JESAYA 11:4 - BIBEL JAMITA NA DENGGAN

⁴ Markite-hite hatigoran do ditimbang ia parkaro ni halak na pogos; diondihon ia hak ni halak na gale lopus dapot, halak parsala diuhumi hara ni parentania, halak na jahat dipusa ia.

JESAYA 11:4 ပူးပေါင်းရင်းမြစ်များ

2 SAMUEL 8:15

Songon i ma si Daud mamarenta di sude Israel jana dijago ia do rayatnia i anso sai dipatupa na tigor dohot na denggan tu halahi.

JOB 15:30

Nada tarbaen malua ia sian golap bulita; panganon ni api sude angka tunasna. Mago noma ia, baenon ni pangombus ni hosa ni Debata.

JOB 4:9

‘Songon haba-haba na gogo i do Debata; mangabisi halahi lopus soada!’

MASMUR 110:2

Sian Sion pabidangon ni Tuhan ma harajaanmu, markuaso ma ho di tonga-tonga ni angka musumu.

MASMUR 18:8

Haruar timus sian lubang ni igungNa, api dohot banggar haruar sian pamanganNa.

MASMUR 2:9

Mardongan tungkot bosi tipulkononmu halahi songon hudon tano ropukonmu halahi.’ ”

MASMUR 76:10

Rimas ni jolma gabe pujian do i di Ho jana na debanari i gabe hauntunganMu dipake Ho.

JESAYA 1:17

marsiajar ma hamu mambaen na denggan. Gogohon hamu ma anso tulus mardalan hatigoran – urupi ma halak na hona hapit; pasahat ma tu na so marama so marina na patut bagianna jana ondihon hamu ma angka na mabalu.”

JESAYA 13:11

“ParoonKu ma mara tu portibi on jana uhumanKu ma sude halak na jahat hara ni angka dosa ni halahi. Sanga ise siginjang roha Hupatutoru, halak na gakgak dohot na kejam uhumonKu.

JESAYA 14:30

Haru na umpogos sian bangsongKu maduma sipanganon, jana angka halak na pogos sonang ma mangolu. Tapi masa ma haleon potir tu halak Pilistin, gabe mate ma halahi sude.

JESAYA 16:5

Dung i gabe raja ma sada sian pomparan ni si Daud, jana parentaonnia ma bangsonia marhite holong dohot burju ni rohana. Pajongjongonnia ma hatigoran jana ompotannia noma mambaen tindakan laho mambaen na tigor.)

JESAYA 2:4

Angkon gabe panguhum do Ia ditonga-tonga ni angka bangso jana gabe juri tu marga ni bahat bangso; anso ditopa halahi ma angka podangna gabe mata ni bajak jana angka tombakna manjadi piso cukur; nasa bangso nada be mangangkat podang maralohon bangso, jana nada be marsiajar marporang halahi.

JESAYA 26:6

Angka na pogos jana na dangol i ma mandege-degesa.

JESAYA 29:19

Angka halak na pogos jana na lebak hilalaonna ma hatuaan na nilehen ni Tuhan, Debata Na Badia ni Israel.

JESAYA 3:14

Ro ma Tuhan songon panguhum maradopkon angka pamimpin ni bangsoNia. Songon on ma adu-adu ni Tuhan maradopkon halahi: “Ditangko hamu do suha ni angka kobun anggur, jana gok bagasmu dohot barang na nirampas sian halak na pogos.

JESAYA 30:28

Pangombus ni hosaNia songon batang aek na mangayupkon. Abis ma angka bangso, jana marujung muse ma angka sangkap ni halahi na jat i.

JESAYA 30:31

Tarsonggot ma halak Asur muda dibege halahi sora ni Tuhan jana taraso ma panguhumiNia na borat i.

JESAYA 30:33

Mamungka sian narobi na dung diparade hian do api baen panutung ni raja Asur. Bagas jana lumbang do inganan i na marisi soban martinggang-tinggang. Ombuskonon ni Tuhan ma hosaNia laho pagarahon api i.

JESAYA 32:1

Di sada hatiha, na giot ro, adong ma sada raja na adil mamarenta, jana angka pamimpin ni bangso i pe mandalankon hatigoran.

JESAYA 32:7

Na jahat do halak na bodo i jana sai matua mambaen na jahat do i. Diakalkon ia do i laho mangago halak na pogos marhite gabus dohot na mangambatisa manjagit aturan bagianna humani.

JESAYA 33:22

Sandok perlengkapan na di parau ni halahi i, nada marguna sudena i; nada tarpahirbang angka layarna i! Rampasanta ma sude sinadongan ni musunta, jana hara ni bahatna salang halak na lumpuon pe dapot bagian. Tuhan i sandiri noma na gabe rajanta; mamarenta ma Ia tu hita jana paluaonNia ma hita sian musunta.

JESAYA 40:7

Mahiang ma duhut i jana malos ma bunga i, di na niombuskon ni Tuhan alogo i. Anggo bangso i do satutuna hum songon duhut sajo do.

