JESAYA 55:3 - BIBEL JAMITA NA DENGGAN

³ Tangihon ma ale bangsongKu, ro ma hamu tu Au, tangihon ma, anso mangolu hamu. Hara ni holong ni rohangKu na togu tu si Daud, naposongKi, Hupudun janji na hot dohot hamu.

JESAYA 55:3 ပူးပေါင်းရင်းမြစ်များ

PAMUNGKAAN 17:7

Paingot-ingotonKu do janjingKu na tu ho dohot tu pomparanmu marsundut-sundut jana hot do janjingKu salolot-lolotna. Au ma gabe Debatamu jana Debata ni pomparanmu.

PAMUNGKAAN 49:10

Tiopon ni si Juda ma tungkot harajaon. Mamarenta ma pomparanna sapanjangna. Marroan ma angka bangso pasahat somba-sombana. Jana manungkap tanda tunduk di jolona.

2 SAMUEL 23:5

Laing songon i ma pomparanku pasupasuon ni Debata, janjiNia tu au nada muba, hot tongtong jana sanggam janjiNia taratur do i di sasudena. Debata do na mangalehen au monang jana na mambaen dijagit sude pangidoan.

2 SAMUEL 7:29

Antong hara ni i pangidoanku, sai lomo ma rohaMu mamasumasu pomparanku anso sai tongtong manjagit holong ni rohaMu. O Tuhan Na Gumincat, madung dijanjihon Ho sudena i, jadi pasupasuonMu ma torus pomparanku salolot-lolotna.”

2 JUJUR TAON 6:42

Ale Tuhan Debata, ulang ma tulak tangiang ni raja na nipiliMon. Ingot ma holong ni rohaMu tu si Daud naposoMi.”

MASMUR 119:112

Sai giot oloanku do hatontuan na nibaenMu, lopus tu ujung ni ngolungku.

MASMUR 119:175

Lehen ma di au ngolu, anso hupuji Ho, sai diurupi haputusanMu ma au.

MASMUR 78:1

Tangihon ma pangajaranku, o hamu bangsongku, parrohahon ma angka hatangku.

MASMUR 89:28

Holong ni rohangKu nada mansadi, parjanjianKu dohot ia sai hot do i Hugohi.

MASMUR 89:29

Salolot adong langit di ginjang tano martahan do habangsania, jana pomparanna sandiri manjuguhisa.

HARURUAR 15:26

Ninna Tuhan ma, “Angkon oloanmunu do Au sian sude rohamunu, marhite na patupahon sanga aha na denggan di Au bope patulus sude na Huparentahon. Muda dikarejohon hamu do i, nada uhumanKu hamu marhite angka nyae songon na dung Hubaen tu halak Mesir i. Au do Tuhan na pamalum hamu.”

PODA 4:20

Parrohahon ma angka na hudok, ale anakku! Tangihon ma angka sipaingotku.

PODA 7:2

Ihutkon ma angka sipaingotku anso mangolu ho. Denggan ma ihutkon angka pangajaranku songon panjagomu di anak ni matamu sandiri.

JESAYA 51:4

Parrohahon ma sorangKu, ale angka bangso, patinggil ma pinggolmu tu Au, ale angka marga ni bangso na marragam! Angke ruar ma pangajaran sian Au, jana tonangKu gabe sinondang tu sude bangso.

JESAYA 54:10

Muncat pe angka dolok jana humutur dohot tor, tapi holong ni rohangKu nada muncat sian ho, jana janji hadameonKu nada morot sian ho,” ninna Tuhan, na manghaholongi ho.

JESAYA 54:8

Hara ni parpiar ni murukKu, Hutabunihon bohingKu, santongkin maradopkon ho. Tapi patuduhononKu ma tu ho holong ni rohangKu salolot ni lolotna.” Songon i ma na Hudok, Au Debata Sipalua ho.

JESAYA 61:8

Angke Tuhan do Au, “Huhaholongi do hatigoran jana magigi do Au mida na kejam dohot hajahatan. TumbasonKu bangso on marhite hadengganan, Hupudun janji na hot dohot halahi.

JEREMIA 30:9

Mangoloi noma halahi tu Au Tuhan Debata ni halahi, dohot tu sada halak sian pomparan ni si Daud na giot angkatonKu gabe raja.

JEREMIA 32:40

BaenonKu ma parjanjian na hot dohot halahi. Nada mantak Au mambaen na denggan tu halahi. BaenonKu ma halahi mabiar jana mamparsangapi Au sian sandok rohana anso ulang mandao halahi sian Au.

