JEREMIA 51:11 - BIBEL JAMITA NA DENGGAN

¹¹ Madung dijajang Tuhan angka raja na sian Media, hara ni na giot roncohononNia Babel. Songon i ma dalanna dibaen Ia laho mamalos parbuatan ni angka jolma na mangaroncohon bagasNia i. Didok komandan ni parangan parporang i ma, “Patajom be anak ni pana! Parade parince!

JEREMIA 51:11 ပူးပေါင်းရင်းမြစ်များ

1 RAJA-RAJA 11:14

Jadi dibaen Tuhan ma si Hadad, i ma sahalak pomparan ni raja ni Edom marmusu tu si Salomo.

1 RAJA-RAJA 11:23

Laing dibaen Debata muse ma si Reson anak ni si Elada marmusu tu si Salomo. Hatoban na lari sian tuanna do si Reson, i ma Raja Hadadeser sian Zoba,

1 JUJUR TAON 5:26

Jadi hara ni i, dipatubu Debata ma tu bagasan roha ni si Pul raja ni Asur, gabe kehe ma ia mamorangi luat i. Laing tarbarita do goar ni si Pul, si Tiglat-Pileser. Jadi gabe dioban ia ma Marga Ruben, Gad dohot Manase na di Habincaran gabe hona taban jana dibuang tu Halah, Habor, Hara dohot tu inganan na di lambung ni Batang aek Gosan. Disi noma halahi maringanan lopus tu sadari on.

2 JUJUR TAON 36:22

Di taon parjolo mamarenta si Kores raja ni Persia, dipatulus Tuhan ma na nidokNia marhite Panurirang Jeremia. Digorakkon Tuhan ma roha ni si Kores laho mangharuarkon sada parenta na disise di sude harajaannia. Songon on ma hatana:

ESRA 1:1

Di taon parjolo mamarenta si Kores, raja ni Persia, dipatulus Tuhan ma sanga aha na nijanjihonNia marhite Panurirang Jeremia. Disosoi Tuhan ma roha ni si Kores anso diharuarkon ia sada parenta sisisehononkon di sude harajaannia. Songon on ma hatana:

JESAYA 10:26

Au Tuhan Na Markuaso, giot sambohonKu halahi dohot loncing-loncing, songon panggosangKu di halak Midian di Dolok Batu Oreb. UhumanKu do Asur songon panguhumKu di Mesir.

JESAYA 21:2

Madung dipatuduhon tu au taringot tu na jorbut na giot masa, halumbaan taringot tu hajahatan dohot hasesegona. Maju ma hamu parangan ni Elam, roro ma! O hamu parangan ni Madai, hobuk hamu ma angka kota i! Na giot paujungonKu noma sude pardangolan na nibaenan ni Babel.

JESAYA 21:5

Huida muse ma horja na godang na dung dihobasi; rade juguhan di angka tamu na niontang. Mangan minum ma halahi. Ompot ma tarbege parenta, “Hamu angka panglima! Pasingkop hamu angka parincemunu!”

JESAYA 41:25

Madung Hupabangkit sahalak sian Habincaran, sian Utara do ia ro manyerang. Lonca-loncaonnia ma parkuaso songon bustak songon sitopa hudon mangalonca-lonca tano liat.

JESAYA 45:1

Songon on do hata ni Tuhan, “On ma hatangKu tu halak na Hupasupasu i, si Kores na dung Hutiop tangan siamunna. Anso Hutaluhon angka bangso na di jolona, dohot mamupusi angka raja; anso Hubuka angka pintu na di jolona, jana angka horbangan pe nada tartutup be mangulahi.”

JESAYA 45:5

Au do Tuhan, nada adong na asing, sasada Au do Debata. Madung Huparsinjatai ho, haru pe goarKu laing so diboto ho.

JESAYA 46:11

Hupiohon do unggas panyoro sian Habincaran, dohot halak na patulus haputusanKu, sian luat na dao. Madung Hudokkon i, jadi giot patulusonKu do i, madung Husangkapkon i, jadi giot patulusonKu do i.

JEREMIA 46:3

“Marsurak ma angka perwira ni Mesir, ‘Buat ma angka parince, kehe ma ho tu parporangan!

