JESAYA 5:7 - BIBEL JAMITA NA DENGGAN

⁷ Satutuna bangso Israel do kobun anggur ni Tuhan Na Markuaso i; jana halak Juda ma bona ni anggur na nisuanNia i. Diarop Ia hasintongan, tapi na ro hum harorangan. Diarop Ia hatigoran, tapi na ro hum hajahatan.

JESAYA 5:7 ပူးပေါင်းရင်းမြစ်များ

PAMUNGKAAN 4:10

Jadi didok Tuhan ma, “Biasi angkon baenonmu pangalaho na jorbut i? Pio-pio do mudar ni anggimi sian tano i, songon sora na mangangguk mangido pamalosan.

2 SAMUEL 7:10

Boti muse, madung Huparade inganan di bangsongKu Israel jana Husuru halahi maringanan na hot disi, anso tarbaen halahi mangolu di bagasan sonang, nada adong na tarhapit.

JOB 34:28

Patunda ni halahi gabe holsoan angka na pogos, ditangihon Debata andung-andungna.

MASMUR 147:11

Lomo do roha ni Tuhan tu halak na burju, tu halak na tongtong mararop ni roha tu holongNia.

MASMUR 149:4

Jop do roha ni Tuhan di bangsoNia, halak na toruk marroha dilehen Ia hamonangan.

MASMUR 80:15

Ro ma Ho paluahon hami bangsoMon na songon bona ni anggur, i ma na nisuanMu sandiri.

HARURUAR 3:7

Dung i didok Debata ma, “Madung Huida parkancitan ni bangsongKu di Mesir. Madung Hubege angguk-angguk ni halahi mangido anso dipalua sian angka na mamparkanciti halahi. Olo! Madung Huboto pardangolan ni halahi.

PODA 21:13

Sanga ise na so ra manangihon holos ni halak na hurangan, nada diparrohahon be ia sandiri muda mangido partolongan.

PARJAMITA 4:1

Dung i huparrohahon muse ma sada hageduhan na masa di tano on. Martangisan angka halak na hona sosak jana nada adong na ra mangurupi halahi. Umpe sahalak na ra mangurupi, harana godang do kuaso ni angka na manyosak i.

ENDE NA GODANG 7:6

Jeges nai, jengkar nai ho, ale na lumobi ni haholongan sian sasude na nihalomohon.

JESAYA 1:21

Kota na burju najolo, saonnari gabe songon siboru jalang! Najolo burju halak kota i, hape anggo na adong saonnari hum sibunu jolma noma.

JESAYA 1:6

Sian ambubumu lalu tu palampak ni patmu umpe adong be pamatangmu na so hona nyae. Marlombaman sude pamatangmunu, marbosari jana mangkabugang. Nada dipaias sanga dibalut dope angka bugangmunu i. Nada muse diubati dohot miak.

JESAYA 27:2

Dokkonon ma di hatiha i, “Marende ma hamu taringot tu kobun anggur na jeges i.

JESAYA 3:14

Ro ma Tuhan songon panguhum maradopkon angka pamimpin ni bangsoNia. Songon on ma adu-adu ni Tuhan maradopkon halahi: “Ditangko hamu do suha ni angka kobun anggur, jana gok bagasmu dohot barang na nirampas sian halak na pogos.

JESAYA 3:15

Nada adong hakmu laho mamisat bangsongKu dohot mamoro halak na pogos. Au Tuhan Debata Na Markuaso madung mandok songon i.”

JESAYA 3:17

Hape uhumanKu noma halahi; sap ma uluna i rasa-rasaon lopus gabe palpalon.”

JESAYA 30:12

Tapi on ma na nidok ni Debata Na Badia ni Israel: “Dipasiding hamu do na Hudok jana dipangasahon hamu do gogo dohot gabus.

JESAYA 46:12

Tangihon ma Au, ale angka jolma na jogal, angka halak na dao sian hasintongan:

JESAYA 5:2

Dipangkur ia tanona i, jana diambungkon ia angka batuna. Disuan ia anggur pilian, dipajongjong ia palas-palas inganan ni panjagona. Dihali ia sada lubang, pamoroan ni anggurna, lalu dipaintesa malamun parbatuna, hape na ancom do dapotsa.

JESAYA 59:13

Madung mardosa hami jana mangalo maradopkon Ho, jana nada ra mangihutkon Ho. Madung hami parkanciti halak na asing jana marbalik hami sian Ho. Nada tutu be pikirannami, jana hatanami pe gabus noma.

JESAYA 59:14

Uhum na tigor madung tarsosak tu pudi jana hatigoran hami padao. Hajujuran nada digoarkon di jolo ni halak na bahat, jana bulus ni roha pe ditulak halak.

