JEREMIA 8:3 - BIBEL JAMITA NA DENGGAN

³ Jadi sanga ise halak na laing mangolu sian bangso na jahat na Husarsarkon on sun tu dia, gumonan noma dihilala halahi mate ulang pado mangolu. Au Tuhan Na Markuaso, madung mandok songon i.”

JEREMIA 8:3 ပူးပေါင်းရင်းမြစ်များ

1 RAJA-RAJA 19:4

jana kehe ma ia dalanan pat sadari daona tu parhorsihan jana maradian ma ia di toru ni hayu na rumbun. Juguk ma ia disi jana gumonan noma mate ning rohania. “Nada tahan au be on Tuhan,” ning ia tu Tuhan. “Buat ma da hosangkon, dumengganan noma au mate!”

JEREMIA 23:3

Tapi palagut-lagutonKu ma teba-teba ni bangsongKi sian angka luat inganan habuangan ni halahi. ObanonKu ma halahi mulak tu bona bulu ni halahi jana mur mabahat ma pomparan ni halahi.

JEREMIA 23:8

tapi marsumpa ma halahi mangasahon Au, Tuhan na mangolu na maroban halak Israel ruar sian luat na di Utara, dohot sian sude luat na asing inganan na Hubaen paserakkon halahi. Maringanan di bona buluna sandiri noma halahi.”

JEREMIA 29:14

Tutu do, dumpang hamu ma Au. Palagut-lagutonKu ma hamu sian tonga-tonga ni sandok bangso sian ganop luat inganan parserahanmunu dohot habuanganmunu. ObanonKu ma hamu tu tano asalmunu on jana pasuangonKu pangalahomunu. Au Tuhan, madung mandok songon i.’

JEREMIA 29:28

Angkon sumpolon do pamangan ni bayo i, harana didokkon ia honok dope angka halak hita na adong di Babel maringanan disi. Jana hara ni i, pandoknia, angkon pajongjongon ni halahi dope bagas lalu mambuka ladang dohot mandai suhana.”

JEREMIA 40:12

Jadi ditadingkon halahi be ma angka inganan parserahan ni halahi, kehe ma halahi tu Juda. Didapotkon halahi ma si Gedalya di Mispa, jana dipalagut halahi ma anggur dohot buah-buahan bahat sajo.

JEREMIA 44:2

On ma tona ni Tuhan Na Markuaso i, Debata ni Israel tu halahi, “Madung diida hamu sandiri mara na Hutimpalkon tu Jerusalem dohot sandok kota na adong di Juda. Lopus saonnari laing tinggal sego-segona do angka kota i jana lobu.

JEREMIA 44:6

Hara ni i duruskononKu ma rimasKu dohot hosom ni rohangKu tu angka kota ni Juda dohot tu angka dalan na di Jerusalem, surbuonKu sudena lopus gabe tiranggong jana mangornop songon na tarida saonnari on.

JEREMIA 6:9

Songon on ma hata ni Tuhan Na Markuaso i, “Jomputi ma teba-teba ni halak Israel, songon na mamutiki parbatu ni anggur. Ulahi ma mamutiki songon na mamutik turiangna.”

DANIEL 9:7

Ale Tuhan, sai tongtong denggan jana tigor do pambaenanMu, tapi anggo hami sai tongtong do mambaen tilako tu dirinami, i ma hami sude na maringanan di Juda dohot di Jerusalem maradu sude dongannami sabangso na nipaserakMu tu angka luat na dao dohot na donok hara ni na so unduk halahi tu Ho.

HAMALIMON 26:33

ParoonKu ma parporangan di luatmunu jana manyarsar hamu di luat na leban. Angka ladangmu gabe tarulang jana kotamu gabe abu.

AMOS 3:1

Tangihon hamu ma tona ni Tuhan on, ale bangso Israel na nioban ni Tuhan haruar sian Mesir. Didok Tuhan do,

JUNUS 4:3

Saonnari ale Tuhan, padiar ma mate au, angke gumonan noma au mate ulang pado mangolu.”

MIKA 2:3

Hara ni i didok Tuhan ma, “Marsangkap do Au laho parohon parmaraan godang tu hamu, anso ulang adong na malua sian hamu. Nada tarbaen be gakgak pardalanmu angke anggo hatiha i, i ma hatiha na marmara.

PANGARATAION 30:1

“Saonnari bolas ma pilionmunu pasupasu sanga bura. Muda dung tarjadi sudena i tu dirimunu, jana maringanan di tonga-tonga ni angka bangso na asing hamu di inganan parserahanmunu dibaen Tuhan, tarsingot ma hamu di sipilion na hulehen tu hamu.

PANGARATAION 30:4

Haru marserak pe hamu lalu tu ujung ni tano tu inganan na dumao pe, laing palaguton ni Tuhan Debatamunu do hamu jana buatonNia hamu mulak.

HALUMBAAN 6:16

Marsurak ma halahi tu angka dolok i dohot tu angka batu i, “Dondoni ma hami! Linggomi ma hami anso ulang hami ida bohi ni na juguk di habangsa i jana ulang hona muruk hami dibaen Anak Ni Biri-biri i!

HALUMBAAN 9:6

Anggo na lima bulan i maradu mate ma nian giot ni jolma i, hape nada tarbaen halahi mate; por roha ni halahi nian anso mate, hape dao do hamatean i sian halahi.