JESAYA 27:12 - BIBEL JAMITA NA DENGGAN

¹² Di hatiha i, palaguton ni Tuhan ma bangsoNia i pasada-sada sian Batang aek Efrat lopus tu batas ni Mesir. SirangonNia ma halahi songon pamiari ni halak di eme sian lapungna.

JESAYA 27:12 ပူးပေါင်းရင်းမြစ်များ

PAMUNGKAAN 15:18

Laing di hatiha i ma dibaen Tuhan parjanjian dohot si Abram. Ninna Tuhan ma, “Marjanji ma Au laho mangalehen tano on sudena di pomparanmu, mamungka sian batas ni Luat Mesir lopus tu Batang aek Efrat,

1 RAJA-RAJA 8:65

Di Bagas Ni Debata i do dibaen si Salomo dohot sude halak Israel, Pesta Undung-undung Bulung Rata pitu ari honokna. Bahat situtu do bilangan ni halak na marlagut disi, sian luat saginjang ni Dalan Hamat di Utara, lalu tu parbalohan ni Mesir di Selatan.

NEHEMIA 1:9

Tapi muda mulak hami mangulahi tu Ho jana hami oloi parentaMu, jadi palagutonMu ma hami mangulahi na dung dipaserakMi haru pe hami di angka ujung ni portibi on. Dung i paulahonMu ma hami tu inganan na dung ditodoMi gabe inganan maribadat tu Ho.

MASMUR 68:22

Didok Tuhan, “Hamu bangsongKu, Huoban do musumu sian Basan, Huoban mangulahi halahi sian tandolan ni lautan,

MASMUR 72:8

Sian laut tu laut mur mabidang ma harajaanna sian Batang aek Efrat lalu tu ujung ni portibi.

JESAYA 17:6

Tarsongon zetun na abis diputik batuna, hum sada dua na tinggal di puncutna i jana adong sanga na piga di dangka na toruk-toruk, laing songon i ma di Israel, saotik sajo do halak na malua. Au, Tuhan, Debata ni Israel, madung mandokkon i.”

JESAYA 49:5

Saonnari songon on hata ni Tuhan, na manjadihon au mamungka sian bortian anso gabe naposoNa, laho paulakkon si Jakob tuSia, jana anso dipalagut Israel tuSia, hara ni i dipasangap ma au di jolo ni Tuhan, jana Debata ma gabe hagogoonku, didok Ia ma:

JESAYA 56:8

Madung marjanji Tuhan Debata na dung pataruhon Israel bangsoNa i mulak sian habuangan, obanonNia muse do angka bangso na asing anso marsada dohot halahi.

JEREMIA 3:14

“O hamu bangso na so setia, mulak ma hamu tu Au! Au do nampuna hamu. BuatonKu noma hamu, sahalak sian ganop kota, dua halak sian ganop partubu, jana obanonKu hamu mangulahi tu Dolok Sion.

JEREMIA 44:28

Hum piga-piga halak sajo noma na giot malua jana mulak tu Juda sian Mesir. Jadi idaon ni halahi ma sanga hata ni halahi do na tarjadi sanga na hatangKu.

JEHESKIEL 20:41

Dung Huoban hamu haruar sian angka luat inganan parserahanmunu, palagutonKu ma hamu jana jagitonKu ma sude haul situtungonmunu. Jadi gabe botoon ni sandok bangso ma Au do Tuhan.

JEHESKIEL 39:25

Didok Tuhan Debata i ma, “Tapi anggo saonnari haholonganKu noma halak Israel pomparan ni si Jakob i, jana baenonKu halahi sonang mangulahi. Jadi songon i ma Hubaen manjago anso laing tongtong dipasangap goarKu.

JEHESKIEL 47:19

Anggo batas sabola Hasundutan lopus tu Barat Daya, sian Tamar lalu tu mual Kades-Meriba, lalu tu Barat Laut na marbatas dohot Mesir lopus tu Laut Tonga.

AMOS 9:9

BaenonKu ma parenta jana piaranna ma bangso Israel songon pamiari ni halak di gandum di bagasan anduri. Laho pasidingkon sude na so marguna sian tonga-tonga ni halahi, hursuhonKu ma halahi di tonga-tonga ni angka bangso.

ZAKARIA 8:7

Songon on do hata ni Tuhan Na Markuaso, “Ligi ma, paluaonKu ma bangsongKi sian tano Habincaran dohot sian tano Hasundutan ni mata di ari,

LUKAS 15:4

“Ise dehe sian hamu nampunaan saratus biri-biri, jana muda mago sada sian i nada ditadingkon ia na sambilan pulu sambilan i jana kehe ia manjalahi na lilu i lopus dapot ia?

JOHANNES 10:16

Adong dope angka biri-biri na asing laing Au nampunasa, tapi nada sabara dohot angka biri-biri on. Halahi pe angkon obanonKu do jana laing tangihonon ni halahi do sorangKu. Sudena halahi angkon gabe sapunguan jana sada parmahan.”

JOHANNES 6:37

Sudena halak na dung dipasahat Damang tu Au, ro ma halahi tu Au. Nada tulahonKu, sanga ise pe na ro tu Au.

JOSUA 15:4

Sian i torus muse ma garis ni batas i tu Asmon, lalu manyoksok anak ni batang aek di parbatasan ni Mesir, dung i marujung ma di Laut Tonga. Songon i ma garis batas i sabola Selatan, luat ni Juda.