JOEL 2:12 - BIBEL JAMITA NA DENGGAN

¹² Didok Tuhan ma, “Tapi anggo saonnari, sian sandok roha mulak ma tu Au mangulahi, lalu puaso, tangis jana marsak.

JOEL 2:12 ပူးပေါင်းရင်းမြစ်များ

2 SAMUEL 24:10

Tapi dung sidung si Daud na mangetong bangso i, dihilala ia ma na marsala ia, gabe didok ia ma tu Tuhan, “Madung mambaen dosa au! Ale Tuhan, ampuni ma au, angke karejo na oto do na hubaen on.”

2 JUJUR TAON 30:6

Hara ni parenta ni raja i dohot angka pagawena, disuru ma angka utusan tu sude Juda dohot Israel laho maroban angka surat i, songon on ma hatana, “Hamu halak Israel! Madung malua hamu sian kuaso ni halak Asur. Saonnari sai mulak ma hamu tu Tuhan, Debata na nisomba ni si Abraham, si Ishak dohot si Jakob, anso mulak muse Ia tu hamu.

2 JUJUR TAON 6:27

ale Tuhan na di banua ginjang, sai tangihon ma halahi. Jana ampuni ma angka dosa ni bangsoMu Israel. Ajari ma halahi mangkarejohon sanga aha na tigor. Dung i ale Tuhan, paro ma udan tu tanoMon, tu luat na dung nilehenMu tu bangsoMu anso gabe nampuna ni halahi salolot ni lolotna.”

ESTER 4:16

“Palagut ma sude halak Jahudi na di Susan anso martangiang salaho tu au. Ulang ma hamu mangan tolu ari tolu borngin lolotna. Au sandiri pe dohot angka bujing-bujing na mangoloi au laing puaso do. Dung sidung i, mangadop ma au tu raja i, haru pe mangalanggar undang-undang do i. Muda angkon mate ma au hara ni i, padiar ma mate au tusi!”

HARURUAR 33:5

Madung diparentahon Tuhan tu si Musa anso didok ia tu bangso i, “Bangso sijogal rungkung do hamu. Muda mardalan Au di tonga-tongamunu hum sangombas pe tontu sun ma hamu mago baenonKu. Jadi hara ni i bukai hamu ma angka barang parhiasanmunu i anso Huida jolo sanga aha na giot sibaenonKu tu hamu.”

JESAYA 22:12

Suruon ni Tuhan, Tuhan Na Markuaso i ma hamu tangis dohot mangandungi, marcukur ulu dohot mamake abit goni di hatiha i.

JESAYA 58:4

Puaso pe hamu hum anso patubu bada do dohot parsalisian jana mur gasa-gasaon hamu mambalbali. Diambang hamu do lakna puaso na songon i ma mambaen Au targorak laho manangihon angka tangiangmunu?

JEREMIA 3:22

O hamu sude na manadingkon Tuhan, mulak ma hamu! PamalumonNia ma hamu, jana baenonNia ma hamu setia. Didok hamu, “Olo da, saonnari ma hami ro tu Tuhan, angke Ia do antong Debatanami.

JEREMIA 36:7

Betak na gabe martangiang do halahi tu Tuhan baenon ni i jana muba halahi sian angka parbuatan ni halahi na jahat i. Sun do muruk ni Tuhan tu halahi jana mangondam do tu halahi.”

JEREMIA 4:1

Didok Tuhan, “O halak Israel, muda ra hamu mulak mangulahi, antong mulak ma hamu. Jolo parambungkon hamu ma angka gana-ganaan na Huhagigihon i, jana setia ma hamu tu Au,

JEREMIA 4:2

baru pe anso tola hamu marsumpa mangasahon goarKu. Jadi gabe pangidoon ni sandok bangso ma anso Hupasupasu halahi, jana pujion ni halahi ma Au.”

JEHESKIEL 33:11

Dokkon ma tu halahi, mangasahon Au na mangolu, Tuhan Debata nada jop rohangKu muda mate halak parjahat i; tapi sugari mulak ma nian ia manadingkon angka dosana anso tongtong ia mangolu. Ale bangso Israel, antak hamu ma mambaen na jahat! Biasi angkon sai mate hamu?”

