JEREMIA 50:17 - BIBEL JAMITA NA DENGGAN

¹⁷ Didok Tuhan ma, “Tudos do halak Israel dohot biri-biri sahulanan na hona kojar jana na marserak dibaen singa. Mula-mulana ro ma raja ni Asur manyerang halahi, dung i ro muse ma si Nebukadnesar manyingkili holi-holi ni halahi.

JEREMIA 50:17 ပူးပေါင်းရင်းမြစ်များ

2 RAJA-RAJA 15:19

Dompak ro si Pul raja ni Asur mamorangi Israel, dilehen si Menahem ma tusia 34.000 kilo perak anso diurupi ia pahotkon kuaso ni si Menahem di Israel.

2 RAJA-RAJA 15:29

Di hatiha ni si Pekah mamarenta, dirampas si Tiglat-Pileser raja ni Asur ma kota Iyon, Abel-Bet-Maaka, Janoah, Kedes, Hasor, Luat Gilead, Galilea dohot Naftali. Dioban ia muse ma halak kota i gabe taban tu Asur.

2 RAJA-RAJA 24:1

Dompak mamarenta Raja Joyakim, disi ma ro si Nebukadnesar raja ni Babel patundukkon Juda. Tolu taon honokna tunduk si Joyakim tu si Nebukadnesar, dung i mangalo ia muse.

2 RAJA-RAJA 24:10

Di na mamarenta si Joyakin, ro ma tentara ni halak Babel na nipimpin ni angka perwira ni si Nebukadnesar laho mamorangi Jerusalem lalu manghobuk kota i.

2 RAJA-RAJA 25:1

Dung i manglao ma si Zedekia tu si Nebukadnesar raja ni Babel i. Jadi di tanggal sampulu bulan sampulu taon pasambilankon dung mamarenta si Zedekia, kehe ma si Nebukadnesar rap dohot sude tentarania na marsinjata laho mamorangi Jerusalem. Dipajongjong halahi ma parbandaran ni halahi di ruar ni kota Jerusalem jana dibaen halahi ma tembok humaliang laho manghobuk,

2 JUJUR TAON 28:20

Jadi ro ma si Tiglat-Pileser, raja ni halak Asur i, tapi nada na giot mangurupi si Ahas ia, sabalikna mur mambaen hasusaan do tusia.

2 JUJUR TAON 33:11

Jadi diparo Tuhan ma angka panglima ni tentara Asur laho mangarampas Juda. Ditangkup ma si Manase dohot hait, dirante lalu dioban tu Babel.

JESAYA 15:9

Di kota Dibon gabe marrarai aek ni batang aek i hara ni na marcampur mudar. Jana paroonKu dope angka pangalaho na jumorbut maradopkon angka jolma na disi. BaenonKu dope singa laho manyoro angka jolma na kehe sian Moab, dohot na teba di luat i.

JESAYA 47:6

Najolo muruk Au tu bangsongKu, nada Huetong be halahi nampunangKu. Gabe Hupasahat tu ho, hape nada adong ibo ni rohamu, dohot do tu na tobang-tobang dipambaeni ho pangalaho na kejam.

JEREMIA 10:25

Tu angka na manghudukkon Ho ma, palalu parpiar ni murukMu dohot tu na so marsomba tu joloMu. Angke madung diabisi halahi sude pomparan ni si Jakob jana na mangaroncohon tano ni halahi.

JEREMIA 2:15

Marngaur musuna i songon singa, gariang jana rumar tanona i dibaensa, angka kotana abis hona surbu, dipadiar mamolngit jana gabe lobu.

JEREMIA 21:7

Ho dohot angka pagawemu maradu angka jolma na malua sian parporangan, tangkuraparon dohot nyae masa, padiaronKu sudena i hona tangkup baenon ni Raja Nebukadnesar dohot baenon ni angka musu na giot mamatehon ho. Bunuon ni si Nebukadnesar ma hamu sude nada adong ampunan dohot ibo ni rohana. Au Tuhan, mandok songon i.”

JEREMIA 4:7

Songon singa na ruar sian liang partabunian songon i ma panyego-nyego ni angka bangso na dung mardalan laho mangaroncohon Juda. Mamolngit noma i angka kota ni Juda dipadiar gabe lobu na so adong manginganisa.

JEREMIA 49:19

Songon singa na muldop sian harangan godang di lambung ni Batang aek Jordan, jana na ro mandapotkon padang panjampalan ni biri-biri, songon i ma Au giot ro jana mambaen marlojongi halak Edom sian tano ni halahi tompu. Dung i todoonKu ma sada halak pamimpin laho mamarenta luat i. Ise ma he na tarpatudos tu Au? Ise he puluk mangalo Au? Adong dehe lakna pamimpin na puluk mangalo Au?

JEREMIA 5:17

Pangabison ni halahi ma suha ni tano dohot panganonmunu jana bunuonna ma angka dakdanakmunu. Sambolon ni halahi ma angka lombu dohot pahan-pahananmunu, jana segohonon ni halahi ma angka kobun anggur dohot bona ni hayu aramunu. Roncohonon ni halahi ma angka kota na marbenteng na sai dipangasahon hamu.

JEREMIA 5:6

I ma dalanna gabe soroon ni singa na sian harangan halahi, jana diparsuragehon ni sorigala na sian padang halongonan. Humadeap ma angka angguliman manjalahi soroanna di bagasan angka kota ni halahi, jana sanga ise na ruar sian bagasna soroanna noma i. Patunda ni na dung bahat do halahi mardosa umbaen na tarjadi sudena i, jana marpupu halahi manghudukkon Debata.

JEREMIA 50:6

Tudos ma bangsongKi tu biri-biri na dipadiar ni parmahanna lilu di dolok. Maot-aot ma halahi sian dolok na sada tu na sada nari nada diboto halahi be bara ni halahi.

JEREMIA 51:38

Marngaur ma halak Babel songon singa, jana mangorong songon anak ni singa.

JEREMIA 52:1

Marumur dua pulu sada taon ma si Zedekia di na gabe raja ia di Juda. Sabolas taon honokna mamarenta ia di Jerusalem. Inangnia margoar si Hamutal, anak ni si Jeremia sian kota Libna.

JEHESKIEL 34:12

songon panjalahi ni sada parmahan jana na palagutkon angka biri-birina na marserak i lalu dipature-ture ia. ObanonKu ma halahi mulak sian sude inganan parserahan ni halahi di ari na golap jana na sial i.

DANIEL 6:24

Sonang ma roha ni raja i jana diparentahon ia ma anso diparuar si Daniel sian liang i. Dung dipadalan parenta i, hape nada adong gasa ni si Daniel saotik pe, angke porsaya do ia tu Debatania.

JOEL 3:2

PalagutonKu ma sandok bangso jana obanonKu tu Rura Josafat. TimbangonKu ma parkaro ni halahi disi domu tu hajahatanna maradopkon bangsongKu angke dibagi-bagi halahi do tano Israel jana dibuang halahi bangsongKi tu luat na marragam.

1 PETRUS 2:25

Najolo, songon biri-biri na lilu do hamu hape anggo saonnari madung dioban hamu mangulahi mangihutkon Kristus, Parmahan jana na marmahani hamu.