JOEL 2:16 - BIBEL JAMITA NA DENGGAN

¹⁶ Palagut ma sandok bangso i, parade ma tu parpunguan godang halahi. Oban muse ma angka na tobang-tobang, angka dakdanak maradu na niompaan. Na baru tu bagasna pe sude na mardohotan. Suru halahi manadingkon bagasna.

JOEL 2:16 ပူးပေါင်းရင်းမြစ်များ

2 JUJUR TAON 20:13

Jadi laing marjongjongan ma sude angka halaklahi ni Juda i rap dohot angka dadaboruna maradu angka dakdanak ni halahi di jolo ni Bagas Ni Debata i.

2 JUJUR TAON 29:5

jana manghobari ma ia tu halahi disi. Didok ia ma, “Hamu angka halak Levi, angkon manghapunjungkon diri do hamu tu Tuhan, jana paiaskonmunu Bagas Ni Tuhan, Debata ni ompumunu i. Angkon paoroton do sude na pahodarkon bagas i.

2 JUJUR TAON 30:17

Bahat dope halak na ro i tusi na so mangias diri, jadi gabe nada tola halahi manyambol biri-biri sibaenon haul Paskah i. Jadi hara ni i gabe angka halak Levi i noma na mangkarejohon i di halahi dohot manghaulkonsa tu Tuhan.

2 JUJUR TAON 30:19

“Tuhan, Debata sombaon ni ompunami, sian hadengganan ni rohaMi, sai ra ma Ho nian mangampuni halak na mulak tu Ho sian sasude rohana, haru pe na so mangias dirina dope halahi.”

2 JUJUR TAON 35:6

Angkon hamu do manyambol hambeng dohot biri-biri Paskah i. Jadi hara ni i angkon mangias diri do hamu mangihutkon ugamo, jana paradehon haul anso tarbaen angka halak na sian dongan sabangsomunu mandalankon sanga aha na niparentahon ni Tuhan marhite si Musa.”

JOB 1:5

Ganop abis pesta, sai sigop do ngot si Job jana dihaulkon ia ma haul salaho tu angka anaknia i anso disesa Tuhan dosa ni halahi. Harana didok rohania betak na dung mardosa do angka dakdanaknia i jana pabilehon Debata sian na so pamotoanna.

MASMUR 19:5

manyogot i bincar ia songon pangoli na martua, songon pahlawan na giot mardalani.

HARURUAR 19:10

jana didok Tuhan ma tusia, “Kehe ma ho manopotkon halahi jana suru ma halahi marhobas sadari on dohot ancogot laho maribadat. Angkon basuon ni halahi do pakeanna be.

HARURUAR 19:15

Jana didok si Musa ma tu halahi, “Angkon hobas do hamu haduan jana ulang hamu marcampur sahatiha on.”

HARURUAR 19:22

Salang angka malim na giot mandonohi Au pe, angkon paiasonna do dirina; anggo nada songon i, hona uhum do halahi.”

JOEL 1:14

Parentahon bangsomi anso puaso, patupa hamu ma sada ari parpunguan bolon! Ontang ma angka pamimpin maradu hatobangonna maradu sude angka na maringanan di luat on, anso marroan tu Bagas Ni Tuhan Debata, laho martangiang jana pio-pio mangido tolong tuSia.

MATEUS 21:16

Didok halahi ma tu Jesus, “Na so dibege Ho do na nidok ni halahi i?” “Olo, Hubege do,” ninna Jesus mangalusi, “Na so unjung do dibaca hamu hata na mandok: ‘Dakdanak dohot na baru sorang pe na dung Huajari do mandok hata puji-pujian na sun denggan’?”

MATEUS 9:15

Dialusi Jesus ma, “Bia do ninna rohamunu? Adong ma he ninna rohamunu tamu na marsak hatiha pesta mangupa na marbagas, salolot rap dohot halahi bayo pangoli i? Tapi muda dung dapot hatihana dibuat bayo pangoli i sian halahi, baru pe anso puaso halahi.

1 KORINTUS 7:5

Ulang ma marsipadaoan halak na saripe, muda so sian tumbuk ni tahi sanga sadia lolotna, anso bisa hamu rap martangiang. Dung i mardomu ma hamu mangulahi, anso unang diuji Sibolis hamu, harana nada tahan hamu marpuaso.

JOSUA 7:13

Saonnari jongjong ma ho Josua! Paias ma halak Israel jana suru ma halahi hobas laho mangadop tu Au. Parentahon ma halahi anso markobas-hobas ancogot, harana Au Tuhan Debata ni Israel, giot mandok tu halahi songon on: ‘O hamu angka halak Israel! Angka barang-barang na dung Huparentahon tu hamu angkon dironcohon, adong deba di hamu. Painte so diambungkon hamu angka barang-barang i, nada tarbaen hamu martahan mangalo musu i!’

JOSUA 8:35

Pasada-sada sude parenta ni si Musa na tarsurat di bagasan Buku Tona Ni Tuhan i disise si Josua tu sandok halak na marlagut disi, dohot ma disi angka dadaboru, angka dakdanak, dohot angka halak sileban na tinggal di tonga-tonga ni halak Israel.

1 SAMUEL 16:5

Dialusi si Samuel ma, “Olo, tutu do i. Na giot manghaulkon haul tu Tuhan do na huharohon. Jadi paias hamu ma dirimunu anso tarbaen hamu dohot di na marhaul i.” Si Isai pe dohot angka dakdanakna i laing dohot ma disuru ia paias dirina be, jana diontang ia tu parhaulan i.