JESAYA 49:2

Pamanganku dibaen Ia songon tajom ni podang, tanganNia mangalehen di au parlindungan. Dibaen do au songon anak ni pana, nisimpan di tabung jana marlinang tajomna.

JESAYA 61:1

Dirajai Tondi Ni Tuhan Debata i ma au; dipili jana disuru Ia au, laho maroban jamita na denggan tu halak na pogos dohot na lebak, jana pamalumkon halak na magopu rohana; laho pabotohon tu halak tahanan paboa na tibu noma halahi dapotan haluaan, dohot tu angka jolma na di hurungan bahaso halahi na dung mardeka.

JESAYA 9:7

Mur tu godangna do kuasonia, jana tongtong dame harajaannia. Ia ma raja na songon panggonti ni si Daud, marojakan tu hatigoran dohot hasintongan do harajaannia sian mulai saonnari lalu tu salolotna. Angkon tulus sudena i baenon ni Tuhan Na Markuaso i.

JEREMIA 33:15

Anggo di hatiha i pilionKu ma sada raja na tigor sian pomparan ni si Daud. Padalanon ni raja i ma hatigoran dohot na sintong di sude luat.

JEREMIA 5:28

boti mamokmok be jana maduma. Nada marbolat hajahatan ni halahi. Disoadahon halahi do hak ni na so marama so marina, jana nada diondihon halahi angka halak na hona sosak.

HOSEA 6:5

Hara ni i do umbaen na Husuru angka panurirangKu laho palaluhon tu hamu haputusanKu na mandok angkon uhumon jana abiskonon noma hamu. Torang jana tangkas do na nipangido ni rohangKu sian hamu:

ZEPANYA 2:3

Jalahi ma Tuhan, ale hamu angka na toruk roha di luat on, na mangoloi parentaNia; jalahi ma hatigoran, jalahi ma toruk ni roha; betak na adong dope di hamu parlinggoman di hatiha hamumuruk ni Tuhan.

MALEAKI 4:6

BaenonNia ma marpangulahi roha ni ama-ama tu angka anakna jana roha ni angka dakdanak tu amana, anso ulang ro Au mangkonahon uhum tu tano on gabe maronco.”

MATEUS 11:5

Marnida na mapitung, mardalan na onyangon, malum na huliton, marbinege na maingol, mulak mangolu na mate, dung i dipaboa do Jamita Na Denggan sian Debata tu halak na pogos.

MATEUS 5:5

Martua ma angka na lambok roha; dibaen teanon ni halahi do portibi on.

BAENON NI ANGKA RASUL 9:1

Tapi anggo si Saulus laing hosom dope rohania jana sai giot bunuonnia do angka anak sisean ni Tuhan. Kehe do ia tu Malim Godang,

2 KORINTUS 10:1

Saonnari, au si Paulus, hupaingot ma hamu markite-hite lambok ni roha dohot habasaron ni Kristus. Anggo ninna halak na parbiar do au di tonga-tongamunu taran marsuo bohi tu bohi, tapi puluk do au muda dao sian hamu. Antong, hara ni halambohon bope hadengganan ni roha ni Kristus,

GALATIA 5:23

martoruk ni roha jana tarrajaisa dirina. Nada adong uhum na mangalo angka aturan i.

2 TESSALONIKA 2:8

disi pe anso tarida Jolma Na Jahat i. Jadi bunuon ni Tuhan Jesus ma Jolma Na Jahat i dohot hosa na sian pamangan ni Tuhan Jesus sandiri. Jana roncohononNia ma i dohot sinondang ni haroroNia.

TITUS 3:2

Dok tu halahi anso ulang adong na manilakoi sanga ise pe, tapi gumonan ma halahi basar jana burju. Marlambok ni roha ma halahi maradopkon halak sudena.

JAKOBUS 3:13

Muda adong do sian hamu na marroha jana na burju, dipatuduhon ia ma i dohot ngolu na denggan bope dohot pambaenan na denggan mardongan hatoruhon ni roha dohot habisuhon.

HALUMBAAN 1:16

Ditiop tangan siamunna i ma pitu bintang jana ruar ma sada podang na tajom sidua baba sian pamanganNa i. BohiNa i torang songon sinondang ni mataniari di hatiha hamilasanna.

HALUMBAAN 19:11

Dung i huida ma mungkap banua ginjang, haruar ma sada kudo na bontar, jana na juguk di ginjangna i margoar, “Na Setia dohot Na Sintong,” jana markite-hite hatigoran do Ia manguhumi dohot marporang.

HALUMBAAN 19:15

Ruar ma sian pamanganNia i sada podang na tajom, jana podang i ma baenonNia manaluhon angka bangso jana parentaonNia ma halahi dohot tungkot bosi. PoroonNia ma anggur di panggilingan ni anggur haririmas ni Debata Parkuaso Na Sumurung i.

HALUMBAAN 2:16

Antong, pauba hamu ma rohamunu sian angka dosamunu i! Muda inda songon i, ro ma Au santongkin nari mandapotkon hamu jana poranganKu ma angka halakna i dohot podang na di pamanganKon.