JEREMIA 50:15 - BIBEL JAMITA NA DENGGAN

¹⁵ Marsurak ma hamu paboahon parporangan humaliang kota i! Saonnari madung tunduk Babel. Angka tembokna i madung dirumpakkon jana diparunggalkon. Na palalu hosom do Au saonnari tu Babel. Hara ni i, baen hamu ma tu halahi songon na nibaen ni halahi tu angka halak na asing.

JEREMIA 50:15 ပူးပေါင်းရင်းမြစ်များ

1 JUJUR TAON 29:24

Sude angka na juguk di pamarenta dohot militer maradu sude angka anak ni si Daud na deba nari i, dioku halahi do si Salomo gabe raja.

2 JUJUR TAON 30:8

Ulang pajogal roha hamu songon halahi i, tapi burju hamu mangoloi Tuhan. Ro ma hamu tu Jerusalem, tu Bagas Ni Debata na nihapunjungkon ni Tuhan Debatamunu diSia sandiri salolot-lolotna. Beta ma hita maribadat tuSia anso laing mombun ma da murukNia maradopkon hamu.

MASMUR 149:7

laho manaluhon angka bangso, jana manguhumisa;

MASMUR 94:1

Ale Debata, Ho do Debata na mambaloskon, patuduhon ma pamalosonMi ale Debata!

JESAYA 59:17

PakeonNia ma hatigoran songon baju bosi jana hamonangan songon kupia baja. Dipasada Ia rohaNia laho manyalosehon na masa i jana baloskononNia hajahatan na niae ni jolma.

JESAYA 59:18

UhumanNia noma angka musuNia marguru tu pambaenan ni halahi, salang angka bangso na dao-dao pe nada malua sian uhumanNia.

JESAYA 61:2

Diutus do au laho mamaritahon paboa na tibu noma Tuhan ro paluahon. PaluaonNia ma bangsoNa, jana musu ni halahi taluhononNa. Madung disuru Tuhan muse au laho mangapoi na marsak roha.

JESAYA 63:4

Madung Hutontuhon ari pamaloson; on ma hatihana halahi paluaon.

JEREMIA 46:10

On ma ari ni Tuhan Debata Na Markuaso i; anggo di ari on mambaen pamaloson ma Tuhan Debata Na Markuaso i tu sude angka musuNia. Panganon ni podangNia ma halahi lopus butong, jana inumonna mudar ni halahi lopus sombu. Di ari on disambol ma angka haul di Utara di topi ni Batang aek Efrat i.

JEREMIA 50:14

Hamu ale angka panyior! Atur hamu ma barisanmunu laho mangaroro dohot manghobuk Babel. Tembakkon hamu ma anak ni siormunu adop Babel, dibaen madung mardosa ia naradopkon Au.

JEREMIA 50:25

Madung Hubuka panyimpanan ni sinjatangKu, jana mardongan muruk Huparuar angka sinjata i dibaen Au sandiri Tuhan Debata Na Markuaso, angkon patulusonKu do sada karejo di Babel.

JEREMIA 50:44

Songon singa na muldop sian harangan godang na di lambung ni Batang aek Jordan mandapotkon padang panjampalan ni biri-biri songon i ma, Au Tuhan, giot ro jana mambaen marlojongi halak Babel sian kota ni halahi tompu. Dung i todoonKu ma sada halak pamimpin laho mamarenta luat i. Ise ma he na tarpatudos tu Au? Ise ma he na puluk mangalo Au? Adong dehe pamimpin na margogo mangalo Au?

JEREMIA 51:11

Madung dijajang Tuhan angka raja na sian Media, hara ni na giot roncohononNia Babel. Songon i ma dalanna dibaen Ia laho mamalos parbuatan ni angka jolma na mangaroncohon bagasNia i. Didok komandan ni parangan parporang i ma, “Patajom be anak ni pana! Parade parince!

JEREMIA 51:14

Marsumpa do Tuhan Na Markuaso i mangasahon goarNa sandiri bahaso na giot tongosonNia jolma sabahat ni siapor laho manyerang Babel jana marsurak ma halahi manyurakkon hamonangan.

JEREMIA 51:24

Didok Tuhan ma, “Ligi sandiri ma sanga na bia Hubaen mambaloskon tu Babel dohot halak na disi, sandok hajahatan na nibaen ni halahi maradopkon Jerusalem.

JEREMIA 51:25

O ale Babel, tudos tu dolok do ho na mangaroncohon sude portibi on. Tapi Au Tuhan giot mangalo ho. TarihonKu ma ho jana Hupabalik jana Hupadiar puntung gabe tiranggong.

JEREMIA 51:30

Madung maradian tentara ni Babel marporang jana di angka benteng noma halahi tinggal. Ma pola mago habaranion ni halahi jana nada be margogo. Madung hona onjar angka pintu ni horbangan, jana disurbui angka bagas.

JEREMIA 51:36

Hara ni i didokkon Tuhan ma tu halak Jerusalem, “ParjuangkononKu do parkaromu jana uhumanKu angka musumu hara ni pambaenan ni halahi tu hamu. PahiangonKu ma angka mual ni aek dohot angka batang aek ni Babel.

JEREMIA 51:44

Bel, debata ni tano Babel, giot uhumonKu. Giot baenonKu paulahonnia sanga aha na nirampasnia. Nada be sombaon ni angka bangso ia. Madung marumpak angka tembok ni Babel.

JEREMIA 51:58

Giot pahornoponKu tu tano tembok ni Babel na togu i. Angka pintu ni horbanganna na timbo-timbo i surbuonKu noma i. Nada adong gunana usaho ni angka bangso, angke panganon ni api do karejo ni halahi i. Au Tuhan Na Markuaso madung mandok songon i.”

