JEREMIA 43:2 - BIBEL JAMITA NA DENGGAN

² Jadi didok si Asarya anak ni si Hosaya dohot si Johanan anak ni si Kareah na bulbul i ma tu au, “Margabus do ho. Nada disuru Tuhan Debatanami ho mangorai hami anso ulang kehe maringanan tu Mesir.

JEREMIA 43:2 ပူးပေါင်းရင်းမြစ်များ

PAMUNGKAAN 19:14

Jadi kehe ma si Lot mandapotkon dua halak doli-doli tunangan ni borunia i, jana didok ia ma, “Ompoti hamu ma ruar sian kota on, harana giot abiskonon ni Tuhan ma kota on.” Tapi diambang halahi na margonjak do si Lot.

2 JUJUR TAON 36:13

Dipaksa Raja Nebukadnesar ma si Zedekia marsumpa mangasahon Debata paboa na setia noma ia. Tapi di pudi, mangalo ma si Zedekia tu si Nebukadnesar. Sian angka dosania i pe nada ra muba si Zedekia. Jogal do rohania maradopkon Tuhan, Debata ni Israel jana nada ra ia mulak tu Tuhan.

MASMUR 119:21

Digorahon Ho do halak siginjang roha, diburai Ho do halak na manyimbil sian parentaMu.

MASMUR 12:3

Antak ma hata ni pangalancap, ale Tuhan, pahohom ma parpamangan na bidang.

MASMUR 123:4

Tuk ma bahatna incak ni halak na kayo tu hami dohot incak-incak sian halak na jungkat roha i.

HARURUAR 5:2

Disapai raja Mesir i ma, “Ise dehe Tuhan i? Biasi angkon tangihononku i, jana paloasonku kehe bangso Israel? Nada hutanda Tuhan i, jana halak Israel pe nada huloas kehe.”

HARURUAR 9:17

Hape laing ginjang dope rohamu jana nada dipaloas ho kehe bangsongKi.

PODA 16:5

Dihagigihon Tuhan do sude halak siginjang roha; nada dipadiar halahi malua sian uhumanNa.

PODA 30:9

Harana, muda ompot kayo au, betak na gabe dokkononku do, na so porlu Ho di au. Jana muda marpogos au, betak na manangko ma au, jadi gabe hodar goarMu.”

PODA 8:13

Biar mida Tuhan dos do i dohot na magigi mida hajahatan; nada huhagioti ginjang ni roha dohot hagakgakan. Goyak do rohangku mida pangalaho hajahatan, dohot hata-hata na mambaen haliluan.

JESAYA 7:9

Samaria i ma kota sabungan ni Efraim, anak ni si Remalya ma rajana. Muda nada porsaya hamu, bagi na bia pe nada martahan hamu.”

JESAYA 9:8

Madung dipaboa Tuhan uhum tu Israel angka pinompar ni si Jakob.

JEREMIA 13:15

Ale halak Israel, madung didok Tuhan, ulang ginjang rohamu, tangihon ma tuSia!

JEREMIA 18:18

Didok halahi ma, “Tole ma martahi hita mangalo si Jeremia. Haru so adong pe ia laing na adong do angka malim na mangalehen pangajaran, laing na malo do angka halak na bisuk mangalehen sipaingot; jana laing tarbaen angka panurirang do palaluhon angka tona ni Debata tu hita. Beta ma hita aduhon ia tu paruhuman jana nada be patangi-tangionta angka hatania.”

JEREMIA 40:8

Jadi kehe ma si Ismael anak ni si Netanya, si Johanan anak ni si Kareah, si Seraya anak ni si Tanhumet, dohot angka anak ni si Efai na sian Netofa, dohot si Jesanya na sian Maaka kehe rap dohot angka halakna be mandapotkon si Gedalya di Mispa.

JEREMIA 41:16

Dung i dipalagut si Johanan rap dohot angka perwira i ma angka tentara, dadaboru, angka dakdanak dohot angka pagawe ni bagas godang na nitahan ni si Ismael i dung jolo dibunu ia si Gedalya.

JEREMIA 42:1

Dung salpu i sude marroan ma halahi, na menek dohot na magodang, rap dohot angka parpangkat i, dohot ma disi si Johanan anak ni si Kareah dohot si Asarya anak ni si Hosaya,

JEREMIA 42:20

na dung mambaen hasalaan na godang do hamu. Dipangido hamu anso martangiang au tu Tuhan Debatanta i salaho tu hamu, jana marjanji do hamu laho patuluskon sude na nidok ni Tuhan i.

JEREMIA 42:5

Didok halahi ma tu au: “Padiar ma Tuhan gabe saksi na sintong jana na bisa dihaporsayai maradopkon hami, muda inda hami oloi sude hata na dung disuru Tuhan, Debatamu tu hami.

JEREMIA 43:1

Madung hupalalu sude tona sipalaluonku na sian Tuhan, Debata ni Israel tu rayat i.

JEREMIA 44:16

“Nada ra hami manangihon sanga aha na nidokmu tu hami mangasahon goar ni Tuhan.

JAKOBUS 4:6

Haru songon i pe, gumogo dope asi ni roha ni Debata na nilehenNa i di hita ulang pado hagiot ni rohanta i. Hara ni i do umbaen na laing tarsurat di Buku Na Badia i muse, “Dialo Debata do halak siginjang roha, tapi asi do rohaNia anggo tu halak na toruk roha.”

1 PETRUS 5:5

Laing songon i ma hamu angka na poso! Oloi hamu ma angka halak na matobang. Angkon sude do hamu patoruk dirina jana marsioloan di bagasan haserepon ni roha. Harana tarsurat do di Buku Na Badia i songon on, “Dialo Debata do halak siginjang roha, tapi dihaholongi Ia do halak na serep roha.”