JEREMIA 8:9 - BIBEL JAMITA NA DENGGAN

⁹ Pailaon noma angka halak na pistar di tonga-tongamunu; mago ma roha ni halahi jana tarjorat. Nada ra halahi manangihon sipaingotKu; saonnari hapistaran aha dope na tading di halahi?

JEREMIA 8:9 ပူးပေါင်းရင်းမြစ်များ

2 RAJA-RAJA 17:15

Nada ra Israel dohot Juda mangoloi angka parenta ni Tuhan jana nada sintong halahi tu parjanjian na nibaenNia dohot ompu ni halahi. Nada ditangihon halahi muda digorahon Tuhan halahi, tapi marsomba tu gana-ganaan na so marguna do halahi, jadi halahi pe gabe nada marguna be. Mangihut tu tiruan ni angka bangso na humaliang i do halahi haru pe madung dilarang Tuhan.

JOB 5:12

Dipaudut ia sangkap ni halak na bisuk, tardapot, tartangkup dibaen ia halak na lingkas, gabe sundat sude tahi ni halahi, tarpaoto dalanna dibaen akalna sandiri.

MASMUR 19:7

Sanggam do Tona Ni Tuhan, pasonang rohaniba. Haposan do parenta ni Tuhan, mambaen marbisuk halak na lidang.

JESAYA 19:11

Na santak antong bodona angka pamimpin ni kota Zoan! Halak Mesir na umbisukna pe mangalehen sipaingot na lobi oto! Puluk ma da halahi mandok tu raja i paboahon na pomparan ni angka halak na marroha dohot raja-raja sian na robi halahi!

JESAYA 29:14

Hara ni i, baenonKu ma parkaro halongangon tu bangso i, halongangon na pahomangkon roha. Gabe maoto ma halak na marroha, jana nada marguna be hamaloan ni halahi.”

JESAYA 43:27

Ompumu na parjolo i pe madung mardosa, angka raja parhatamunu pe madung mangalaosi.

JESAYA 8:20

Songon on ma dok alusna, “Tangihon ma ajaran ni Tuhan! Ulang patangi-tangi datu. Nada adong guna ni na nidok ni halahi di ho.”

JEREMIA 15:6

Madung ditulak jana ditadingkon hamu Au, hara ni i Huondamkon botohonKu laho mangabisi hamu. Ma pola loja Au mangorom muruk ni rohangKu.

JEREMIA 19:7

SundatanKu ma di inganan on tahi ni halak Juda dohot Jerusalem. PadiaronKu ma halahi rumpak baenon ni podang ni musu, baenon ni tangan na giot mambuat hosa ni halahi. PadiaronKu ma bangke ni halahi dipapangani angka unggas na di langit dohot angka binatang na di tano on.

JEREMIA 2:8

Angka malim nada adong be na marsapa sanga di dia Au, Tuhanna. Angka na pajongjong uhum pe nada mamboto sanga ise Au. Angka na markuaso mangalo do tu Au. Mangasahon goar ni Baal mandok hata angka panurirang, jana marsomba gana-ganaan na so marguna i.”

JEREMIA 49:7

On ma na nidok ni Tuhan Na Markuaso salaho tu Amon, “Adong he na so tarbaen halak Edom be marpikir torang? Adong he na so dilehen angka panuturi ni halahi be sipaingot tu halahi?

JEREMIA 6:15

Angkon maila do nian halahi hara ni sude parbuatan ni halahi na jat i. Hape sihapal bohi do halahi jana na so umboto ila. Patunda ni i angkon gabe madabu do halahi songon halak na asing na dung madabu i; abis noma barita ni halahi muda jabat Au manguhum halahi. Au Tuhan, madung mandok songon i.”

JEREMIA 6:19

Parrohahon ma ale portibi! Nada ra bangsongKu manjagit pangajaranKu jana nada mangoloi tu Au. Hara ni angka tahi ni halahi, Huparo ma parmaraan tu halahi.

JEHESKIEL 7:26

Mardapot-dapot ma parmaraan dohot barita na jatjat marroan. Pangidoonmunu ma anso ro nian panurirang na giot paboa alatan, hape nada tarbaen halahi. Boti muse nada adong sanga aha di angka malim siajarkononnia tu bangso i, angka pamimpin pe madung abis sipaingot na nibotona.

AMOS 2:4

Songon on ma didok Tuhan, “Hara ni na dung mardosa halak Juda marhite tolu hajahatan lopus tu opat hajahatan, nada tarikonKu be haputusanKi. Dilaosi halahi do angka parenta ni Tuhan, jana nada dimomosi halahi haputusanNia. Lilu do halahi dibaen angka debata na nisomba ni angka ompu ni halahi.

ZAKARIA 13:4

Di hatiha i maila ma angka panurirang hara ni parnidaanna songon sada panurirang, nada adong be sian halahi na mamake baju juba na marimbulu giot margabus.

PANGARATAION 4:6

Patutna ma nian setia hamu patuluskon sude aturan i. Muda dibaen hamu songon i, nalnal ma abisuhonmunu maradopkon angka bangso na asing i. Muda dibege halahi taringot tu angka aturan i, dokkonon ni halahi ma, ‘Na bisuk jana na pistar ma da antong bangso na godang on!’

2 TIMOTEUS 3:15

Ingotonmu do, mamungka sian hamenehanmu dope madung ditanda ho Buku Na Badia i. Ditorangi Buku Na Badia i do rohamu laho mangastui anso maruli haluaan ho sian na mangkaporsayai Kristus Jesus.