DANIEL 9:3

Dung i huadopkon ma bohingku tu Tuhan Debata lalu martangiang mangido huhut marpuaso. Jana mamake baju siluluton jana juguk di ginjang ni abuan.

HOSEA 12:6

Debata i ma Tuhan, Debata Na Markuaso i. Tuhan do goarNa. Marhite goar i ma dihagioti rohaNia maribadat halak tuSia.

HOSEA 12:7

Hara ni i, ale hamu pomparan ni si Jakob, haporsayai hamu ma Debatamunu i jana mulak ma hamu tuSia. Gok holong ni roha dohot hatigoran ma ngolumunu, jana sobar ma hamu paintehon lopus tulus i dibaen Debatamunu.

HOSEA 14:1

Angkon uhumon do Samaria hara ni na mangalo tu Au. Marmatean ma rayatna i di bagasan parporangan; hona giling angka dakdanakna na baru sorang, jana angka dadaboru na denggan pamatangna hona bola butuhana i.”

HOSEA 6:1

“Beta ma mulak hita tu Tuhan. Ia do na mambaen marhancit hita, tapi laing Ia muse do na pamalumkon. Ia do na mambugangi hita, tapi laing Ia muse do na mambalut angka bugangta.

JOEL 1:13

Hamu ale angka malim na markobasi di langgatan, pake hamu ma abit goni anso martangisan. Masuk ma tu Bagas Ni Tuhan marbornginma laho mangandung disi, angke nada adong be haul anggur dohot gandum.

ZAKARIA 7:3

Laing disuru do halahi marsapa tu angka malim dohot panurirang, songon on, “Angkon tangis dope he hami jana puaso ganop di bulan palimahon songon na dung hami dalankon martaon-taon honokna?”

ZAKARIA 7:5

“Palalu ma tu sude halak na maringanan di luat on dohot tu angka malim songon on: Dompak marpuaso hamu jana mangandungi di bulan palimahon dohot papituhon salolot na pitu pulu taon on, adong ma he sian situtu ni rohamunu marpuaso di Au?

MALEAKI 1:9

Antong, hamu ale angka malim, cubo hamu ma jolo mangido tu Debata anso ibo nian rohaNia mida hita. Nada alusanNia tangiangmi, jana patunda ni dosamu sandiri ma sudena i.

BAENON NI ANGKA RASUL 26:20

Tangkas do hupatorang sanga na tu ise pe anso marsipauba rohana be sian angka dosana jana marsipasahat dirina be ma tu Debata jana angkon tarida ma di ngolu ni halahi be paboa na dung muba rohana sian dosa ni halahi be. Di Damaskus ma parjolo hupatorang songon i, dung i baru di Jerusalem dohot di sude Luat Judea dohot di tonga-tonga ni angka bangso na asing.

HAKIM-HAKIM 2:4

Dung sidung dipajojor surusuruan i barita i, tangis ma sude bangso Israel.

HAKIM-HAKIM 20:26

Jadi gabe kehe muse ma halak Israel tu Betel tangis tu Tuhan. Puaso do halahi disi lopus borngin jana dipasahat halahi do angka haul pardonganan dohot angka haul situtungon.

1 SAMUEL 7:3

Dung i didok si Samuel ma tu halak Israel, “Muda na giot marbalik ma hamu tu Tuhan jana marsomba tuSia sian sandok rohamunu, angkon ambungkononmunu do sude debata na asing dohot patung ni Dewi Astoret i. Pasahat hamu dirimunu sude tu Tuhan jana hum tuSia sajo ma hamu marsomba, jadi gabe paluaonNa ma hamu sian halak Pilistin.”

1 SAMUEL 7:6

Jadi marlagut ma halahi sude di Mispa. Ditimbai halahi ma aek jana diparduruskon halahi ma i gabe songon haul tu Tuhan, jana dipaudut halahi tu na marpuaso tangging sadari i. Didok halahi ma, “Madung mardosa hami tu Tuhan.” (Di Mispa ma dipungka si Samuel pasidungkon angka parkaro parsalisian ni halak Israel.)