan pamalumonKu do ia!

JESAYA 9:6

Madung sorang di hita sada dakdanak; dibasa-basahon di hita sada anak. Ia ma na gabe pamimpinta. Digoari do Ia: “Panuturi Na Marroha”, “Debata Parkuaso”, “Ama Salolot ni lolotna”, “Raja Ni Hadameon”.

JEREMIA 1:8

Ulang ho mabiar mida halahi, angke sai dongananKu do ho laho mangondihon ho. Au Tuhan, madung mandok songon i!”

ANDUNG 3:17

Disirang Ia hosangku sian hasonangan; ma jabat lupa au di pangkilalaan jop ni roha.

JEHESKIEL 2:6

Tapi anggo ho ale jolma parsantongkinan, ulang ho mabiar mida angka jolma pangalo i sanga mida na ni pardokkonan ni halahi. Aloon jana palayason ni halahi do ho, lopus songon na mangolu di tonga-tonga ni duri sanga na tada-tada sanga na di tonga-tonga ni halak ho. Haru pe songon i, ulang ho mabiar.

DANIEL 4:1

On ma boa-boa ni Raja Nebukadnesar na nitongosnia tu jolma sian sandok bangso, marga ni bangso dohot hata na marragam-ragam di sude portibi on: “Mur martamba-tamba ma hadameon di hamu!

DANIEL 6:25

Dung i diparentahon raja i ma anso ditangkup angka na mangaduhon si Daniel i. Jadi rap diambungkon ma halahi dohot angka dakdanak dohot angka dadaboruna tu bagasan liang ni singa i. Nada jabat lalu dope halahi tu tandolan ni liang i, manigor disoro angka singa i ma halahi jana diropuk holi-holina i.

ZAKARIA 6:13

Ia ma da halakna na giot mambangun Bagas Ni Tuhan jana na manjagit hasangapan songon sada raja, jana mamarenta ma ia tu rayatnia i. Adong ma sada malim na gabe dongan pangalambunginia jana denggan do halahi rap saparkarejoan jana di bagasan dame.’

BILANGAN 6:26

Sai diadopkon Tuhan ma bohiNa tu hamu jana dipasaor ma dameNa tu hamu.

MATEUS 10:26

“Nada adong bagi aha na buni, na so patar muse, nada adong na simo, na so binoto sogot.

LUKAS 1:79

Songon i ma dilehen Ia sinondangNia tu sude halak na mangolu di bagasan hagolapan dohot biar. Togu-toguonNia ma hita di dalan hadameon.”

LUKAS 10:5

Muda masuk hamu tu sada bagas manigor dokkononmunu ma, ‘Hasonangan ma di bagas on.’

LUKAS 12:4

“Ingot hamu ma ale angka dongan! Ulang pola mabiar hamu mida halahi sibunu pamatang jana na so bisa mambaen sanga aha pe dung i.

LUKAS 2:14

“Hasangapan ma di Debata na di ginjang, dame ma di tano on di angka jolma halomoan i!”

JOHANNES 14:1

Didok Jesus ma, “Ulang pola marsak rohamunu. Porsaya ma hamu tu Debata jana porsaya ma hamu tu Au.

JOHANNES 16:33

Hudok pe i sudena anso marhasonangan do hamu harana di bagasan Au do hamu. Marhancit ma hamu baenon ni portibi on. Tapi sobar ma hamu! Madung Hutaluhon portibi on!”

JOHANNES 20:19

Laing di Ari Minggu i dung borngin marlagut ma anak sisean ni Jesus di sada bagas. Digoruk halahi ma sude pintu ni bagas i; hara ni na mabiar halahi tu angka parkuaso ni halak Jahudi. Jadi tompu ma ro Jesus jongjong di tonga-tonga ni halahi, ning Ia ma, “Hasonangan ma di hamu!”

JOHANNES 20:21

Dung i didok Jesus ma tu halahi sanoli nari, “Hasonangan ma di hamu! Songon parsuru ni Damang di Au, laing songon i ma hamu Husuru.”

JOHANNES 20:26

Dung salapan ari, marlagut ma mangulahi angka sisean ni Jesus di bagas i, dohot ma si Tomas disi. Margoruk do sude pintu ni bagas i. Tapi ro ma Jesus jongjong di tonga-tonga ni halahi, ning Ia ma, “Hasonangan ma di hamu!”

BAENON NI ANGKA RASUL 10:36

Hamu ale angka dongan, tontu madung diboto hamu isi ni jamita na nipabolkas ni Debata tu halak Israel. Jamita Na Denggan do barita i na paboahon dame markite-hite Jesus Kristus, i ma Tuhan ni sude jolma.

BAENON NI ANGKA RASUL 18:9

Di na sanoli borngin-borngin didok Tuhan ma tu si Paulus di bagasan sada parnidaan, “Ulang pola mabiar ho! Torus ma ho mangkobari, ulang ho hohom.

SURAT NI SI PAULUS TU PARLAGUTAN ROM 1:7

Tu hamu sude na di Rom, na nihaholongan ni Debata, na nipio jana dibaen gabe halak na badia: Asi ni roha ma di hamu dohot hasonangan na sian Debata Amanta dohot sian Tuhan Jesus Kristus.

