JEREMIA 7:24 - BIBEL JAMITA NA DENGGAN

²⁴ Hape nada ra halahi manangihon dohot mamparrohahonsa. Tubu-tubu ni roha ni halahi na pir boti na jat i sandiri do dipaihut-ihut halahi. Indada mur dumenggan halahi tapi mur tu jahatna noma.

JEREMIA 7:24 ပူးပေါင်းရင်းမြစ်များ

NEHEMIA 9:29

Digorahon do halahi anso mangoloi tu ajaranMu, tapi ditulakkon halahi do sian ginjang ni rohana uhumMu. Hape nian sugari dipatulus uhumMi, na pasti tarjamin do ngolu ni halahi. Sijogal rungkung do halahi jana na tangkang marroha, na so ra tumangihon, na sai manggaga.

MASMUR 81:13

Iale tehe, sugari sura ra bangsongKi manangihon hatangKu, sugari ra halahi mangoloi Au,

JEREMIA 13:10

Na jogal do roha ni bangso na jahat on jana na so ra do halahi mangoloi Au. Marsomba jana mangoloi angka debata na asing do halahi. Hara ni i ma halahi gabe songon bobat abit na so marguna i.

JEREMIA 13:11

Songon bobat abit na dialitkon gomos di gonting ni na mamakesa, songon i ma Hubaen pangalitkon ni halak Israel dohot Juda tu Au. Songon i ma dalanna halahi gabe bangsongKu na mambaen tarpuji jana marsangap goarKu. Hape nada ra halahi mangoloi Au.”

JEREMIA 15:6

Madung ditulak jana ditadingkon hamu Au, hara ni i Huondamkon botohonKu laho mangabisi hamu. Ma pola loja Au mangorom muruk ni rohangKu.

JEREMIA 16:12

Hape jumahat dope na nibaenmunu. Na jogal do rohamunu jana rohamunu na jahat i do diparrohahon hamu. Nada ra hamu mangoloi Au.

JEREMIA 17:23

Hape nada ra ompumunu i manangihon sanga mamparrohahon sanga aha na Hudok. Jogal do roha ni halahi jana nada ra mangoloi, boti na so targorahon.

JEREMIA 17:9

Nada tardodo anggo roha ni jolma umbisuk do i sian sasudena jana sun antong jahatna.

JEREMIA 18:10

hape nada mangoloi bangso i tu Au muse, lalu mambaen na jahat, sundatanKu do niet ni rohangKi.”

JEREMIA 18:12

Tapi alusan ni halahi ma, ‘Aha guna ni i? Aha sundatna muda giot sai tongtong hami ihutkon hagiotnami na jahat i?’ ”

JEREMIA 2:27

Pailaon do hamu, angke didok hamu do amangmunu samponggol hayu jana marpio inang hamu tu sada batu, lalu ditadingkon hamu Au. Hape muda ro hasusaan, dipangido hamu ma anso ro Au giot paluahon hamu.

JEREMIA 22:21

Madung Hudok hata tu ho taran denggan dope pangalaho na masa tu hamu, hape nada ra hamu manangihon. Songon i hian do antong pangalahomu sian najolo lopus saonnari; nada jungada ra hamu mangoloi Au.

JEREMIA 23:17

Tu angka halak na so ra manangihon hata na Hudok sai didokkon halahi do, ‘Malua do hamu.’ Jana tu ganop halak sijogal roha, didok halahi do, ‘Nada pola marmara ho.’ ”

JEREMIA 3:13

Sandok okui sajo ma paboa na marsala dohot na dung mangalo ho tu Tuhan, Debatamu. Okui ma na dung dipataridahon ho holong ni rohamu maradopkon debata ni angka bangso na asing di toru ni ganop hayu na rumbun, dohot na so dioloi ho angka na Huparentahon. Au, Tuhan, madung mandok songon i.”

JEREMIA 3:17

Goaron ma Jerusalem di hatiha i ‘Habangsa ni Tuhan’, jana marlagut ma di kota on sandok bangso laho manyomba Au. Nada be ihutkonon ni halahi giot-giot ni roha ni halahi na oto bope na jat i.

JEREMIA 32:23

Tapi di na ro halahi tu luat on lalu mangarampassa, nada marpangoloion halahi tu angka parentaMu, jana nada mangihutkon pangajaranMu parngoluon ni halahi; sude na niparentahonMu tu halahi sada pe nada adong didalankon halahi. Hara ni i, gabe diparo Ho ma sude parmaraan on tu halahi.

