JEREMIA 4:13 - BIBEL JAMITA NA DENGGAN

¹³ Ligi da, marmuldopan musu i songon ombun. Angka kareta porangna i songon halingsungsung, angka kudona i humipas sian unggas rajawali. Marjaya ma hita on! Mago ma hita!

JEREMIA 4:13 ပူးပေါင်းရင်းမြစ်များ

2 SAMUEL 1:23

Si Saul dohot si Jonatan na dihaholongan jana na lambok, sai marsada do i di hangoluan bope di hamatean; humipas do halahi sian unggas rajawali, gumogo sian singa na gogo halahi.

JESAYA 13:5

Na marroan sian angka luat sihadaoan do i sian angka ujung ni tano on. Di hamuruhonNa i giot pusaon ni Tuhan do sude portibi on.

JESAYA 19:1

On ma tona salaho tu Mesir. Ro do Tuhan tu Mesir manengget ombun na hipas. Humitir ma angka gana-ganaan ni Mesir di joloNia jana menek ma roha ni halak Mesir marnidasa.

JESAYA 3:8

Satutuna, Jerusalem madung maronco, jana Juda pe madabu, harana hata dohot pambaenan ni halahi mangalo Tuhan jana mangalo hasangapan ni harajaanNa.

JESAYA 5:28

Tajom do anak ni pana ni halahi jana siorna i ripe manembakkon. Sisilon ni kudona i songon pir ni batu loting, jana parputar ni roda ni karetana i songon hipas ni halingsungsung.

JESAYA 66:15

Giot ro ma Tuhan marhite api. Jana karetaNia songon halingsungsung, laho palaluhon rimasNa na marapi purun.

JEREMIA 10:19

Mangangguk ma halak Jerusalem, “Banga do bugangnami jana nada be tarpamalum. Najolo hami ambang do tartaon hami parkancitan on, hape aha soada.

JEREMIA 4:12

Tapi alogo na gogo na ro sian parentangKu do i, Au sandiri do saonnari na mandabu uhum tu halahi.

JEREMIA 4:31

Tarbege do tu au sora ni angguk-angguk songon sora ni ina na giot tubu-tubuan; songon dadaboru parsaurangan na manubuhon dakdanakna, songon i ma sora ni boru Sion mongkik-ongkik. Gapa-gapa tanganna i jana sai humolos-holos ia, “Marjaya ma au on – hona bunu au dibaen musu!”

JEREMIA 46:18

Au do Tuhan Na Mangolu, Au do raja, Tuhan Na Markuaso. Songon Dolok Tabor na gumincat sian tonga-tonga ni angka dolok dohot Dolok Karmel na marsijongjong di ginjang ni sisik ni laut, songon i ma hagogoan ni na ro i mamorangi ho.

JEREMIA 48:40

Didok Tuhan ma, “Songon halihi na habang, tudos tusi ma sada bangso giot ro manyoro Moab.

JEREMIA 49:22

Songon halihi na habang, songon i ma panyoro ni musu i tu Bosra. Di ari i, mangae ma tentara ni Edom songon dadaboru na giot hipas.”

JEREMIA 6:23

I ma angka na marsinjatahon pana dohot podang; na jingar do halahi jana na so umboto ampun. Songon husasak ni laut na marombak, songon i ma sora ni parlojong ni kudo ni halahi na dipacu laho mamorangi Jerusalem.”

JEREMIA 9:19

Tarbege ma sora ni na tangis di Sion, “Mago do hita jana dipaila. Tadingkononta ma hape tanonta, masego ma angka bagasta.”

ANDUNG 4:19

Humipas do na mangayak hami sian unggas rajawali; di dolok dohot di halongonan dikojar jana diolat halahi do hami.

JEHESKIEL 26:10

Songon i ma bahat ni kudo ni halahi jabat do sap sude ho abuan na habang hara ni pandege ni kudo i. Humutur angka tembokmu hara ni pangkutur ni sora ni parangan na markudo na maroban kareta inganan ni bohal dohot kareta porang muda mamolus halahi sian angka pintu ni horbangan ni kota na dung marsegoan i.

JEHESKIEL 38:9

Ro ma ia dohot tentarania dohot bahat bangso mangudurkon ia mamorangi songon halingsungsung lalu mangalingkup luat i sude songon ombun.”

DANIEL 11:40

Muda marayak marujung ma kuaso ni raja Siria i, ro ma raja ni Mesir mamorangi ia. Jadi baloson ni raja ni Siria ma parangan i lopus marujung. Padohotonnia ma bahat kareta porang, kudo, dohot kapal. Mangaroro ma ia songon aek magodang jana solatonna bahat luat.

DANIEL 7:4

Na parjolo tompana songon singa, tapi marhabong songon habong ni rajawali. Di na hutatap tusia, manigor ma mumpat lalu taldus habongna i; tarangkat ma ia sian tano jana dipajongjong di dua pat songon jolma jana dilehen ma roha ni jolma tusia.

HOSEA 8:1

Didok Tuhan ma, “Palu ma sarune, paboa na ro parmaraan! Tudos tu halihi na manangkup soroanna do musu ro mamorangi tanongKi! Dilaosi bangsongKi do parjanjianKu dohot halahi jana dialo angka pangajaranKu.

MIKA 2:4

Anggo di hatiha i, caritohonon ni halak ma na nitaonmunu gabe tudosan ni parmaraan, jana baenonna ma ende hamarsahan songon on, ‘Madung mago hita! Pusako ni bangsongku madung disuhat dohot tali, jana nada adong be halak na paulakkonsa, angka kobunta pe madung di bagi-bagihon tu halak na manaban hita.’ ”

NAHUM 1:3

Nada mopop muruk ni Tuhan; lobi do kuaso diSia jadi sanga ise na marsala nada dipalua Ia sian uhumanNia. Sanga na di dia Tuhan mardalan, disi do ro halingsungsung; jana abuan ni patNia do ombun.

HABAKUK 1:8

Humipas do kudo ni halahi sian babiat jana gumanas do sian sorigala na malean borngin-borngin. Marroan do angka paranganna na markudo sian angka luat na dao; marroan halahi songon halihi na manyoro soroanna.

ZAKARIA 6:1

Huida ma parnidaan na asing. Anggo sanoli on, huida ma opat kareta porang na ruar sian antara ni dua dolok tumbaga.

MATEUS 24:30

Dung i pe anso tarida tanda ni Anak Ni Jolma i di langit. Anggo disi tangis ma sude bangso na satano on, marsak. Diida halahi ma Anak Ni Jolma i ro di bagasan ombun mardongan kuaso dohot hasangapan godang.

PANGARATAION 28:49

Paroon ni Tuhan ma sada bangso na so mangarti ho hatana, sian ujung ni tano on laho mangalo ho. Songon rajawali do halahi manyoro ho.

HALUMBAAN 1:7

Ligi da, na ro ma Ia dihaliangi ombun! Idaon ni sude halak ma Ia, dohot halahi na maniham Ia. Mangangguhi ma sasudena bangso na di tano on manangisi dirina be hara ni Ia. Olo, tutu do na songon i! Amen!