JEREMIA 50:2 - BIBEL JAMITA NA DENGGAN

² “Paboa ma barita tu angka bangso! Pasar ma barita i. Baen ma tanda anso sar barita i. Ulang tabuni-tabunihon barita i. Madung hona taban Babel! Madung maila Debata Bel, madung tarsonggot Marduk! Madung maila angka gana-ganaan i.

JEREMIA 50:2 ပူးပေါင်းရင်းမြစ်များ

MASMUR 64:9

Gabe mabiar be ma halak sudena; marpikir be ma halahi salaho tu pambaenan ni Debata, jana pararatkon sanga aha na dung dipatupa Debata.

MASMUR 96:3

Caritohon hamu ma tu angka bangso hagodanganNia, paboa ma angka hahomangan na nibaenNia tu sude jolma manusia.

MASMUR 97:7

Sude na marsomba gana-ganaan dipaila, angka halak na mamuji dirina hara ni gana-ganaan. Sude debata marsomba sujut di jolo ni Tuhan.

JESAYA 12:4

Dapot do i hatihana marendei angka halak, “Mandok tarimakasi ma da tu Tuhan, pio ma goarNia mangido tolongan. Paboa ma tu angka bangso, hagodangan dohot sude pambaenanNia.

JESAYA 13:2

Pajongjong ma mandera porang di puncu ni dolok na gundul! Marsurak ma tu angka parajurit, jana patoltol ma tanganmu tanda ni na giot mangaroro halahi mamorangi kota na gakgak i jana mangonjar angka horbanganna.

JESAYA 21:9

Ligi, indu ma halahi! Parangan na markudo ro mardua-dua. Dung i ro ma panjago i paboahon, “Madung madabu Babel! Madung marragean angka patung na nisomba ni halahi i di tano.”

JESAYA 37:19

Ditutungi jana ditapori halahi angka debatana, dibaen nada i Debata. Hum patung na nibaen sian hayu dohot batu sajo do i antong na nibaen ni tangan ni jolma; hara ni i do umbaen na bisa disegoi jolma.

JESAYA 39:1

Laing di sahatiha i, tarbege ma tu raja Babel si Merodak-Baladan anak ni si Baladan, na baru malum Raja Hiskia sian nyaena. Jadi disuru ia ma halak maroban surat dohot silua tu si Hiskia.

JESAYA 46:1

Debata Bel dipatunduk, Debata Nebo dirumpakkon, patung-patungna i madung dioban di gincat ni pahan-pahanan; na unjung dipaudur-udur hamu saonnari dibaen muatan, gabe boban ni binatang na loja.

JESAYA 48:20

Kehe ma ho sian Babel, lojongi ma tu Kasdim baritahon ma mardongan jop ni roha. Baritahon ma sun tu dia: “Madung dipalua Tuhan Israel, naposoNia!”

JESAYA 48:6

Madung dibege ho sudena i jana saonnari idaonmu noma i. Saonnari Hupataridahon angka pangalaho na imbaru, na so unjung dope Hubaritahon di hatiha na salpu.

JEREMIA 10:11

Hamu ale angka bangso, angkon paboaonmunu do tu halahi, sisegohonon do angka debata na so manompa langit dohot tano. Mago do halahi sian portibi on.)

JEREMIA 10:15

Nada mararga angka gana-ganaan i, sipalayason jana sipabileon do i. Di hadudumpang ni hatihana mago ma halahi sudena.

JEREMIA 31:10

Didok Tuhan do, “Tangihon hamu ma ale angka bangso! Palalu ma tonangKu tu bariba ni laut: BangsongKu na dung Hupaserakkon giot palagutonKu jana pasari-sarionKu songon parmahan na manjago biri-birina.

JEREMIA 4:16

Laho paingotkon angka bangso do haroro ni halahi dohot paboahon tu halak Jerusalem na dung ro musu sian luat na dao. Marsurak-surak ma halahi mandok hata ni porang maradopkon angka kota ni Juda,

JEREMIA 4:6

Patuduhon ma dalan tu Sion, dolok ni Tuhan, ompoti hamu ma mangungsi, ulang ma marsidalian. Sian Utara diparo Tuhan hamamago dohot hasegoan.

