JEREMIA 7:18 - BIBEL JAMITA NA DENGGAN

¹⁸ Dipalagut angka dakdanak do soban, halaklahi na magodang pagarahon api jana dadaboru mancampur adonan laho pature kue di debata boru-boru na nigoaran ni halahi Ratu Banua Ginjang. Jana na pahancit rohangKu dihaulkon halahi muse ma anggur tu angka debata.

JEREMIA 7:18 ပူးပေါင်းရင်းမြစ်များ

1 RAJA-RAJA 14:9

Hape anggo ho, angka dosa na gumodang sian na nibaen ni na mamarenta di jolomu di dipambaeni ho. Ditadingkon ho do Au jana disungguli ho murukKu di na nibaenmu gana-ganaan dohot angka patung sian logam baen sisombaon.

1 RAJA-RAJA 16:2

‘Nada sietongon hian ho na salpu i, tapi madung Huangkat ho gabe pamimpin ni bangsongKu Israel. Saonnari mardosai do ho songon si Jerobeam jana hara ni ho mardosa umatKi, mambaen gilap murukKu.

MASMUR 16:4

Halak na manyomba debata sileban parohon mara tu dirina sandiri. Nada ra au marhaul tu debata sileban, bope hum mandok goar ni halahi.

JESAYA 3:8

Satutuna, Jerusalem madung maronco, jana Juda pe madabu, harana hata dohot pambaenan ni halahi mangalo Tuhan jana mangalo hasangapan ni harajaanNa.

JESAYA 57:6

Dipalagut hamu angka batu na landit sian inganan i, lalu disomba hamu ma i. Diduruskon hamu anggur jana dipelehon hamu gandum tusi. Diambang hamu lakna sonang rohangKu mida i?

JESAYA 65:11

Tapi nada songon i anggo bagian ni angka halak na manadingkon Au, na so parduli di Sion, dolokKu na badia i, boti na marsomba tu Gad dohot Meni, i ma angka debata pardoharan dohot nasib.

JESAYA 65:3

Sai torus do halahi mambaen muruk Au. Hara ni na mamelehon haul di kobun tu angka debata jana manutungi hamonyan di angka langgatan na disi.

JEREMIA 1:16

UhumanKu ma bangsongKi patunda ni na mardosa halahi jana dihudukkon halahi Au. Dihaulkon halahi do antong haul tu angka debata na asing, jana dipambaeni halahi patung lalu disomba halahi.

JEREMIA 11:17

Au do na pajongjong Israel dohot Juda, Au Tuhan Na Markuaso tapi anggo saonnari madung Husangkapi laho parohon hamamago tu halahi. Halahi sandiri do mangalap-alapi sudena i, patunda ni hasalaan ni halahi; dihaulkon halahi haul tu Baal, hara ni i do umbaen na gabe muruk Au.”

JEREMIA 17:2

Marsomba angka halakmu di angka langgatan dohot angka tiang gana-ganaan na dipajongjong di Debata Boru-boru Asera, di sandok hayu na rumbun, di puncu ni angka dolok,

JEREMIA 19:13

Sude bagas na adong di Jerusalem dohot sude bagas ni angka raja ni Juda gabe hodar ma i songon Tofet; angke madung ditutung halak di ginjang ni ganop bagas i dupa tu angka debata langit, jana dipelehon anggur tu angka debata na asing.”

JEREMIA 25:7

Hape Tuhan i sandiri mandok na so ditangihon hamu do Ia. Mur dialap-alapi hamu muse do anso gilap murukNia hara ni angka gana-ganaanmunu i. Hamu sandiri do mangalap-alapi uhuman tu hamu.

JEREMIA 32:29

jana surbuonna lopus abis. Mosok muse ma angka bagas na gabe boncir ni hamumurukKu, harana di ginjang ni tarupna i ma ditutungi halak dupa tu Baal dohot manduruskon anggur baen pelean tu angka debata.

JEREMIA 44:4

Sai torus do marpupu Husuru naposongku angka panurirang, na mangorai hamu mambaen hajahatan na Huhagigihon i.

JEREMIA 7:17

Diida ho sandiri do parkarejoan ni halahi di angka kota na di Juda dohot di angka dalan na di Jerusalem!

ANDUNG 5:13

Doli-dolinami dipaksa karejo di kilangan, angka dakdanak halaklahi didondoni hayu boban lopus tarhatos.

JEHESKIEL 16:26

Mesir hombar balokmu na gogo marhamainan i, madung didongani ho modom marhamainan. Disangajo ho do marhamainan mangalap-alapi anso muruk Au.

JEHESKIEL 20:28

Huoban ma halahi tu tano na dung Hujanjihon tu halahi. Di na niida ni halahi angka dolok na gincat dohot angka hayu na rumbun, dipelehon halahi ma haul tu sude hayu dohot dolok i. Dialap-alapi halahi ma anso muruk au marhite angka haul situtungon dohot pelean anggur ni halahi i.

JEHESKIEL 8:16

Dioban Ia ma au tu alaman parbagasan di Bagas Ni Tuhan. Dilambung ni dalan laho masuk tu Bilik Na Badia i, di antara ni langgatan dohot dalan i adong disi dua pulu lima halak halaklahi. Dihudukkon halahi do Bilik Na Badia i, jana marsomba ma halahi adop Habincaran manyomba mataniari na bincar i.

JEHESKIEL 8:17

Didok Tuhan ma tu au, “Diida ho dehe i, ale jolma parsantongkinan? Nada puas dope pangkilalaan ni angka halak Juda on anggo hum angka pangalaho sihagigian i sajo dope dibaen halahi dohot mambaen tindakan na so mananda holong ni roha tu donganna jolma di sude luat i. Dipambaeni halahi do sudena i dison, di bagasan BagasKu jana i ma dalanna umbaen na mur gilap Huhilala. Ligi ma sanga na bia dibaen halahi palayas Au marhite pangalaho na jumorbut on!

1 KORINTUS 10:22

Anso mangiburu dehe lakna Tuhan baenonta? Gumogo dehe hita lakna sian Tuhan?

PANGARATAION 32:16

Marsomba halahi tu patung, gabe mangiburu ma Tuhan. Gurgur ma murukNa dibaen hajahatan i.

PANGARATAION 32:21

Patung na nipele ni halahi do mambaen muruk Au, tu na nigoaran ni halahi debata mangiburu Au, debata na so tutu Debata. BaenonKu ma sada bangso anso mangiburu halahi muruk tu bangso ni angka jolma na bodo i satutuna nian bangso na so adong do i.

PANGARATAION 4:19

Ulang jabat mardosa hamu hara ni na marsomba jana mangoloi tu sanga aha na niidamunu di langit, i ma mataniari, bulan dohot angka bintang. Dipadiar Tuhan Debatamunu do anggo angka bangso na asing manyomba angka i.