JEREMIA 44:4 - BIBEL JAMITA NA DENGGAN

⁴ Sai torus do marpupu Husuru naposongku angka panurirang, na mangorai hamu mambaen hajahatan na Huhagigihon i.

JEREMIA 44:4 ပူးပေါင်းရင်းမြစ်များ

2 JUJUR TAON 36:15

Marpupu do nian disuru Tuhan, Debata ni ompu ni halahi angka utusanNa laho paingotkon bangsoNa i, dibaen holong do rohaNia mida halahi dohot BagasNia i.

NEHEMIA 9:30

Sian taon tu taon sai sobar Ho paingotkonsa; marhite panurirang, didok TondiMu tu halahi. Hapengani ditutup bangsoMi do pinggolna, lalu dipasahat Ho ma tu angka bangso sude tanona.

NEHEMIA 9:34

Angka ompunami, raja, malim dohot angka hatobangonna, sude do mangalanggar uhumMu jana palayaskonsa. Parenta dohot gora na nilehenMu sude, umpe diterge jana nada dibege.

JEREMIA 16:18

BaloskononKu ma dosa dohot hajahatan ni halahi i marhite uhuman dua lompit, hara ni na dung hodar dibaen halahi tanongKu marhite gana-ganaan na bahat na so marhosa songon bangke.”

JEREMIA 26:5

Angkon laing parrohahononmunu muse do hata ni naposongKu, i ma angka panurirang na sai marpupu Husuru tu hamu. Hape nada ra hamu mangoloi sanga aha na didok ni halahi.

JEREMIA 29:19

Tarjadi pe sudena i tu halahi hara ni na so ra do halahi mangihutkon tonangKu na sai torus Hupalalu tu halahi marhite angka panurirang, i ma angka naposongKi. Nada ra halahi mamparrohahon tonangKi.

JEREMIA 32:33

Madung ditadingkon halahi Au jana haru pe Huajar halahi marpupu, nada ditangihon halahi i jana nada ra mangastui.

JEREMIA 32:34

Mur hodar muse dope dibaen halahi bagas na dipajongjong baen inganan paribadatan tu Au, marhite na mamayakkon angka gana-ganaan na nihagigihon di inganan i.

JEREMIA 32:35

Dipambaeni halahi do angka langgatan tu Baal di Rura Hinom, jana dipelehon halahi angka dakdanak halaklahi dohot dadaboru ni halahi tu Debata Molok. Hape nian na so jungada do Husuru halahi patupahon na songon i, salang tubu di bagasan rohangKu pe nada jungada sisongon i paboa na giot baenon ni halahi parbuatan na songon i jorbutna dohot na mambaen halak Juda mardosa.”

JEREMIA 35:15

Torus do marpupu Husuru naposongKu, sude angka panurirang tu hamu, jana madung dipaingot halahi hamu laho padenggankon pangalahomunu jana anso mantak hamu mambaen jahat. Dipaingot halahi do hamu anso ulang mamele tu angka debata jana anso ulang mangoloi tu halahi, anso tarbaen hamu torus maringanan di luat na dung Hulehen on tu hamu dohot tu ompumunu. Hape nada ra hamu mamparrohahon jana nada ra hamu manangihon.

JEREMIA 35:17

Hara ni i, Au Tuhan Na Markuaso, Debata ni Israel, paroonKu ma tu hamu halak Juda dohot Jerusalem – sandok parmaraan na giot dondonkononKu tu hamu, songon na dung Hudokkon i. Hubaen pe sudena i, hara ni na so ra do hamu manangihon muda mangkuling Au tu hamu jana nada ra hamu mangalusi di na pio-pio Au tu hamu.”

JEREMIA 7:13

Haru pe marpupu Au mandok hata tu hamu, na so ditangihon hamu do i. Sude do dosa i dipambaeni hamu, jana nada ra hamu mangalusi muda Hupiohon hamu.

JEREMIA 7:17

Diida ho sandiri do parkarejoan ni halahi di angka kota na di Juda dohot di angka dalan na di Jerusalem!

JEREMIA 7:18

Dipalagut angka dakdanak do soban, halaklahi na magodang pagarahon api jana dadaboru mancampur adonan laho pature kue di debata boru-boru na nigoaran ni halahi Ratu Banua Ginjang. Jana na pahancit rohangKu dihaulkon halahi muse ma anggur tu angka debata.

JEREMIA 7:25

Mamungka sian na haruar ompumunu sian Mesir lalu tu sadari on sai Husuru do angka naposongKu, angka panurirang tu hamu.

JEHESKIEL 16:36

Songon on do hata ni Tuhan Debata, “Madung dibuka ho bajumu jana songon siboru jalang dilehen ho pamatangmu tu angka haholongan ni rohamu dohot tu angka gana-ganaanmu sihagigian i. Dibunu ho angka dakdanakmu jana dipelehon ho tu angka gana-ganaan i.

JEHESKIEL 16:47

Sombu dehe dihilala ho mangihutkon indege ni halahi dohot maniru parange ni halahi sihagigian i? Nada podo! Santongkin nari jumorbut muse dope ho sian halahi.

JEHESKIEL 18:31

Antak hamu ma sude hajahatan na nibaenmunu jana paimbaru hamu ma roha dohot pikiranmunu. Biasi angkon gumonan hamu mate?

JEHESKIEL 8:10

Masuk ma au antong jana huida ma. Digambari do dingding ni inganan i dohot sude ragam ni ulok dohot angka binatang na haram na asing i, songon i muse ragam-ragam ni gambaran ni gana-ganaan na nisomba ni angka halak Israel.

DANIEL 9:6

Nada hami tangihon angka panurirang, angka naposoMi na mandok hata mangasahon goarMu tu angka rajanami, tu angka na markuaso, tu angka ompunami maradu tu sude bangsonami.

ZAKARIA 7:7

Nada he on ma hata ni Tuhan na nipalalu marhite angka panurirang na jolo, hatiha Jerusalem dohot angka kota na humaliangna diingani angka jolma di bagasan sonang, dohot tano Negeb jana dohot luat partoran laing di ingani?

1 PETRUS 4:3

Tuk ma hatiha na salpu i di na nibaenmunu sanga aha por ni roha ni angka jolma na so mananda Debata. Nada denggan ngolumunu i. Giot-giot ni sibuk do na niihutkonmunu, na mabuk, na marpesta-pesta, na minum-minum dohot na marsomba gana-ganaan, i ma sada parange na niantahan ni Debata.