JEREMIA 6:17 - BIBEL JAMITA NA DENGGAN

¹⁷ Dung i marpupu ma diangkat Tuhan angka panjago na paingotkon halahi anso ditangihon nian sora ni sarune sipaboa tanda. Hape didok bangso i do, “Nada ra hami manangihon i.”

JEREMIA 6:17 ပူးပေါင်းရင်းမြစ်များ

JESAYA 21:11

Songon on ma alatan taringot tu Edom: Adong ma halak na pio-pio tu au sian Edom, “O panjago, lolot dope borngin on? Piga jom nari anso torang ari?”

JESAYA 56:10

angke angka na mapitung do anggo pamimpin ni bangsongKu! Nada diboto halahi bagi aha. Songon anjing panjago na so martunggu do halahi, tapi na modom sajo do halahi.

JESAYA 58:1

Marsurak ma sagogomu, ulang ma tahan-tahan. Marsurak ma sagogomu songon sarune. Paboa ma tu bangsongKu taringot tu hasalaan ni halahi dohot tu pomparan ni si Jakob taringot tu dosa ni halahi!

JESAYA 62:6

Madung hubaen halak di tembok ni Jerusalem; nada jabat maradian jagoan ni halahi do ho arian na borngin. Angkon sunggulan ni halahi do Debata di janji na dung dibaenNia di Sion.

JEREMIA 18:12

Tapi alusan ni halahi ma, ‘Aha guna ni i? Aha sundatna muda giot sai tongtong hami ihutkon hagiotnami na jahat i?’ ”

JEREMIA 25:4

Nada ra hamu manangihon sanga mamparrohahon, haru pe nian marpupu disuru Tuhan tu hamu angka panurirang, angka naposoNia.

JEREMIA 6:18

Jadi gabe didok Tuhan ma, “Tangihon ma ale angka bangso! Angkon botoonmunu do sanga aha na giot masa tu bangsongKu.

JEREMIA 7:28

Hara ni i dokkon ma tu halahi, ‘On ma bangso na so ra manangihon Tuhan, Debata ni halahi, jana na so ra manjagit pangajaran!’ Madung mago roha haburjuon sian pamangan ni halahi.”

JEREMIA 8:5

Hape anggo hamu bangsongKu, biasi ditadingkon hamu Au, jana nada ra mulak tu Au? Ditulak hamu do Au jana togu hamu marsitiopan tu gana-ganaanmunu i!

JEHESKIEL 3:7

Tapi anggo bangso Israel nada ra manangihon na nidokmu, salangkan Au so ditangihon halahi. Sijogal roha do halahi sude jana sai mangalo.

HOSEA 8:1

Didok Tuhan ma, “Palu ma sarune, paboa na ro parmaraan! Tudos tu halihi na manangkup soroanna do musu ro mamorangi tanongKi! Dilaosi bangsongKi do parjanjianKu dohot halahi jana dialo angka pangajaranKu.

HABAKUK 2:1

Manaek ma au tu menara panjagoanku jana hupainte ma jolo sanga songon dia alusNia di holos ni rohangku.

ZAKARIA 1:4

Ulang ma hamu songon angka ompumunu i. Narobi dipalalu angka panurirang do tonangKu tu halahi anso ulang be nian sai mambaen na jahat halahi dohot mambaen dosa. Hape nada diterge halahi jana nada ra halahi mangoloi Au.

ZAKARIA 7:11

Tapi nada diantureskon halahi jana mangalo, jana dipaingol do pinggolna anso ulang marbinege.

IBRANI 13:17

Ihutkon hamu ma angka parenta na sian pamimpinmunu jana oloi hamu ma na nidok ni halahi. Angke tongtong do diparrohahon halahi tondimunu jana angkon martanggung jawab do halahi tu Debata. Muda dioloi hamu do halahi, tarbaen halahi ma markarejo di bagasan sonang ni roha; muda inda songon i, humolos ma halahi na karejo i, jana nada adong ro labo sian na songon i di hamu.