JESAYA 9:12 - BIBEL JAMITA NA DENGGAN

¹² Rampason ni bangso Siria na sian Habincaran dohot bangso Pilistin di Hasundutan ma Israel. Tapi laing muruk dope anggo Tuhan jana sai giot manguhumi.

JESAYA 9:12 ပူးပေါင်းရင်းမြစ်များ

2 JUJUR TAON 28:18

Laing di hatiha i manyaroso muse ma angka halak Pilistin tu angka kota na di pat ni dolok na di sabola Hasundutan dohot na di luat sabola Selatan ni Juda. Dibuat halahi ma kota Bet-Semes, Ayalon dohot Gederot, dohot angka kota Soko, Timna dohot Gomso maradu angka pagaran na humaliang kota na tolu i, lalu maringanan halahi disi.

MASMUR 79:7

Angke madung dibunu halahi bangsoMi, jana disegohon halahi tanona i.

JESAYA 10:4

Mate di bagasan porang sajo ma bagianmunu, sanga disarat-sarat songon halak na tartaban. Tapi laing na muruk dope Tuhan jana sai giot manguhumi.

JESAYA 11:14

Rap mamorangi noma halahi tu halak Pilistin na di Hasundutan jana mangarampasi angka bangso na di Habincaran. Taluhonon ni halahi ma bangso Edom dohot Moab, dohot bangso Amon pe tunduk ma tu halahi.

JESAYA 31:1

Marjaya ma halak na kehe tu Mesir laho mangido pangurupion. Dipangasahon halahi do hagogoan ni tentara ni Mesir, dohot parangan na manengget kudo dohot kudonia na gogo i songon i karetana na bahat i. Hape nada porsaya halahi tu Tuhan, Debata Na Badia ni Israel sanga pe mangido pangurupionNia.

JESAYA 5:25

Muruk Tuhan tu bangsoNia i. Madung rade Ia laho manguhumi halahi. Humutur ma angka dolok; marragean ma angka bangke songon rompak di angka dalan. Hape laing muruk dope Tuhan jana laing na giot manguhumi.

JESAYA 9:17

Madung marbalik bangso i jana marpangalaho na hodar, jana hata ni halahi sude jahat do. Jadi hara ni i, sian tonga-tonga ni angka doli-doli umpe sahalak na giot malua baenon ni Tuhan. Inda ra Ia maribo ni roha mida angka na mabalu dohot na so marama so marina. Tapi laing torus dope Tuhan muruk jana sai giot manguhumi.

JESAYA 9:21

Marsiporangan ma halak Manase dohot halak Efraim, jana rap mamorangi ma i tu Juda. Tapi laing muruk dope Tuhan jana sai giot manguhumi.

JEREMIA 10:25

Tu angka na manghudukkon Ho ma, palalu parpiar ni murukMu dohot tu na so marsomba tu joloMu. Angke madung diabisi halahi sude pomparan ni si Jakob jana na mangaroncohon tano ni halahi.

JEREMIA 15:7

Hupiari ma halahi dohot anduri di sude inganan di luat on. BaenonKu ma bangsongKu agoan anak, jana pangabisonKu halahi, harana inda maruba halahi sian pangalahona.

JEREMIA 35:11

Tapi di na ro Raja Nebukadnesar mamorangi luat on, hami putuskon ma maporus sian tentara ni Babel dohot tentara ni Siria, jana mangungsi ma hami tu Jerusalem on. I ma dalanna umbaen na dison hami maringanan saonnari.”

JEREMIA 4:8

Antong hara ni i, tangis jana mangandungi ma hamu, pake hamu ma abit goni tanda ni arsakmunu. Angke nada sumurut dope sian Juda muruk ni Tuhan na marnyala-nyala.

JEHESKIEL 16:27

Saonnari ligi ma, uhumanKu ma ho jana buatonKu pasupasu na dung Hulehen humani tu ho. Hupasahat ho tu halak Pilistin na manghosomi ho jana na magigi mida pangalahomu na jat i.

JEHESKIEL 6:14

Olo antong, pahortangonKu ma tanganKu jana ropuhonKu luat ni halahi i lopus gabe mamolngit mamungka sian halongonan na di Selatan lopus tu kota Ribla di Utara. Sian angka inganan ni halak Israel, sahalak pe nada adong na giot paluaonKu. Jadi gabe botoon ni halak ma, Au do Tuhan.”

HOSEA 7:10

Tarida ma tangkas haginjangon ni roha ni Israel, jana gabe bukti ni hasalaan ni halahi ma i. Haru pe madung tarjadi sudena i, laing na so ra muse do halahi mulak tu Au, Tuhan Debata ni halahi.

AMOS 4:10

Hutongos tu hamu nyae masa songon na hutongos tu Mesir. Humatehon angka doli-dolimunu di bagasan parporangan, jana hurampas angka kudomu. Hugohi inganan ni bandarmunu dohot bangke na manyusuk bauna tu igung. Haru songon i pe, laing nada mulak hamu tu Au.

AMOS 4:11

“Madung Husegoi angka hutamunu, songon Sodom dohot Gomora na disegoi ni Debata. Na tinggal mangolu sian hamu i ma na tudos tu surpu na niela sian api. Haru songon i pe, laing nada mulak hamu tu Au.

AMOS 4:6

Au do na pamasahon haleon potir tu sude kotamunu, hape nada mulak hamu tu Au.

AMOS 4:8

Di deba kota ma pola gale halakna hara ni na manguas, manjalahi aek tu kota na asing, hape nada tuk aek na disi. Haru pe songon i, laing na so mulak do hamu tu Au.

AMOS 4:9

Huombuskon alogo na milas mamatehon angka suan-suanan. Siapor na mangabiskon bona ni anggur, bona ni ara, bona ni zetun dohot suan-suanan na asing di angka kobunmunu. Haru pe songon i, laing nada mulak hamu tu Au.

ZEPANYA 1:6

AbiskononKu ma halahi na so ro tu Au sanga na so mangido panogu-noguon tu Au dohot na dung marbalik manadingkon Au jana na so ra be mangihutkon Au.”

ZEPANYA 3:2

Nada ra i manangihon jana nada ra manjagit sipaingot. Nada porsaya tu Tuhan jana nada ra mangido tolong tu Debata.

PANGARATAION 31:17

Muda tarjadi songon i, hona muruk ma halahi baenonKu. TadingkononKu ma halahi, tabunihononKu ma bohingKu maradopkon halahi jana pangabison halahi. Marroan ma bahat parmaraan na ampe tu halahi, jana botoon ni halahi ma umbaen na masa pe songon i tu halahi, angke Au do antong Debata ni halahi, hape nada Hudongani be halahi.