JESAYA 53:12 - BIBEL JAMITA NA DENGGAN

¹² Hara ni i lehenonKu ma tusia angka na sangap songon rampasan dohot angka na togos songon tabanan, i ma gonti ni na dung dilehen ia hosana tu hamatean dohot hara ni na dietong ia parjahat, haru pe ia do mananggung dosa ni halak na bahat, jana martangiang tu parjahat i.

JESAYA 53:12 ပူးပေါင်းရင်းမြစ်များ

PAMUNGKAAN 3:15

Marsihosoman ma ho dohot dadaboru i. Marsalisi ma torus pomparanna tu pomparanmu. Ropukkonon ni pomparannia ma ulumu jana turbingonmu ma tambihulna.”

JOB 30:16

Saonnari mate ne noma da iba; so adong be na panayang pardangolanniba.

MASMUR 2:8

Pangido ma, gabe sandok bangso ma lehenonKu, lopus sude portibi on gabe nampunamu.

MASMUR 22:14

Abis ma sude gogongku, songon aek na durus tu tano, martalgangan sude holi-holingki, ate-ate i pe malala songon lilin na hona api.

HARURUAR 15:9

Ninna musu, ‘Ayakonku ma halahi anso hutangkup jana hubuat por ni rohangku. Sintahonku ma podangku jana hurampas ma sude arta ni halahi, hubagi-bagi jana di au ma i lopus sombu rohangku.’

JESAYA 49:4

Ningku ma, “Magopo do halolojangku, parcuma do hupuntial gogongku!” Tapi haru songon i pe, pos do rohangku ampinan ni Tuhan do au, balosonNia do di au marguru tu pambaenanku.

JESAYA 52:13

Satutuna, monang do naposongKu, pagincaton do ia, dipuji-puji jana dipasangap.

JESAYA 52:15

Tapi anggo saonnari bahat bangso homang hara ni ia, mangkohom angka raja hara ni longangna. Angke na so dibaritahon humani tu halahi, ligion ni halahi ma saonnari, dohot aha na so binege ni halahi, astuanna ma saonnari.

JESAYA 53:6

Lilu do hita sudena songon biri-biri, marsitondong dalanna be. tapi madung dihonahon Tuhan tusia sude hajahatanta.

JESAYA 53:8

Ditahan do ia jana didabu uhuman, lalu hona oban tu panyambolan. Nada adong na parduli di bagiannia. Tutu do, mago ma ia sian tano ni halak na mangolu; gabe ia hona pukul hara ni dosa ni bangsongKu.

DANIEL 2:45

Nada he diida raja i do sada batu na magulang sian dolok-dolok i haru pe nada adong halak na mandabuhonsa, lalu manondong dohot mangaropuk patung na sian bosi, tumbaga, tano liat, perak dohot sere i? Didok Debata na sun godang i do tu raja i sanga aha muse na giot masa tu pudi on. Madung hupaboa nipi ni raja i na satutuna jana hupatorang astuanna na sasintongna.”

MATEUS 26:42

Jadi kehe ma Jesus padua-nolihon laho martangiang. Didok Ia ma, “Muda na angkon taononKu ma parkancitan on ale Amang jana nada tarbaen so taononKu, rohaMu ma na tulus.”

MARKUS 15:27

Diparsilangkon halahi muse do rap dohot Jesus dua halak panyamun. Sada di siamunNia, na sada nari di siambirangNia. [

MARKUS 15:28

Jadi di bagasan ni i tulus ma tarjadi na tarsurat di Buku Na Badia i na mandok: “Nietong ma Ia sarupa tu halak na jahat.”]

LUKAS 22:37

Angke Au mandok di hamu! Angkon tulus muse dope tu Au hata na tarsurat di Buku Na Badia na mandok, ‘Etongon ma Ia songon sada halak parjahat.’ Angke sanga aha na tarsurat di Buku Na Badia i taringot tu Au, saonnari ma tarjadi.”