JEREMIA 46:4

Pasang ma palano ni kudo jana juguhima! Marsibuat ingananna ma jana dipake ma kupia baja! Garut ma hujurmu! Pake ma baju bosi!’ ”

JEREMIA 46:9

Marpacu ma da, angka kudo! Mardalan ma da angka kareta! Maju ma da angka na gogo sian Sudan. Songon i dohot sitiop parince na sian Libia dohot panyior na malo na sian Lidia.’ ”

JEREMIA 50:25

Madung Hubuka panyimpanan ni sinjatangKu, jana mardongan muruk Huparuar angka sinjata i dibaen Au sandiri Tuhan Debata Na Markuaso, angkon patulusonKu do sada karejo di Babel.

JEREMIA 50:3

Na giot ro ma sada bangso sian Utara mamorangi Babel jana mambaen luat i gabe padang na harsang. Marlojongi ma jolma dohot pahan-pahanan jana nada adong be na ra maringanan disi.”

JEREMIA 50:45

Hara ni i, tangihon ma sanga aha na dung Husangkaphon maradopkon kota Babel dohot na giot baenonKu tu angka halak na disi. Angka dakdanak ni halahi pe saraton do kehe jana sandok jolma gabe mabiar.

JEREMIA 50:9

Husosoi pe angka bangso na gogo-gogo na adong di Utara anso diporangi halahi Babel. Aturon ni halahi ma barisan laho martempur mangalo Babel lalu manaluhonsa. Angka parsior na malo-malo do halahi jana anak ni pana ni halahi nada unjung na so mangonai.

JEREMIA 51:12

Lehen ma tanda laho manyerang angka tembok ni Babel. Pagomos panjago. Baen pangawal. Markobas ma mambulutkon!” Madung didalankon Tuhan sanga aha na disangkaphonNia maradopkon Babel.

JEREMIA 51:24

Didok Tuhan ma, “Ligi sandiri ma sanga na bia Hubaen mambaloskon tu Babel dohot halak na disi, sandok hajahatan na nibaen ni halahi maradopkon Jerusalem.

JEREMIA 51:35

Dokkon ma, ale halak na maringanan di Sion, “Sai dituntut Tuhan ma nian Babel hara ni hakejamonnia maradopkon hita!” Dokkon ma ale Jerusalem, “Sai dituntut Tuhan ma nian Babel hara ni parkancitan na hita taon!”

JEREMIA 51:36

Hara ni i didokkon Tuhan ma tu halak Jerusalem, “ParjuangkononKu do parkaromu jana uhumanKu angka musumu hara ni pambaenan ni halahi tu hamu. PahiangonKu ma angka mual ni aek dohot angka batang aek ni Babel.

DANIEL 5:30

Laing di borngin i, hona bunu ma si Belsasar raja ni Babel i.

JOEL 3:10

Topa ma pangkurmu gabe podang, dohot piso parpangkas gabe parkokas laho maniham. Halak na gale-gale pe dohot mandok, ‘Tolap au do marporang songon tentara!’

JOEL 3:9

Pabotohon ma boa-boa on tu angka bangso: Markobas ma marporang dohot mangasahon gogo! Pajuju hamu ma angka na malo marlojong dohot angka ulubalang; palagut sude angka parajurit, beta ma, maju ma!

HAMALIMON 26:25

ParoonKu ma parporangan laho manguhum hamu, angke madung dilaosi hamu aturanKu, dung i muda marlagut hamu di kotamunu manjalahi paronding-ondingan, paroonKu ma tu hamu nyae na so haubatan gabe tunduk hamu tu musumunu.

ZAKARIA 14:12

Pamasaon ni Tuhan ma nyae na jorbut tu sude bangso na dung unjung marporang mangalo Jerusalem. Mata dohot sude pamatang ni halahi, busuk-busuk boti ma i mangolu-olu dope halahi.

ZAKARIA 14:2

Palaguton ni Tuhan ma sandok bangso laho mamorangi Jerusalem. Taluhononna ma kota i, jana dirampasi angka bagasna i, jana angka dadaboru na disi paksaonna marmainan. Satonga sian halak kota i obanonna tu habuangan, tapi anggo na asing i tading do di kota i.