JEREMIA 44:7 - BIBEL JAMITA NA DENGGAN

⁷ Jana di hatiha on, marsapa do Tuhan Na Markuaso i, Debata ni Israel sanga hara ni aha umbaen dipatupa hamu pangalaho na jahat sisongon i maradopkon dirimunu. Adong he na giot timpashononmunu sude jolma – halaklahi, dadaboru, angka dakdanak dohot na baru sorang – anso ulang adong be na teba sian bangsomunu?

JEREMIA 44:7 ပူးပေါင်းရင်းမြစ်များ

PODA 1:18

hape anggo angka halak na jahat i, suhar-suhar ni i do. Dihuar halahi do lubang, jana halahi sandiri do na runcur tu bagasan lubang i.

PODA 15:32

Halak na so ra diajar, na so mangargai dirina sandiri; tapi sanga ise na manangihon dapotan habisuhon.

PODA 5:22

Songon tirangkap do dosa ni jolma na jahat na manjorat halakna i sandiri.

PODA 8:36

Sanga ise na so mandapot au, mangarugii dirina sandiri, halak na manghasogohon au, hamatean do dihaholongi.”

JEREMIA 25:6

Diorai angka panurirang do hamu mamele dohot mangoloi tu angka debata. Diorai halahi do hamu marsomba gana-ganaan na nibaenmunu sandiri, angke na songoni do mambaen muruk Tuhan. Sugari diihutkon hamu parenta ni Tuhan i, nada hona uhumNia hamu.

JEREMIA 25:7

Hape Tuhan i sandiri mandok na so ditangihon hamu do Ia. Mur dialap-alapi hamu muse do anso gilap murukNia hara ni angka gana-ganaanmunu i. Hamu sandiri do mangalap-alapi uhuman tu hamu.

JEREMIA 26:19

Hape nada dibunu Raja Hiskia dohot rayat i si Mika. Mur mabiar roha ni si Hiskia tu Tuhan jana mangido ibo ni roha ia. Jadi gabe ditarik Tuhan mangulahi ondam-ondamNia i laho mangago halahi. Jana saonnari pe, ra dehe hita mangalapi hamagoan godang tu dirinta?”

JEREMIA 3:24

Anggo na manyomba tu Baal, gana-ganaan na pailahon i hum na mambaen hamamago do i tu angka dakdanaknami dohot tu lombu maradu biri-biri, i ma sasudena na dung dikarejohon ni ompunami mamungka sian narobi.

JEREMIA 38:17

Dung i hudok ma tu si Zedekia, songon on do didok Tuhan Na Markuaso i, Debata na nisomba ni halak Israel, “Muda dipasahat ho do dirimu tu angka tentara ni raja Babel i, nada bunuonna ho, jana kota on pe nada tutungonna. Malua do ho dohot dongan sabagasmu.

JEREMIA 42:20

na dung mambaen hasalaan na godang do hamu. Dipangido hamu anso martangiang au tu Tuhan Debatanta i salaho tu hamu, jana marjanji do hamu laho patuluskon sude na nidok ni Tuhan i.

JEREMIA 44:14

Sian halak Juda na teba i na kehe tu Mesir laho maringanan disi, sahalak pe nada adong na malua sanga mangolu. Sahalak pe sian halahi nada adong be na mulak tu Juda, haru pe lungun sajo roha ni halahi. Tutu do nada adong be na mulak sian halahi asing ni na mangungsi piga-piga halak.”

JEREMIA 44:8

Biasi sai mangalap-alapi hamu anso muruk Au? Ro hamu jana maringanan di Mesir on, lalu marsomba hamu tu gana-ganaan jana mamelehon haul tu angka debata ni luat on! Biasi ra hamu mangalapi hamamagomunu? Giotmunu ma he marlayas baenon ni bangso na satano on jana goarmunu pakeonna gabe bura?

JEREMIA 51:22

Hupake do ho laho mambunu halaklahi dohot dadaboru, na matobang bope na poso, bujing-bujing dohot doli-doli.

JEREMIA 7:19

Hape anggo satutuna nada rohangKu na nipahancit ni halahi, tapi dirina sandiri do, gabe maila ma halahi.

JEREMIA 9:21

Ma pola masuk hamatean sian jandela, madung manyaroso tu bagasan bagas godang; disaroso angka dakdanak di angka dalan songon i muse angka na poso di alaman.

ANDUNG 2:11

Marbosoli matangku hara ni na so mantak tangis, marhancit tondingku songon na dihoris. Loja au holosan paida-ida haruruncur ni bangso i, na baru sorang dohot dakdanak marompasan di dalan ni kota i.

ANDUNG 2:22

Dihara Ho angka musungku mambaen pesta na gok hakejamon humaliang au. Di ari ni hamumurukMu, sahalak pe nada tarbaen malua sian uhumanMu. Angka na huhaholongi dohot na hupasari-sari ma pola dibunu angka musu i.

JEHESKIEL 33:11

Dokkon ma tu halahi, mangasahon Au na mangolu, Tuhan Debata nada jop rohangKu muda mate halak parjahat i; tapi sugari mulak ma nian ia manadingkon angka dosana anso tongtong ia mangolu. Ale bangso Israel, antak hamu ma mambaen na jahat! Biasi angkon sai mate hamu?”

JEHESKIEL 9:6

Bunu hamu ma sude halaklahi dohot dadaboru, na matobang dohot na poso, na marsaripe dohot dakdanak. Tapi ulang hahua hamu anggo na mamake tanda di bohina. Jadi pungka hamu ma sian on, sian inganan na badiangKu.” Jadi dipungka halahi ma karejo i, dibunu halahi ma angka pamimpin ni Israel na topet marjongjongan di Bagas Na Badia i.

HABAKUK 2:10

Hape nian na mangalapi hahaila tu dongan sabagasmu sajo do na nibaenmi. Manjalak tu rugimu sandiri do ho di na nisamunmu angka bangso.

BILANGAN 16:38

Madung badia barang-barang i hatiha na nipasahat di ginjang langgatan ni Tuhan. Dung i buat ma inganan ni api ni halak na hona uhum hara ni dosa ni halahi i. Angkon topaon barang-barang i gabe nipis-nipis, jana baen ma sian na dung nipis i gabe tutup ni langgatan. Gabe parningotan ma i di bangso Israel.”

PANGARATAION 32:25

Parporangan mambaen marmatean di dalan-dalan, na di bagas pe didondoni habiaran. Naposo nauli bulung jagar-jagar ni bangso ma giot mate na baru sorang, na maradu tobang pe nada dia imbarna be.

JOSUA 6:21

Sude halak na adong di kota i, na tobang na poso, halaklahi dadaboru dibunu do sude dohot podang. Sude pahan-pahanan lombu, biri-biri dohot halode pe dibunu.

HAKIM-HAKIM 21:11

laho mamunu sandok jolma na di Jabes, dohot dadaboru bope dakdanak jana songon i muse dohot dadaboru na so bujing-bujing be.

1 SAMUEL 15:3

Antong, kehe ma ho jana porangi ma halak Amalek i jana segohon ma sandok arta ni halahi. Ulang adong tadingkon sanga na aha pe; bunu sude halaklahi, dadaboru, dakdanak dohot na baru sorang; lombu, biri-biri, unto dohot halode.”

1 SAMUEL 22:19

Laing diparentahon si Saul muse dope anso dibunu sude halak Nob, kota ni malim i; halaklahi, dadaboru, dakdanak dohot na baru sorang, songon i lombu, halode dohot biri-biri – diabiskon sude.