LUKAS 23:25

Jana dipalua si Latus ma bayo na nipangido ni halahi i, i ma bayo na tarhurung hara ni na mambaen gaor dohot hara ni na mamunu. Dung i dipasahat si Latus ma Jesus tu halahi anso dibaen halahi roha-rohana tuSia.

BAENON NI ANGKA RASUL 26:18

mangungkap parnidaan ni halahi anso morot halahi sian hagolapan jana masuk tu na torang; anso malua halahi sian gomgoman ni Sibolis gabe dirajai Debata halahi. Jadi dung porsaya halahi tu Au, niampunan ma sude dosa ni halahi jana gabe anggota na tarpili ma halahi songon halak ni Debata.’ ”

SURAT NI SI PAULUS TU PARLAGUTAN ROM 8:34

Ise dope na tarbaen manguhumi hita? Kristus Jesus do mangondihon hita! Ia ma na dung mate, lobi sian i dope, Ia ma na dung dipangolu mangulahi sian hamatean jana di siamun ni Debata do Ia maringanan.

2 KORINTUS 5:21

Nada mardosa Kristus i, hape gabe dosa do Ia dibaen Debata jana dipaporsankon do tuSia dosanta i, anso tajagit hatigoran ni Debata hara ni hasadaonta dohot Kristus i.

PILIPPI 2:17

Betak na angkon dohot dope haulkononku pamatangkon pasanggamkon haul na ni haulkonmunu i di bagasan haporsayaanmunu na gok tu Debata. Muda pe angkon songon i, mandok tarimakasi do au tu Debata hara ni i jana dohot ma au marjop ni roha rap dohot hamu.

KOLOSSE 2:15

Sude angka tondi na mamarenta dohot na markuaso gabe gale noma di parsilang ni Kristus i. Gabe sitontonan ni halak na bahat noma halahi dibaen, di na niiring ni Kristus halahi songon halak na tartaban di uduran ni hamonanganNia.

TITUS 2:14

Madung dihaulkon Ia diriNia hara ni hita laho paluahon hita sian hajahatan sudena, jana dibaen Ia hita gabe bangso hapunjunganNia, jana na ringgas mambaen na denggan.

IBRANI 12:2

Tu Jesus ma tatatap, na manogu-nogu hita di bagasan haporsayaan, jana na maroban haporsayaanta i tu hasanggaman. Ditaonkon Ia do mate di hayu parsilang gonti ni jop ni roha na dung diparade diSia, jana juguk do Ia nuaeng di siamun ni habangsa ni Debata.

IBRANI 7:25

Jadi hara ni i sanga andigan pe tarbaen Jesus do paluahon sanga ise halak na ro tu Debata markite-hite Ia. Tarbaen Jesus pe songon i hara ni na mangolu do Ia sapanjangna laho pasahatkon tu Debata angka pangidoan ni halahi.

IBRANI 9:24

Harana anggo Bilik Na Sun Badia na nipature ni jolma i hum na manggambarkon Inganan Na Badia na satutuna i do i. Banua Ginjang i do na nimasuhan ni Kristus; disi ma Ia saonnari mangadop tu Debata laho manyarihon hita.

IBRANI 9:26

Harana muda songon i do, gabe marpupu do Ia manaon parkancitan mamungka sian dung ditompa portibi on. Hape anggo satutuna, saonnari di hatiha na giot marujung on, hum sanoli sajo do Ia ro laho manyesa dosa markite-hite na mangalehen diriNa sandiri.

IBRANI 9:28

Laing songon i do Kristus i, hum sanoli sajo do Ia nihaulkon songon haul laho manyesa dosa ni bahat halak. Ro dope Ia nian paduanolihon tapi nada mamorsan dosa be; na giot paluahon angka jolma na paintehon haroroNia noma.

1 JOHANNES 2:1

Hamu angka dakdanakku! Hubaen surat on tu hamu, anso ulang mambaen dosa be hamu. Tapi muda adong na mambaen dosa, adong do di hita sada pangurupi di adopan ni Ama i, i ma Jesus Kristus na tigor i.

1 JOHANNES 2:12

Hubaen surat on tu hamu angka dakdanak, dibaen madung disesa dosamunu hara ni goarNia.