JESAYA 10:22 - BIBEL JAMITA NA DENGGAN

²² Haru pe halak Israel na saonnari sarupa bahatna dohot horsik na di topi ni laut, hum piga-piga halak sajo noma i na giot mulak. Madung disadiahon Tuhan uhuman pangabiskon halahi anso jongjong hatigoran.

JESAYA 10:22 ပူးပေါင်းရင်းမြစ်များ

PAMUNGKAAN 18:25

Pasti do na so ra Ho mamunu angka halak na so marsala i rap dohot na marsala. Inda masuk di akal! Inda mungkin ra Ho mambaen songon i. Sugari sura dibaen Ho songon i, gabe sarupama angka halak na so marsala dohot na marsala. Hape nian matua na tigor do anggo Panguhum ni sandok na adong.”

1 RAJA-RAJA 4:20

Songon bahat ni horsik na di topi ni laut do bahat ni rayat ni Juda dohot Israel. Sonang do ngolu ni halahi, jana marlobi-lobi sipanganon dohot siinumon.

2 RAJA-RAJA 19:31

Adong ma angka jolma na malua di Jerusalem dohot di ginjang ni Dolok Sion, angke madung ditontuhon Tuhan anso tarjadi songon i.”

JESAYA 37:31

Halak Juda na laing mangolu i sonang noma halahi songon suan-suanan na marurat bagas sajo tu tano jana na marbatu.

JESAYA 46:3

Ale pomparan ni si Jakob, tangihon ma Au, hamu sude na malua sian tonga-tonga ni bangsongKu. Mamungka sian bortian, Hutuhuk hamu; mamungka sorang, Huhunti hamu.

JESAYA 48:19

Angke pomparanmu angkon songon horsik, jana turunanmu songon horsik bahatna; goar ni halahi nada diagohon sanga diparsoada sian jolongKu.”

JESAYA 59:20

Didok Tuhan ma tu bangsoNia, “Ro noma Au tu Sion laho mangondihon dohot paluahon hamu sude na paubahon roha sian angka dosamunu.

JESAYA 6:11

Marsapa ma au, “Sadia honok ma na songon on ale Tuhan?” AlusNia, “Lopus gabe tinggal sego-segona sajo angka kota jana mamolngit, lopus nada diingani be angka bagas, lopus rumar tano i jana nada tubuan sanga aha.

JESAYA 6:13

Salang sugari adong saparsampulu halak nari sian bangso na tading di luat i, i pe angkon dimatehon. Angkon songon hayu baringin na di taba halahi, hum tungkona noma tinggal. Sian tungko i ma muse ruar tunas, na badia.”

JESAYA 60:22

Salang ripe na menek jana na bile, gabe godang ma jana markuaso. Au ma da Tuhan; manigor baenonKu ma tindakan, muda dung dapot hatiha na tumbuk.”

JESAYA 65:8

Songon on do pandok ni Tuhan, “Nada ambungkonon batu ni anggur na maraek dope, tapi dibaen do gabe i aek ni anggur. Songon i muse do bangsongKu, nada pasidungonKu. PaluaonKu do sanga ise na mangoloi Au.”

JESAYA 8:8

Masuhan ni halahi ma Juda songon aek magodang na mangalantap jabat liput abara jana mambaen bonom sasudena; jana habongna na mangirbang i ma manutupi sude luatmu; ale Immanuel!”

JEREMIA 3:14

“O hamu bangso na so setia, mulak ma hamu tu Au! Au do nampuna hamu. BuatonKu noma hamu, sahalak sian ganop kota, dua halak sian ganop partubu, jana obanonKu hamu mangulahi tu Dolok Sion.

JEREMIA 44:28

Hum piga-piga halak sajo noma na giot malua jana mulak tu Juda sian Mesir. Jadi idaon ni halahi ma sanga hata ni halahi do na tarjadi sanga na hatangKu.

DANIEL 9:27

Baenon ni raja i ma parjanjian na togu dohot bahat jolma pitu taon honokna. Di Parsitongaan ni hatiha i antahonnia ma na mambaen pelean dohot haul. Dung i Hajahatan Na Manyegohon baenonna ma maringanan di Bagas Ni Tuhan jana sai tongtong ma i disi lopus didondoni hamamago na mambaen ia tusi, i ma hamamago na nitontuhon ni Debata disia.”

HOSEA 1:10

Gabe sabahat ni horsik na di topi ni laut bahat ni bangso Israel lopus nada habilangan. Saonnari didok Debata ma tu halahi, “Nada bangsongKu hamu,” tapi dapot do i hatihana dohononNia tu halahi, “Au ma da Debata na mangolu jana hamu angka dakdanakKu!”

BAENON NI ANGKA RASUL 17:31

Harana na dung ditontuhon Ia hian do sada hatiha laho manguhumi portibi on sudena mangihutkon hatigoran. Pasahaton ni Debata ma karejo i tu sada halak na dung nipiliNia tusi. Jadi anso pos roha ni halak sudena taringot tusi, madung dipangolu Debata do Ia mangulahi sian hamatean!” ning si Paulus.

SURAT NI SI PAULUS TU PARLAGUTAN ROM 2:5

Tapi hara ni jogal ni rohamu na so ra muba, ditamba ho do rimas tu dirimu sandiri di ari haririmas dohot hapataran ni uhuman ni Debata na tigor i.

HALUMBAAN 20:8

jana kehe ma i giot paoto-otohon angka bangso na marserak di sude portibi on, i ma si Gog dohot si Magog. Nada taretong sanga na sadia bahat ni halahi na giot palaguton ni Sibolis i laho marporang.