JEREMIA 33:26

laing songon i ma tongtong tioponKu parjanjianKu dohot pomparan ni si Jakob dohot naposongKu si Daud. TodoonKu ma sahalak sian pomparan ni si Daud laho mangarajai pomparan ni si Abraham, si Ishak dohot si Jakob. Maribo ni roha ma Au tu bangsongKu jana sonang halahi baenonKu.”

JEREMIA 38:20

“Nada,” ningku mangalusi, “Nada pasahatonna raja i tu halahi. Gomos ma pangidoanku anso dioloi raja i ma nian tona ni Tuhan on; sidung do sudena i muse, jana nada hona bunu be raja i.

JEREMIA 50:5

Sapaan ni halahi ma dalan tu Sion, lalu mardalan ma halahi sabola tusi. Baenon ni halahi ma parjanjian na hot dohot Au jana nada langgaron ni halahi janji i.

JEHESKIEL 16:60

Tapi ingotonKu do parjanjian na dung Hubaen dohot ho taran di haposoonmu dohot na mambaen parjanjian na hot dohot ho salolot-lolotna.

JEHESKIEL 34:24

Au Tuhan, gabe Debata ni halahi, jana raja na tudos tu si Daud i ma na gabe pangarajai ni halahi. Au Tuhan, madung mandok songon i.

JEHESKIEL 34:25

BaenonKu ma parjanjian dohot halahi na manjamin aman halahi. PaorotonKu ma sude binatang panyoro sian luat i sude, lopus aman angka biri-biringKi tinggal di padang-padang i dohot modom di harangan-harangan i.

JEHESKIEL 37:26

BaenonKu ma sada parjanjian dohot halahi na manjamin hasonangan ni halahi sapanjangna. PasupasuonKu, jana tambaanKu ma bilangan ni halahi. PajongjongonKu ma di tano ni halahi BagasKu na hot salolot-lolotna.

HAMALIMON 18:5

Karejohon ma angka aturan bope angka uhum na dung Hulehen di ho. Muda dibaen hamu songon i, malua ma ho. Au do Tuhan.”

AMOS 5:4

Didok Tuhan ma tu halak Israel, “Mulak ma hamu tu Au, anso gabe mangolu hamu.

AMOS 5:6

Mulak ma hamu tu Tuhan, gabe mangolu ma hamu. Muda nada mulak hamu tuSia, ro ma Ia songon api na manutung lopus abis halak Israel. Panganon ni api i ma sudena halak na maringanan di Betel, jana nada adong sanga ise pe na tarbaen mangintopisa.

MATEUS 11:28

“Ro ma hamu tu Au, sude hamu na loja jana na sorat bobanna, Hupasonang pe hamu!

MATEUS 13:16

“Tapi martua ma matamu hara ni na marnida jana pinggolmu hara ni na marbinege.

MATEUS 17:5

Dompak na mandok hata i si Petrus, dihaliangi ombun na torang situtu ma halahi. Dung i adong ma sada sora sian ombun i na mandok, “On ma AnakKu na Huhaholongi, na pasonangkon rohangKu. Tangihon hamu ma Ia!”

JOHANNES 10:27

Ditangihon biri-biringKu do sorangKu. Hutanda do halahi jana diihutkon halahi do Au.

JOHANNES 6:37

Sudena halak na dung dipasahat Damang tu Au, ro ma halahi tu Au. Nada tulahonKu, sanga ise pe na ro tu Au.

JOHANNES 7:37

Ari na parpudi di pesta i, i ma mata ni pesta i. Jongjong ma Jesus disi mandok hata marsora na gogo, ning Ia ma, “Sanga ise na manguas, tu Au ma ro anso minum.

JOHANNES 8:47

Sanga ise na ro sian Debata ditangihon Ia do na nidok ni Debata. Tapi anggo hamu nada sian Debata hamu, hara ni i ma umbaen na so ra hamu manangihon i.”

BAENON NI ANGKA RASUL 13:34

Madung dipangolu Debata Ia mangulahi sian hamatean. Jadi saonnari nada be daionNia hamatean na di kuburan. Taringot tusi pe didok Debata do, ‘LehenonKu ma tu hamu janji na badia na angkon patuluson, i ma na dung Hujanjihon tu si Daud.’

SURAT NI SI PAULUS TU PARLAGUTAN ROM 10:5

Disuratkon si Musa do taringot tu hatigoran na ro sian Tona i, “Halak na mangkarejohon Tona i, mangolu do markite-hite i.”

IBRANI 13:20

Madung dipangolu Debata Tuhanta Jesus sian hamatean. Hara ni hamamateNia i, gabe Parmahan Bolon ma Ia saonnari di hita na gabe songon biri-biriNia. Laing songon jaminan muse do hamamateNia i taringot tu janji na so ra muba na sian Debata.