JEREMIA 32:33

Madung ditadingkon halahi Au jana haru pe Huajar halahi marpupu, nada ditangihon halahi i jana nada ra mangastui.

JEREMIA 35:15

Torus do marpupu Husuru naposongKu, sude angka panurirang tu hamu, jana madung dipaingot halahi hamu laho padenggankon pangalahomunu jana anso mantak hamu mambaen jahat. Dipaingot halahi do hamu anso ulang mamele tu angka debata jana anso ulang mangoloi tu halahi, anso tarbaen hamu torus maringanan di luat na dung Hulehen on tu hamu dohot tu ompumunu. Hape nada ra hamu mamparrohahon jana nada ra hamu manangihon.

JEREMIA 6:16

Didok Tuhan ma tu bangsoNia, “Jongjong ma hamu di angka sirpang ni dalan, jana tangkas pamanat hamu! Sapai hamu ma angka dalan narobi, jana dia na dumenggan sian i. Ihutkon hamu ma dalan i, anso sonang hamu di ngolu on.” Hape didok halahi do, “Nada ra hami mangihutkon dalan i!”

JEREMIA 7:26

Hape nada adong na manangihon sanga na mamparrohahon. Mur jumogal do rohamunu jana mur jumahat sian ompumunu.”

JEREMIA 8:5

Hape anggo hamu bangsongKu, biasi ditadingkon hamu Au, jana nada ra mulak tu Au? Ditulak hamu do Au jana togu hamu marsitiopan tu gana-ganaanmunu i!

JEREMIA 9:14

Jogal do roha ni halahi jana marsomba tu Baal do halahi songon na niajarkon ni angka ompu ni halahi.

JEHESKIEL 20:13

Hape di padang parhorsihan i, dialo halahi muse do Au. Dilaosi halahi do angka tona na sian Au na manjamin mangolu tongtong sanga ise na patuluskonsa. Gabe hodar jana ramun dibaen halahi Ari Sabat i. Hara ni i, di parhorsihan i madung nian hobas Au laho palalu murukKu tu halahi dohot mamusa halahi.

JEHESKIEL 20:16

Hubaen pe janji i hara ni na dipasiding ni halahi do angka parentangKu, dilaosi halahi angka tona na sian Au jana ramun dibaen halahi Ari Sabat. Gumonan do di halahi marsomba angka gana-ganaan ni halahi.

JEHESKIEL 20:21

Hape angka na umposo i pe manggagai do tu Au. Dilaosi halahi do angka tona na sian Au jana dipasiding halahi do parenta na sian Au, na manjamin tongtong mangolu sanga ise na mandalankonsa. Jadi hara ni i madung hobas Au laho palaluhon murukKu maradopkon halahi di parhorsihan i jana mamunu halahi sude.

JEHESKIEL 20:8

Tapi dialo halahi do Au jana nada ditangihon halahi. Nada ra halahi mangambungkon angka patung sihagigian i jana nada ra halahi mantak marsomba tu gana-ganaan ni Mesir i. Dompak disi dope halahi madung hobas Au palalu murukKu tu halahi.

DANIEL 9:6

Nada hami tangihon angka panurirang, angka naposoMi na mandok hata mangasahon goarMu tu angka rajanami, tu angka na markuaso, tu angka ompunami maradu tu sude bangsonami.

HOSEA 10:6

Obanon ma gana-ganaan i tu Asur anso dilehen gabe silua di raja godang i. Maila ma Israel jana marlayas hara ni na dohot mangihutkon gana-ganaan i.

HOSEA 4:16

Harana tangkang do Israel songon lombu na tangkang, giot bia ma he Tuhan marmahani halahi, songon biri-biri di tano lapang?

MIKA 6:16

Tarjadi pe sudena i patunda ni na niihutkonmunu ma angka parbuatan jahat na nibaen ni Raja Omri dohot Raja Ahab, anakna i. Diihutkon hamu do antong angka pangalaho ni halahi. Hara ni i roncohononKu ma hamu, jana siincahan dohot silayason ni sandok bangso ma hamu.”

ZAKARIA 7:11

Tapi nada diantureskon halahi jana mangalo, jana dipaingol do pinggolna anso ulang marbinege.

PANGARATAION 29:19

Ulang ma adong dison sahalak pe na umbege sadari on pangidoan na koras i hapengani di bagasan rohania laing pos do rohania marnasib na denggan ia tongtong haru pe manggogo ia manustus dalannia sandiri. Hara ni i angkon diabiskon ma sude na maraek dohot na mahiang.