SURAT NI SI PAULUS TU PARLAGUTAN ROM 15:13

Debata do arop ni rohamunu. Sai digohi Ia ma rohamunu dohot jop ni roha bope dohot hasonangan di bagasan haporsayaanmunu tuSia, anso mur mararop roha hamu tu Debata baenon ni gogo ni Tondi Parbadia.

SURAT NI SI PAULUS TU PARLAGUTAN ROM 5:1

Hara ni i, hita na nipatigor markite-hite haporsayaan, mangolu do hita di bagasan hasonangan dohot Debata markite-hite Tuhanta Jesus Kristus.

SURAT NI SI PAULUS TU PARLAGUTAN ROM 5:10

Harana muda hatiha musu dope hita, dipadame hita dohot Debata markite hamamate ni AnakNia, tarlumobi hita na saonnari na dung dipadame, pasti do angkon dipalua markite ngoluNia.

SURAT NI SI PAULUS TU PARLAGUTAN ROM 8:6

Muda bako ni jolma do manggohi rohaniba, hamatean ma ujungna. Tapi muda Tondi Ni Debata do manggohi rohaniba, mandapot hangoluan ma iba jana hasonangan sian Tondi Ni Debata.

1 KORINTUS 1:3

Asi ni roha dohot hasonangan na sian Debata Amanta dohot sian Tuhan Jesus Kristus ma na mandongani hamu.

GALATIA 1:3

Asi ni roha ma di hamu dohot hasonangan, sian Debata Amanta dohot sian Tuhan Jesus Kristus,

GALATIA 5:22

Tapi anggo parbatu ni Tondi i, on do: Holong ni roha, jop ni roha, hasonangan, lambok ni roha, habasaran, lidang ni roha, hatomanan,

GALATIA 6:16

Di angka na mangolu songon pandiriankon, dohot di sude halak ni Debata, arop do rohangku lehenon ni Debata hasonangan dohot ibo ni rohaNia.

PILIPPI 4:7

Hasonangan ni Debata na sumurung sian sude roha, manjagahon roha dohot pikiranmunu di bagasan Kristus Jesus.

KOLOSSE 1:2

tu angka dongan sahaporsayaan di bagasan Kristus na di Kolosse; i ma angka na badia. Asi ni roha ma di hamu dohot hasonangan na sian Debata Amanta, i ma na mandongani hamu.

KOLOSSE 1:20

Jana markite-hite Anak i muse do dibaen Debata sasudena mardenggan mangulahi dohot Debata – sasudena na di tano on, sanga pe na adong di banua ginjang. Markite-hite hamamate ni AnakNia di hayu parsilang i do dibaen Debata sudena i.

KOLOSSE 3:15

Angka haputusan sibaenonmunu, tontuhon hamu ma i mardongan dame na nilehen ni Kristus tu bagasan rohamunu. Angke na nipiohon ni Debata do hamu gabe sada pamatang, anso mangolu hamu sian hadamean na sian Kristus i. Mandok tarimakasi ma hamu.

2 TESSALONIKA 1:2

Asi ni roha dohot hasonangan ma di hamu, sian Debata, Amanta, dohot Tuhan Jesus Kristus.

2 TESSALONIKA 3:16

Tuhan i do haroroan ni hasonanganta. Sai tongtong ma dilehen Ia hasonangan di hamu markite-hite dalan na marragam. Sai didongani Tuhan ma hamu sudena.

2 TIMOTEUS 1:7

Harana anggo Tondi na nilehen ni Debata tu hita, nada Tondi na mambaen hita gabe parbiar. Tapi na patoguhon hita do Tondi i, na manggohi hita dohot holong ni roha jana na margogoihon hita mangorom dirinta.

IBRANI 13:20

Madung dipangolu Debata Tuhanta Jesus sian hamatean. Hara ni hamamateNia i, gabe Parmahan Bolon ma Ia saonnari di hita na gabe songon biri-biriNia. Laing songon jaminan muse do hamamateNia i taringot tu janji na so ra muba na sian Debata.

IBRANI 7:2

Dung i dilehen si Abraham ma tu si Melkisedek saparsampulu ni sude na dapotnia sian parporangan i. (Goar Melkisedek astuanna na parjolo, “Raja Na Adil”; jana hara ni raja sian Salem ia, gabe “Raja Hasonangan” ma astuan ni goarnia.)

HALUMBAAN 1:4

Sian si Johannes tu parlagutan na pitu i, na di tano Asia. Asi ni roha ma di hamu dohot hasonangan sian Ia, na adong saonnari, na dung adong hian, jana na giot ro, dohot sian tondi na pitu i, na di jolo ni habangsaNia,

HALUMBAAN 2:10

Ulang ho mabiar taringot tu na giot taononmu. Ligi ma dabuon ni sibolis ma deba sian hamu tu bagasan hurungan, anso niuji hamu, jana manaon parkancitan ma hamu salolot sampulu ari. Sai bonar ma rohamunu lopus tu hamatean i, dung i lehenonKu ma di ho tuku hangoluan.

HALUMBAAN 21:8

Tapi anggo angka parbiar, angka na so tontu, angka na so ture, sibunu jolma, angka na rogon, angka pardatu-datu, angka na manyomba gana-ganaan dohot sudena pargabus, laut api do inganan ni halahi dohot barerang na gara-gara, i ma hamatean na paduahon i.”