JEREMIA 49:17 - BIBEL JAMITA NA DENGGAN

¹⁷ Didok Tuhan, “Hara ni godangna parmaraan na mandondoni Edom, jabat do gabe tarsonggot ganop halak na mamolus sian i jana mabiar.

JEREMIA 49:17 ပူးပေါင်းရင်းမြစ်များ

1 RAJA-RAJA 9:8

Bagas parsombaan on, angkon gabe tiranggong, pola tehe sude halak na mamolus disi gabe homang jana tarsonggot. Dohonon ni halahi ma, ‘Biasi dibaen Tuhan i songon i tu luat on dohot tu bagas parsombaan on?’

JEREMIA 18:16

Madung dibaen halahi luat on gabe inganan na jorbut jana gabe sihata-hataan sapanjangna. Sandok halak na mamolus marsiupirkon uluna be hara ni jorbut ni pangkilalaanna.

JEREMIA 49:13

Husumpahon mangasahon goarKu sandiri, anggo kota Bosra gabe inganan na jorbut noma i na nitadingkon ni halak. Partataan ni halak ma i jana baenonna goarna i gabe bura. Sude angka huta na menek na humaliang i gabe tinggal sego-segona noma i sapanjangna. Au Tuhan, madung mandok songon i.”

JEREMIA 50:13

Hara ni na muruk Au, gabe tinggal sego-segona noma Babel jana gabe lobu. Sude halak na mamolus sian i gabe tarsonggot jana longang.

JEREMIA 51:37

Timbunan ni na marsegoan noma luat i, inganan partabunian ni anjing riar. Jorbut hilalaon ni halak marnidasa jana sahalak pe nada adong na ra maringanan disi.

JEHESKIEL 25:13

Hara ni i Hubaen boa-boa na giot uhumanKu Edom jana bunuonKu ganop jolma dohot sandok pahan-pahanan na adong disi. Mamolngit baenonKu sude tano i, sian kota Teman lopus tu kota Dedan; marmatean ma halahi hara ni podang.

JEHESKIEL 27:36

Limpot noma ho sapanjangna. Angka parboniaga di sandok tano on gabe tarsonggot hara ni biarna betak sai ro bagian sisongon i, tung na dangol do ujungmu mago ma ho salolot-lolotna.”

JEHESKIEL 35:15

Laing songon sonang ni rohamunu taran diida hamu Israel artangKi gabe mangalungun. Angka Dolok Seir, lalu sude tehe tano Edom, mamolngit noma i. Jadi gabe botoon ni sude jolma ma Au do Tuhan.’ ”

JEHESKIEL 35:3

Palalu ma tu halak luat i sanga aha na Hudok: ‘Musumu noma Au ale halak na maringanan di partoran Edom! Giot baenonKu tanomu gabe mamolngit.

JEHESKIEL 35:7

Lungun baenonKu angka hutamu na di partoran ni Edom jana bunuonKu sanga ise na mamolus sian i.

MIKA 6:16

Tarjadi pe sudena i patunda ni na niihutkonmunu ma angka parbuatan jahat na nibaen ni Raja Omri dohot Raja Ahab, anakna i. Diihutkon hamu do antong angka pangalaho ni halahi. Hara ni i roncohononKu ma hamu, jana siincahan dohot silayason ni sandok bangso ma hamu.”

ZEPANYA 2:15

Songon i ma na masa i di kota na mangasahon hagogoonna i, jana na mangetong dirina sonang so haribo-riboan. Diambang halak kota i do kota ni halahi i ma na gumodang di sandok tano on. Santak lungun ni luat i, nada adong halak maringanan disi asing sian angka binatang harangan na marasari disi! Tarsonggot ma sanga ise na mamolus di kota i jana mabiar pangkilalaanna.

PANGARATAION 29:22

Di hatiha na giot ro, idaon ni pomparanmunu ma dohot angka bangso na asing na sian luat sihadaoan angka parmaraan dohot parkancitan na niparo ni Tuhan tu tanomunu on.