JEREMIA 51:6

Palua ma dirimu! Lojongi ma sian Babel ulang jabat dohot hamu hona bunu hara ni dosana! Na mambaloskon hajahatan ni Babel do Au on dohot manguhumisa hombar tu pambaenanna.

JEREMIA 51:64

lalu dok ma hatana, ‘Songon on ma na giot tarjadi tu Babel. Bonom ma luat on jana nada mulgap be hara ni parmaraan na nitimpalkon ni Tuhan tusi. Olat ni on ma hata ni si Jeremia.’ ”

ANDUNG 5:6

Kehe hami tu Mesir laho mangido sipanganon, tu Asur pe kehe hami anso ulang tangkuraparon.

JEHESKIEL 17:18

Hara ni na mangalaosi ia di sumpa dohot janjinia, pola do sampe marsijalangan, gabe nada tarbahen ia be paluahon dirina.

JEHESKIEL 21:22

Madabu tu tangan siamunna anak ni pana na manudu Jerusalem! Na nidokna disi, angkon hobuhon ni raja i ma kota Jerusalem. Dung i disurakkon ia ma surak-surak parporangan anso dihobasi angka tentarania i angka parkokas sipakeon laho mangonjar, dipasang ma i di angka pintu ni horbangan ni Jerusalem, manimbun tano mambaen tembok pangkobuhan dohot manghuar angka bondar.

NAHUM 1:2

Nada ra Tuhan Debata marimbang, sanga ise na mangalo Ia, ingkon dapot uhuman. Di parpiar ni murukNa, tu halahi, dibaloskon Ia pambaenanna be.

MATEUS 7:2

Harana songon uhum na niuhumkonmunu, songon i do niuhuman hamu muse; jana parsuhatan na nisuhatkonmunu i do niparsuhatkon tu hamu muse.

LUKAS 21:22

Angke anggo angka ari i, i ma, ‘Angka ari pamaloson.’ Jadi di na songon i ma tulus sanga aha na dung tarsurat di Buku Na Badia i.

SURAT NI SI PAULUS TU PARLAGUTAN ROM 12:19

Hamu ale angka dongan na nihaholongan! Ulang ma hamu sandiri na mambaen pambaloson, tapi lehen ma inganan tu hamumuruk ni Debata. Angke tarsurat do, “Au do mambaen pambaloson,” ninna Tuhan.

SURAT NI SI PAULUS TU PARLAGUTAN ROM 3:5

Tapi muda mur tarida na tigor Debata hara ni na tabaen na so tigor, aha ma na tardok hita? Na geduk ma he lakna Debata muda diparo Ia rimasNia? (Mangihutkon hata ni jolma do na hudok i.)

PANGARATAION 32:35

Palaluon ni Tuhan ma hosomNa, anso didabu tu halahi uhumanNa; ro do hatihana madabu halahi; ma pola donok arina maropuk halahi.

PANGARATAION 32:41

dung salpu kuaso ni podangKu na tajom na marhillong padalanonKu ma hatigoran. Hupalalu ma hosom tu sudena na magigi tu Au Hudabu uhumanna.

PANGARATAION 32:43

Pasangap ma bangso ni Tuhan i, hamu ale angka bangso, sude na mamunu halahi uhumonNa do. PalaluonNa hosom tu musuna tapi ampunanNia do anggo dosa ni bangsoNa.”

2 TESSALONIKA 1:8

bope dohot api na marnyala-nyala. Laho manguhumi halak na so mananda Debata, dohot angka na so mangoloi Jamita Na Denggan taringot tu Jesus Tuhanta i do umbaen na mijur Ia.

JAKOBUS 2:13

Angke sanga ise halak na so maribo ni roha tu halak na asing, sidabuon do uhuman tusi so pola mardongan ibo ni roha. Tapi gumogo dope ibo ni roha ulang uhuman!

JOSUA 6:20

Jadi diombus angka malim ma sarunena. Jana disi dibege angka halak Israel sora ni sarune i marsurak ma halahi sagogona, jadi gabe matolbak ma tembok ni kota Jeriko i. Manigor manangkok ma tentara ni Israel tu dolok jana masuk tu kota i mangarampassa.

JOSUA 6:5

Dung i angkon paluon ni angka malim i ma sarune i ginjang sorana. Disi dibege hamu sora na ginjang i, angkon marsurak ma gogo sude halaklahi, jadi gabe matolbak ma tembok ni kota i. Jadi angkon manigor masuk ma sude tentara i tu kota i.”

HALUMBAAN 16:6

Dibaen madung diusehon halahi mudar ni angka halak na badia dohot angka panurirang i. Madung dilehen Ho mudar gabe inumon ni halahi tama do na songon i di halahi!”

HALUMBAAN 18:6

Baen hamu ma tusia balos ni na nibaennia i tu hamu; dua noli lompit baloskon hamu sandok na nibaennia. Isi hamu ma mangkukna i dohot siinumon na dua noli lompit korasna sian siinumon na niparade di hamu.

HALUMBAAN 19:2

Dibaen na sintong jana na tigor do angka uhumNia, angke diuhumi Ia do panggampang godang i, na manyegohon tano on markite-hite panggampangonnia i, jana Ia do na mambaloskon mudar ni angka naposoNia tu panggampang i.”

1 SAMUEL 15:33

Didok si Samuel ma, “Songon podangmi na dung mambaen bahat halak agoan anak, laing songon i muse ma inangmu gabe agoan anak.” Dung i dijaljal si Samuel ma si Agag di jolo ni langgatan na di Gilgal i.