JEREMIA 46:14

“Di angka kota ni Mesir, i ma di Memphis, Migdol dohot di Tahpanhes, pabotohon ma barita on, ‘Markobas ma hamu laho martahan, angke sude sinadonganmunu abiskonon noma i di parporangan!

JEREMIA 50:46

Muda madabu Babel, tarbege ma hagaoron na lobi gogo jabat humutur portibi on; begeon ni angka bangso na asing ma angguk ni halahi.”

JEREMIA 51:12

Lehen ma tanda laho manyerang angka tembok ni Babel. Pagomos panjago. Baen pangawal. Markobas ma mambulutkon!” Madung didalankon Tuhan sanga aha na disangkaphonNia maradopkon Babel.

JEREMIA 51:27

“O ale raja na sian Utara! Lehen ma tanda laho manyerang! Palu ma sarune anso dibege angka bangso! Arahon ma angka bangso laho marporang mangalo Babel! Suruhon ma harajaan Ararat, Mini dohot Askenas manyerang. Angkat ma sada halak ulubalang laho manguluhon porang i. Oban ma kudona sabahat ni siapor.

JEREMIA 51:31

Marlojongi angka suruan marsijolo-joloanan laho paboahon tu raja ni Babel, bahaso na dung hona serbu kotania i sian sude haroroan.

JEREMIA 51:44

Bel, debata ni tano Babel, giot uhumonKu. Giot baenonKu paulahonnia sanga aha na nirampasnia. Nada be sombaon ni angka bangso ia. Madung marumpak angka tembok ni Babel.

JEREMIA 51:47

Pos ma rohamunu, dapot do i hatihana uhumanKu angka gana-ganaan ni Babel. Sude luat i marlayas, jana sandok halak na disi hona bunu.

JEREMIA 51:52

Antong parrohahon hamu ma na Hudokkon on. Ro do i hatihana, uhumanKu angka gana-ganaan ni Babel; tarbege ma di sude luat i pangangguk ni jolma na margasa banga.

JEREMIA 51:8

Tompu ma madabu Babel lalu sarge. Tangisi hamu ma i, jana jalahi hamu ma ubat tu angka gasana i, betak na ra dope malum.

JEREMIA 52:31

Di tanggal dua pulu lima bulan dua bolas taon patolu pulu pituhon dung dioban si Joyakin tu habuangan, si Merodak ma na gabe raja di Babel, laing di bagasan taon i dipatuduhon ia ma ibo ni rohania tu si Joyakin, jana dipalua ia ma si Joyakin sian hurungan,

JEREMIA 6:18

Jadi gabe didok Tuhan ma, “Tangihon ma ale angka bangso! Angkon botoonmunu do sanga aha na giot masa tu bangsongKu.

DANIEL 1:2

Dipaloas Tuhan do ia manaluhon Raja Joyakim dohot mangarampas deba sian angka barang sigodang arga na di Bagas Ni Tuhan. Angka halak na nitabannia, dioban ia ma i tu bagas parsombaan ni debatana di Babel jana angka barang-barang na nirampasnia i disimpan ia ma i di bagasan bagas parsombaan i.

DANIEL 3:14

Disapai raja i ma tu halahi, “Sadrakh, Mesakh dohot Abednego! Tutu dehe na so ra hamu marsomba angka debatangku jana nada ra muse hamu manungkap tu patung sere na hupajongjong i?

ZEPANYA 2:11

Mabiar ma halahi baenon ni Tuhan. PatoruhonNia ma sahala ni angka debata na di tano on lopus nada adong be arga ni i sude. Jadi gabe marsomba tu Tuhan noma sandok bangso, di tanona sandiri be.

HALUMBAAN 18:2

Marsora na gogo ma ia marsurak, “Madung madabu dadaboru i! Madung madabu Babel Na Godang i! Gabe inganan ni tondi na jahat dohot partabunian ni angka tondi na hodar noma i saonnari. Angka unggas na hodar jana na nihagigihon ni halak noma na mangolu di bagasan.