JESAYA 11:9 - BIBEL JAMITA NA DENGGAN

⁹ Di sude dolokKu na badia, nada adong na jahat sanga pe mara, gok parbinotoan taringot tu Tuhan ma angka luat, songon aek na manggohi dano mangalantap.

JESAYA 11:9 ပူးပေါင်းရင်းမြစ်များ

JOB 5:23

Nada marbatu ladang na ni pangkurmu, binatang riar pe nada manjombai dirimu.

MASMUR 72:19

Tarpuji ma goarNia na godang i sapanjangna; sai gok ma tano on dohot hamuliaanNia! Sai tulus ma songon i! Amen!

MASMUR 78:54

Jadi dioban Ia ma bangsoNia tu tanoNa na badia tu pardolohan na nirampasNia.

JESAYA 11:13

Nada be mangiburu harajaan Israel mida Juda, jana Juda pe nada be musuanna Israel.

JESAYA 11:8

Salangkan anak na baru sorang pe nada mahua haru pe marmayami di lambung ni ulok na bisa.

JESAYA 2:4

Angkon gabe panguhum do Ia ditonga-tonga ni angka bangso jana gabe juri tu marga ni bahat bangso; anso ditopa halahi ma angka podangna gabe mata ni bajak jana angka tombakna manjadi piso cukur; nasa bangso nada be mangangkat podang maralohon bangso, jana nada be marsiajar marporang halahi.

JESAYA 30:26

Marsinondang ma bulan i songon torang ni mataniari, jana mataniari i tumorang pitu noli sian na somal, songon torang ni pitu ari dipasada. Tarjadi ma sudena i di na ro Tuhan mambalut dohot pamalumkon angka bugang ni bangsoNia na nisambokNia i.

JESAYA 32:16

Di padang parhorsihan pe marlaku ma hasintongan, di kobun pe marlaku ma hatigoran.

JESAYA 33:6

jana lehenonNia ma hasonangan tu bangso i. Sai na ondihononNia do bangsoNa jana baenonNia halahi marbisuk dohot marbinoto. Pasangapon ni halahi ma Tuhan; i noma arta ni Sion.

JESAYA 35:9

Nada ra adong singa disi, panyoro pe nada dalananna i. Angka halak na nipalua mamolus laho mulak sian dalan i.

JESAYA 45:6

Sudena i Hupatupa anso sian Habincaran lopus tu Hasundutan sude halak umboto Au do Tuhan, asing sian Au nada adong Debata.

JESAYA 49:6

“Pamenek tu ma ho muda hum gabe naposongKu, laho pajongjongkon marga-marga ni Jakob, laho paulakkon halak Israel na tading i. Tapi baenonKu ma ho gabe sinondang di angka bangso anso haluaan na sian Au lalu tu ujung ni tano on.”

JESAYA 52:10

Patuduhonon ni Tuhan ma tanganNia na badia i di adopan ni sandok bangso, jadi sandok ujung ni portibi manyaksihon na ro Tuhan paluahon.

JESAYA 54:5

Harana na gabe halaklahimu i ma Ia Na Manompa ho, Tuhan Na Markuaso do goarNia; na gabe Sipaluamu i ma Na Sun Badia, Debata ni Israel, nigoaran do Ia, Debata ni sandok portibi.

JESAYA 56:7

“BoanonKu ma hamu tu dolokKu na badia i, lehenonKu jop ni roha di hamu di bagas paribadatanKu. JagitonKu angka haul na nihaulkonmunu di langgatanKu. Goaran ma bagasKu bagas partangiangan ni sandok bangso.”

JESAYA 59:19

Sian Habincaran lalu tu Hasundutan mabiar be noma halak mida Ia hara ni godang ni kuasoNia. Ro ma Ia songon batang aek na doras sanga songon alogo na gogo.

JESAYA 65:25

Rap manjampal ma sorigala dohot anak ni biri-biri, singa pe mangan durame songon lombu, jana ulok pe mangolu sian abu. Di sude dolokKu Na Badia i nada adong be na mangarugi i, sanga mambaen na jahat,” ninna Tuhan.

