JESAYA 18:4 - BIBEL JAMITA NA DENGGAN

⁴ “Pohom do Au mangaligi sian ingananKu, nada marsora songon nambur di hatiha logo ni ari di sabion, songon pangkohom ni mataniari di arian.

JESAYA 18:4 ပူးပေါင်းရင်းမြစ်များ

2 SAMUEL 23:4

Songon mataniari bincar ia di andostorang di na mamungka langit marrara. Songon sondang ni mataniari do ia dung abis udan, mambaen duhut na mangarata marsilo-siloan.”

MASMUR 72:6

Sai songon udan na mijur di padang ma ia, songon udan potir na mambornoki tano.

PODA 19:12

Songon parngaur ni singa do parmuruk ni raja; tapi songon nambur tu suan-suanan do haburjuonna.

JESAYA 12:6

Suruhon ma sude halak na maringanan di Sion, marsurak jana marende marjop ni roha. Na marmulia situtu do Debata Na Badia ni Israel, maringanan di tonga-tonga ni bangsoNia do Ia.”

JESAYA 14:32

Aha ma ulaning alusta tu angka suruan na ro i sian Pilistin? Tadok ma tu halahi bahaso na dung dipauli Tuhan, Sion jana disi ma dapotan pangondian bangsoNia na marhancit.

JESAYA 18:7

Dapot do i hatihana, pasahaton ma angka silua somba-somba tu Tuhan Na Markuaso i sian luat na nibolus ni angka batang aek i, sian bangsona na gogo jana na markuaso i, sian angka halakna na ginjang godang jana na marhuling-huling na halus boti na nihabiaran di sude portibi on. Marroan ma halahi tu Dolok Sion, tu inganan parsombaan tu Tuhan Na Markuaso i.

JESAYA 26:19

Ale Tuhan bangsoMu na mate i mangolu ma mangulahi, angka bangke ni halahi ngot sanoli nari. Halak na dung ditanom di bagasan tano, ngot ma i jana marolop-olop. PangoluonMu ma bangsoMu na dung mate honok, songon ombun na pajagarkon tano.”

JESAYA 26:21

Na giot mijur ma Tuhan sian ingananNa di banua ginjang laho manguhumi pangisi ni tano on hara ni dosa ni halahi. PatorangonNa ma sude pamunuon na nibaen ni halahi di na buni. Nada tutup-tutupan ni tano i be angka na mate hona bunu i.

JESAYA 31:9

Maporus ma rajana i hara ni biarna, jana angka perwirana i tarsonggot situtu, gabe ditadingkon halahi noma mandera ni parporangan.” Madung didok Tuhan songon i, nampuna api na di Sion dohot tataring na di Jerusalem.

JESAYA 46:13

Madung donok Hubaen hasintongan i, nada dao be i, nada tarambatan be haluaanKu, paluaonKu ma halak di Sion, jana pataridaon hamuliaonKu tu halak Israel.”

JESAYA 57:15

Angke songon on do pandok ni Na Gumincat jana Na Marmulia na marhabangsa salolotna jana Na Sun Badia goarNa: “Di inganan na gincat jana badia do habangsangKu, tapi rap muse do dohot halak na magopu jana na toruk rohana, laho pangoluhon arop ni roha ni halak na toruk roha dohot laho pangoluhon roha ni halak na magopu.

HOSEA 14:5

“Na manyimbil sian bangsongKu, Hubuat mangulahi, jana sian sandok rohangKu Huhaholongi; jana nada muruhanKu be halahi.

HOSEA 5:15

Angkon kehe do Au mulak tu ingananKu, lopus mangoku sala halahi jana manjalahi Au. Di bagasan pardangolan ni halahi gabe malungun halahi tu Au.”

JOEL 3:17

“Ale Israel, saonnari botoonmunu, Au do Tuhan Debatamunu. Di Sion do Au maringanan i ma dolokKu Na Badia i. Gabe kota na badia noma Jerusalem, nada be taluhonon ni halak na asing kota i.

AMOS 3:7

Nada dibaen Tuhan Debata i sanga na aha painte so dipabotohon Ia sangkap na nibaenNia tu angka panurirang, naposoNia.