JESAYA 59:4

Nada adong na mangajuhon parkaro na maralasan na tutu, jana nada adong na manguhumi, dohot alasan na togu. Halak na mangasahon na so hasaya dohot gabus, halak na adong mara dohot manubuhon hajahatan.

JESAYA 62:5

Songon sada doli-doli na mambuat boru na bujing, songon i ma na manompa ho giot marripehon ho. Songon pangoli na marjop ni roha tu na nibuatnia, songon i ma sonang ni roha ni Debata mida ho.

JEREMIA 12:10

Bahat do parkuaso na leban na dung mangagohon kobun anggurKu dohot na mandegei angka padangKu. Madung diuba halahi luatKu na jeges i gabe padang halongonan na lungun.

JEREMIA 24:2

Karanjang na sada marisi batu ni ara na jeges-jeges, songon patumonaan ni batu ni ara, tapi anggo karanjang na sada nari marisi batu ni ara na busuk-busuk do, gabe nada tarpangan.

JEREMIA 50:46

Muda madabu Babel, tarbege ma hagaoron na lobi gogo jabat humutur portibi on; begeon ni angka bangso na asing ma angguk ni halahi.”

JEHESKIEL 22:29

Mangicu dohot manangko do angka halak na kayo. Roha-roha ni halahi sajo do dibaen halahi tu halak na pogos jana mambuat untung do halahi sian halak sileban.

HOSEA 10:1

Tudos tu bona ni anggur na ramos marbatu do Israel. Mur martamba-tamba sinadonganna, mur bahat angka langgatan na nibaenna. Mur tamba denggan tano i, mur jeges muse dibaensa angka tugu ni gana-ganaan na nisombana i.

MIKA 6:12

Angka halak na mora di hutamu mamoroi do sian halak na pogos, jana pargabus do hamu sudena.

MIKA 6:8

Nada! Madung dipaboa Tuhan tu hita sanga aha na denggan. Anggo na nipangido ni rohaNia sian hita, i ma anso tigor pambaenanta, tadalankon ma holong ni roha, jana mangoku di bagasan toruk ni roha di jolo ni Debatanta.

HABAKUK 1:3

Biasi dipadiar Ho au paida-ida hajahatan na songon i bahat? Tahan dehe Ho lakna paida-ida songon i bahat ni pangalaosion? Sanga na di dia masa hasegoan, na mangasahon gogo, parbadaan dohot parsalisian.

ZEPANYA 3:17

Diondihon Tuhan Debatamunu na gogo i do hamu. Hara ni gogo ni kuasoNia, monang hamu. Marmoga-moga Tuhan jana marjop ni roha hara ni hamu, di bagasan holong ni rohaNa dilehen Ia di hamu ngolu na imbaru. Hara ni hamu marende ma Ia jana marjop ni roha hara ni hamu,

MATEUS 23:23

Marjaya ma hamu angka Siboto Surat dohot angka Parise! Pangalancap do hamu! Dilehen hamu do parpuluan ni pulungan ni bulung-bulung ni parmasak dohot silalat dohot jintan tu Tuhan. Hape anggo angka pangalaho na ummarga sian angka tona i, umpamana rupani: Hatigoran, asi ni roha, haburjuon, nada diterge hamu be. Angkon i do nian parjolo baenonmunu so pola mangkalupahon na asing-asing i muse.

LUKAS 18:7

Anggo sai pio-pio do bangso ni Debata arian dohot borngin tu Debata nada he belaon ni Debata muse parkaro ni bangsoNa i? Adong he dipalolot-lolot Ia laho manolong halahi?

JOHANNES 15:2

Diambungkon Ia do sude rantingKu na so marbatu; jana sude ranting na ramos dipaias Ia do anso mur ramos muse batuna.

PANGARATAION 15:9

Ulang jua hamu laho mangalehen injamon tusia, marhite alasan na dung donok taon hasesaan ni utang. Ulang paloas hamu pikiran na jahat sisongon i masuk tu bagasan rohamunu. Muda nada ra hamu mangalehen siinjamon i, pio-pio ma halakna i tu Tuhan laho mangaduhon hamu, jadi gabe dosa ma i di hamu.

JAKOBUS 5:4

Nada digarar hamu upa ni angka halak na markarejo di ladangmunu. Saonnari bege hamu ma hoi-hoi ni halahi! Angka halak na palagutkon suha ni ladangmunu, marsurak do halahi mangido tolong jana lalu do angguk ni halahi i tu simanangi ni Debata, Tuhan Na Markuaso i.