JESAYA 5:24 - BIBEL JAMITA NA DENGGAN

²⁴ Madung ditulakkon hamu pangajaran ni Tuhan Na Markuaso i, Debata Na Badia ni Israel. Hara ni i, songon durame dohot duhut na mahiang abis dipangan api, laing songon i muse ma angka urat-uratmunu gabe busuk, angka bungamunu pe malos ma i lalu abis diombuskon alogo.

JESAYA 5:24 ပူးပေါင်းရင်းမြစ်များ

2 RAJA-RAJA 19:22

Ise dehe lakna na niincahanmi? Au Debata ni Israel, Debata Na Badia, Au do na nipabilemi. Maginjangtu do rohamu maradopkon Au.

NEHEMIA 9:26

Hape mangalo do bangsoMi jana nada mangoloi tu Ho, uhumMu dohot aturanMu dipasiding do, dibunu do angka panurirang na paingotkon halahi, anso mulak tu Ho Debatana, nian halahi. O Tuhan, laing marpupu ma i Ho dipalayas halahi.

JOB 18:16

Sai songon urat na gariang sian toru; jana markarengkut dangkana sian ginjang.

JOB 8:17

Manjarampak mangalilit uratna i tu batu na di tano, gomos togu pangarahutna.

MASMUR 50:17

Nada ra ho manjagit sipaingotKu, jana ditulak ho do angka parentangKu.

HARURUAR 15:7

Marhite hatongamonMu na lumobi, dibalikkon Ho aloMu marpiar-piar hamuruhonMu, jana manutung halahi songon durame.

HARURUAR 5:12

Dung i mampar ma halak Israel i tu sude tano Mesir laho manjalahi durame.

JESAYA 1:31

Songon durame na puntung dibaen gurasa ni api, songon i muse ma angka halak na markuaso luntahon ni angka pambaenan ni halahi sandiri, jana nada adong na tarbaen mangantak haroroncona i.

JESAYA 1:4

Marjaya ma hamu bangso pardosa, angka halak na so ture jana na jahat pomparan ni angka parjahat, angka dakdanak na marparange na jat! Ditulak jana ditinggalkon halahi do Tuhan Na Sun Badia i, Debata ni Israel, jana manghudukkon Ia.

JESAYA 24:6

I ma dalanna umbaen diburai tano on jana diuhumi pangisina hara ni pangalaho ni halahi. Dipurun ma halahi jana hum saotik nari noma sian halahi na malua.

JESAYA 26:11

Ale Tuhan, di paherbang Ho do tanganMu, tapi nada diida halahi i; padiar ma maila halahi mida holong ni rohaMu di bangsoMi. Padiar ma marhancit halahi hara ni na hona uhum na niparadeMu di halahi.

JESAYA 30:12

Tapi on ma na nidok ni Debata Na Badia ni Israel: “Dipasiding hamu do na Hudok jana dipangasahon hamu do gogo dohot gabus.

JESAYA 30:9

Hara ni na sai mangalo halahi tu Debata, sai margabus, jana nada jungada ra manangihon pangajaran ni Tuhan.

JESAYA 47:14

Satutuna, songon durame na nitutung ni api do halahi, nada tarpalua halahi dirina sandiri. Milas ni apina nada na boti-boti, nada songon parsisuduan milas ni i.

JESAYA 7:9

Samaria i ma kota sabungan ni Efraim, anak ni si Remalya ma rajana. Muda nada porsaya hamu, bagi na bia pe nada martahan hamu.”

JESAYA 8:6

ning Ia ma, “Ditulak bangso on do aek na sonang na sian anak ni Batang aek Siloa, jana mar jop ni roha mida Raja Resin dohot anak ni si Remalya.

JESAYA 9:18

Songon api na gara mangankon ramba dohot potpot na marduri songon i do hajahatan ni bangso i. Songon parmosok ni harangan do pargarana i martimbual timusna i.

JESAYA 9:19

Muruk situtu Tuhan Na Markuaso i jana panguhumNa pe songon api na marsigorgor jana bangso i ma songon purunan siabiskononna. Umpe adong sahalak na maribo ni roha mida kahanggina.

JEREMIA 6:19

Parrohahon ma ale portibi! Nada ra bangsongKu manjagit pangajaranKu jana nada mangoloi tu Au. Hara ni angka tahi ni halahi, Huparo ma parmaraan tu halahi.

JEREMIA 8:9

Pailaon noma angka halak na pistar di tonga-tongamunu; mago ma roha ni halahi jana tarjorat. Nada ra halahi manangihon sipaingotKu; saonnari hapistaran aha dope na tading di halahi?