JESAYA 66:18

Huboto do pikiran dohot parbuatan ni halahi. Ro Au laho paluhutkon angka jolma sian sandok bangso. Muda marlagut halahi, idaon ni halahi ma kuasongKu

JESAYA 66:20

Sian angka luat i obanon ni halahi ma mulak angka kahanggimu sabangso songon silua di Au. Obanon ni halahi ma angka jolma i tu dolokKu na Badia di Jerusalem mangalombut kudo, halode dohot unto, dohot na markareta maradu dohot na marpadati; songon na somal halak Israel maroban tu Bagas Ni Tuhan haul gandum di bagasan inganananna na ias.

JEREMIA 31:23

Didok Tuhan Na Markuaso i, Debata ni Israel, “Muda dung Huoban bangsongKu mangulahi tu tano ni halahi sandiri, tarbege muse ma di tano Juda dohot di angka kotana i dokkonon ni halak, ‘Sai dipasupasu Tuhan ma da, ho ale inganan hasintongan ho ale dolok na badia!’

JEREMIA 31:34

Sahalak pe sian halahi nada porlu be mangajari donganna laho mananda Tuhan. Angke sude halahi, na menek sanga na magodang, tandaonna ma Au. HalupahononKu ma angka hasalaan ni halahi, jana Huampuni angka dosa ni halahi. Au Tuhan, madung mandok songon i.”

JEHESKIEL 34:25

BaenonKu ma parjanjian dohot halahi na manjamin aman halahi. PaorotonKu ma sude binatang panyoro sian luat i sude, lopus aman angka biri-biringKi tinggal di padang-padang i dohot modom di harangan-harangan i.

JEHESKIEL 47:5

Sanoli nari disuhat ia ma lima ratus meter nari, jana mabagastu do disi aekna i anggo boluson mardalan pat. Muda giot taripar halak disi angkon marlange noma i.

DANIEL 11:45

Mur baenonnia muse ma benteng ni harajaannia na godang jana na gincat i di antara ni laut dohot Dolok Na Jeges na badia. Tapi mate do ia muse jana sahalak pe nada adong na mangurupi ia.”

DANIEL 12:4

Dung i didok surusuruan i muse ma tu au, “Daniel, tutup ma Buku i saonnari jana baen ma segelna anso tongtong tutup Buku i lopus tu hatiha na parpudi. Bahat do halak na giot manangkasi sanga aha na giot tarjadi. Tapi nada adong gunana karejo ni halahi i.”

HOSEA 2:18

BaenonKu noma di hatiha i parjanjian dohot ho, dohot sude angka binatang di padang, dohot angka unggas di awang-awang dohot angka binatang na adong di tano on.

JOEL 3:17

“Ale Israel, saonnari botoonmunu, Au do Tuhan Debatamunu. Di Sion do Au maringanan i ma dolokKu Na Badia i. Gabe kota na badia noma Jerusalem, nada be taluhonon ni halak na asing kota i.

HABAKUK 2:14

Tapi songon laut na nigohan ni aek, laing songon i muse ma portibi on digohi dohot parbinotoan taringot tu hamuliaon ni Tuhan.

ZAKARIA 14:9

Jadi mamarenta ma Tuhan gabe raja di sandok portibi on; sombaon ni ganop jolma ma Ia songon Debatana jana tandaon ni halahi ma Ia di bagasan goar na sarupa.

ZAKARIA 8:3

Songon on do hata ni Tuhan Na Markuaso i, “Mulak noma Au tu Jerusalem tu kotangKu na badia i, jana maringanan ma Au disi. Tarbarita ma Jerusalem songon kota na tigor jana goaron ma Dolok Ni Tuhan Na Markuaso i, Dolok Na Badia.”

1 TESSALONIKA 5:15

Jagohon hamu ma anso ulang adong sanga ise na mambaloskon hajahatan dohot hajahatan. Usahohon hamu ma anso tarbaen hamu na denggan sama hamu bope tu halak sudena.

HALUMBAAN 21:27

Tapi sanga ise halak na mangkarejohon angka pangalaho sihailahononkon, dohot angka pargabus, nada dipatola masuk tu bagasan – pendekna sandok na hodar, nada tola dioban masuk tu bagasan. Anggo na dipatola masuk tu bagasan, hum angka halak na tarsurat do goarna di bagasan buku hangoluan ni Anak Ni Biri-biri i.