JEREMIA 6:15 - BIBEL JAMITA NA DENGGAN

¹⁵ Angkon maila do nian halahi hara ni sude parbuatan ni halahi na jat i. Hape sihapal bohi do halahi jana na so umboto ila. Patunda ni i angkon gabe madabu do halahi songon halak na asing na dung madabu i; abis noma barita ni halahi muda jabat Au manguhum halahi. Au Tuhan, madung mandok songon i.”

JEREMIA 6:15 ပူးပေါင်းရင်းမြစ်များ

PAMUNGKAAN 19:34

Ancogotna i, didok boruna siangkaan i ma tu anggina, “Napotangin madung marcampur au dohot amanta; tapamabuk ma ia annon borngin mangulahi, anso modom ho annon rap dohot ia. Songon i noma dalanna baenonta anso adong anakta.”

HARURUAR 32:34

Tapi anggo ho kehe ma saonnari manogu-nogu bangso i tu inganan na dung Hupaboa tu ho; mardalan do surusuruanKu di jolomu; tapi di ari pamalosonKi baloskononKu ma tu bangso i dosa ni halahi i.”

PODA 29:1

Sanga ise na manangkang muda dipaingot, di sada hatiha gabe maropuk jana nada be tarpauli.

JESAYA 10:4

Mate di bagasan porang sajo ma bagianmunu, sanga disarat-sarat songon halak na tartaban. Tapi laing na muruk dope Tuhan jana sai giot manguhumi.

JESAYA 3:9

Bohi ni halahi patidahon hajahatanna, jana songon halak Sodom, patar-patar halahi paboahon angka dosana, nada ditabunihon be. Marjaya ma halahi! Angke diparo halahi do uhum tu dirina sandiri.

JEREMIA 14:15

Didok halahi ma mangasahon goarKu bahaso na so tondongon ni parporangan luat on sanga haleon, hape nada Husuru halahi mandok songon i. Au Tuhan, giot paboaonKu tu ho Jeremia, sanga aha na giot baenonKu tu angka panurirang na so Husuru i. BunuonKu ma halahi marhite porang dohot tangkuraparon.

JEREMIA 18:23

Tapi diboto Ho do ale Tuhan sasude na nitahi ni roha ni halahi laho mamatehon au. Hara ni i, ulang be ampuni halahi; ulang sesa hasalaan ni halahi. Potuk ma halahi lopus dabu. Maralo ma Ho tu halahi di bagasan muruk ni rohaMu.”

JEREMIA 23:12

Hara ni i, mangalandit jana manggolap noma dalan ni halahi lopus tartuktuk halahi jana tinggang. ParoonKu ma hamamago tu halahi, muda dung dapot hatihana laho manguhumi halahi. Au Tuhan, madung mandok songon i.

JEREMIA 3:3

Patunda ni i do gabe so aek sian langit, jana udan na somal di musimna nada unjung ro. Suman do ho tu siboru panggampang na so umboto hahaila.

JEREMIA 44:10

Tapi lopus sadari on nada ra hamu paserep rohamunu. Nada dipasangap hamu Au jana pardalan ni ngolumunu nada mangihutkon TonaKu na Hulehen tu hamu dohot tu ompumunu.

JEREMIA 5:29

Tapi patunda ni sasudena i, Au Tuhan, giot uhumanKu ma halahi giot baloskononKu angka pambaenan ni bangso on.

JEREMIA 5:9

Nada he patutna ma angkon uhumanKu halahi jana baloskonon sandok na nibaen ni halahi?

JEREMIA 8:12

O hamu bangsongKu, patut nian maila ma hamu hara ni sude halayason na dung nibaenmunu on! Hape hapal do bohimunu jana nada mamboto hahaila. Jadi hara ni i angkon madabu hamu songon halak na asing na dung madabu i; abis ma riwayatmunu muda dung Huuhumi hamu. Au Tuhan, madung mandok songon i.”

JEREMIA 8:9

Pailaon noma angka halak na pistar di tonga-tongamunu; mago ma roha ni halahi jana tarjorat. Nada ra halahi manangihon sipaingotKu; saonnari hapistaran aha dope na tading di halahi?

JEHESKIEL 13:14

Madung marniet Au laho mangarumpakkon tembok na nikapurmunu i, giot sarsarkononKu i lopus tinggal ojahanna i sajo. Dondonan ni tembok i ma hamu jana i noma mambaen mate hamu sudena. Jadi gabe botoonmunu ma bahaso Au do Tuhan.

JEHESKIEL 2:4

Sijogal roha do halahi jana nada dipasangap halahi Au. Husuru ho tu halahi laho palaluhon sanga aha na Hudok tu halahi, Au do Tuhan Debata mandok,

JEHESKIEL 24:7

Masa do di kota i mamunu jolma, tapi nada durus tu tano mudar ni na hona bunu i, tapi tu ginjang ni batu na pir do, jadi nada tartimbun.

HOSEA 4:5

Arian na borngin do hamu mambaen hasalaan, songon i muse angka panurirang. Hara ni i giot abisanKu ma Israel, inangmi.

HOSEA 9:7

Madung dapot ari panguhuman, hatiha pamaloson tu sandok parbuatan. Taonon ni Israel noma i! Didok hamu, “Na oto do panurirang on. Na rintik do jolma na nirajaan ni tondi on!” Didok hamu pe songon i hara ni gigina do rohamunu tu Au jana dosamunu santak godangna.

MIKA 3:6

“O Panurirang, marujung ne ma hatihamu; mamungka lusut ma mataniarimu. Dipaoto-oto hamu do bangsongKi, hara ni i nada jagitonmunu be parnidaan na pabotohon angka sangkapKu. Nada be tarlumbahon hamu sanga na aha.”

MIKA 7:4

Halak na umburju sian tonga-tonga ni halahi, i ma songon suan-suanan na marduri. Na umtigor sian tonga-tonga ni halahi songon pagar na marduri. Madung dapot hatiha di angka pamata-mataimunu dohot ari panguhumanmu. Saonnari angkon mulai ma hagaoron di tonga-tonga ni halahi!

ZEPANYA 2:1

Marsitutu jana marlagut ma, hamu ale bangso na so marjohoman,

ZEPANYA 3:5

Tapi na tigor do anggo Tuhan di tonga-tonga ni halahi, nada unjung dibaen Ia hakejamon, na so unjung dihalupahon di hatiha manyogot. Tapi halak na kejam nada mamboto hahaila.

ZAKARIA 13:4

Di hatiha i maila ma angka panurirang hara ni parnidaanna songon sada panurirang, nada adong be sian halahi na mamake baju juba na marimbulu giot margabus.

MATEUS 15:14

Padiar hamu ma halahi. Angke panogu na mapitung do halahi, na manogu na mapitung. Muda di togu na mapitung halak na mapitung, madabu do halahi na dua tu lubang i.”

PILIPPI 3:19

Anggo ujungna angkon gabe sego do ngolu ni halak sisongon i, angke na martuhankon hagiot ni pamatangna sandiri do halahi. Angka pangalaho sihailahononkon, hape gabe i do na niargahon ni halahi; angke hum angka na mardomu tu tano on sajo do na nisarihonna.