JEHESKIEL 15:6

Jadi hara ni i didok Tuhan Debata i ma, “Songon bona ni anggur na nibuat sian harangan jana ditutung, songon i muse ma giot baenonKu halak Jerusalem!

HOSEA 11:9

Nada uhumanKu ho di bagasan rimas ni rohangKu; nada ropukkononKu be Israel. Dibaen Debata do Au, nada jolma. Au Na Badia mandongani ho, jana nada muruhanKu be ho.”

HOSEA 5:12

I ma dalanna umbaen na giot roncohononKu bangso Israel jana abiskononKu halak Juda.

HOSEA 9:16

Songon suan-suanan na so marbatu, jana na mahiang uratna, tudos tusi do anggo Israel. Nada adong untunganna tapi haru pe adong dakdanak ni halahi, bunuonKu do angka dakdanak haholongan ni halahi i.”

JOEL 2:5

Muda mangalumpat-lumpat halahi di partoran, sorana i suman tu pargaruntang ni kareta di porang, jana songon parsesek ni api na marjilam-jilam, na manutung durame. Marbaris do halahi songon parangan na gogo-gogo, na dung hobas kehe marporang.

AMOS 2:4

Songon on ma didok Tuhan, “Hara ni na dung mardosa halak Juda marhite tolu hajahatan lopus tu opat hajahatan, nada tarikonKu be haputusanKi. Dilaosi halahi do angka parenta ni Tuhan, jana nada dimomosi halahi haputusanNia. Lilu do halahi dibaen angka debata na nisomba ni angka ompu ni halahi.

AMOS 2:9

Haru songon i pe ale bangsongKu, hara ni hamu do umbaen na Huabisi halak Amori na ginjang-ginjang i songon bona ni tusam dohot na gogo-gogo i songon bona ni sampinur.

NAHUM 1:10

Angke halahi pe angkon mago songon duri na marsijalin-jalinan, abis matutung songon durame na mahiang.

MALEAKI 4:1

Didok Tuhan Na Markuaso i ma, “Dapot do i arina, sude halak siginjang roha dohot na jahat surbuon ma i songon durame. Di ari i, abis ma halahi surbuon, jana nada adong be na tinggal sian halahi.

MATEUS 3:12

DitanganNia do anduri laho mamiari. PiaranNia ma emena i tu talobat, tapi anggo lapung tutungonNia ma tu api na so ra mintop.”

LUKAS 10:16

Dung i mandok hata ma Jesus tu angka siseanNia, “Angka halak na manangihon na nidokmunu sarupa do i tu na manangihon sanga aha na Hudok tusia. Halak na so ra manjagit hamu, laing na so ra manjagit Au do i. Jana halak na so ra manjagit Au, sarupa do i tu na so ra manjagit na marsuru Au.”

LUKAS 3:17

Madung rade Ia mamiari, laho paiaskon eme sian lapung. PalagutonNia ma eme tu talobat, tapi anggo lapungNa i tutungonNia ma tu api na so ra mintop!”

LUKAS 7:30

Tapi anggo halak Parise dohot angka Siboto Surat nada ra be halahi manjagit sangkap ni Debata tu halahi. Nada ra halahi dipandidihon si Johannes.

JOHANNES 12:48

Saulahon, adong do na manguhumi sanga ise na so ra manjagit Au jana na so ra patuluskon angka na Hudok. Jamita na Hupalalu i do na gabe panguhum maradopkon halahi di Ari Parpudi.

BAENON NI ANGKA RASUL 13:41

‘Tangkas ma parrohahon hamu, ale angka pangincahi! Homang ma rohamunu, lopus mate! Angke Hubaen do di hatiha on pangalaho na so tarhaporsayai hamu sandiri, haru pe adong halak na patorangkonsa tu hamu.’ ”

PANGARATAION 28:24

Songon gonti ni udan, diparo Debata ma udan abu dohot horsik lopus mate hamu sude.

1 TESSALONIKA 4:8

Hara ni i, sanga ise na manulak pangajaran on nada jolma be na nitulakna, tapi na manulak Debata na mangalehen TondiNa na badia i do tu hamu.

1 SAMUEL 15:23

Angke na mangalo tu Tuhan tudos tu na padalan aji do jahat ni i jana hatangkangon sarupa do jahat ni i tu na manyomba debata. Dibaen madung ditulakkon raja i parenta ni Tuhan, jadi Tuhan i pe madung manulakkon raja i songon sada raja.”

1 SAMUEL 15:26

Tapi dialusi si Samuel ma, “Nada ra au rap mulak dohot ho be. Na dung manggagai do raja i tu parenta ni Tuhan, jana Ia pe na dung ditulakNia do raja i songon raja ni Israel.”