JEREMIA 39:8 - BIBEL JAMITA NA DENGGAN

⁸ Disurbu angka halak Babel i muse ma bagas godang ni raja i dohot angka bagas ni rayat lalu diparrumpakkon ma angka tembok ni Jerusalem i.

JEREMIA 39:8 ပူးပေါင်းရင်းမြစ်များ

2 RAJA-RAJA 25:8

Di tanggal pitu bulan lima taon pasambilan bolaskon pamarentaan ni si Nebukadnesar raja ni Babel i, ro ma sada halak na margoar si Nebusaradan tu Jerusalem. Hatobangon dohot panglima ni tentara ni si Nebukadnesar do ia.

2 JUJUR TAON 36:19

Ditolbakkon ia ma tembok ni kota Jerusalem jana disurbu ia kota i dohot Bagas Ni Tuhan maradu bagas godang maradu sude angka barang sigodang arga na adong dope di bagasan angka bagas godang i.

NEHEMIA 1:3

Dicaritohon halahi ma, hapengani na mahancit do ngolu ni angka halak na tarbuang na dung marmulahan mangulahi tu tanona i hara ni na nipalayas ni angka bangso na humaliangna i. Boti muse, laing na maropuk-ropuk dope masarsar angka tembok ni kota Jerusalem jana angka pintu horbanganna i pe nada podo dipadenggan mamungka sian na hona surbu di hatiha na salpu.

MASMUR 79:7

Angke madung dibunu halahi bangsoMi, jana disegohon halahi tanona i.

JESAYA 5:9

Hubege do didok Tuhan Na Markuaso i, “Anggo angka bagas na godang-godang jana na jeges-jeges on, marumar noma i sudena nada adong be manginganisa.

JEREMIA 17:27

Tarjadi ma sudena i muda dung marpangoloion hamu tu Au jana diparbadia i hamu Ari Sabat i songon ari na mardohonan. Ulang maroban barang bagi aha pe hamu mamolus sian angka horbangan ni Jerusalem anggo di ari i. Muda dilanggar hamu do angka na Huparentahon i, tutungonKu abis angka horbangan ni Jerusalem i dohot angka bagas godang na disi jana nada haintopan api i.’ ”

JEREMIA 21:10

Madung Huputuskon do laho mangaroncohon kota on jana nada adong pangusayangna. Pasahaton noma kota on tu raja Babel; giot surbuonnia kota on lopus abis sudena. Au Tuhan madung mandok songon i.”

JEREMIA 32:29

jana surbuonna lopus abis. Mosok muse ma angka bagas na gabe boncir ni hamumurukKu, harana di ginjang ni tarupna i ma ditutungi halak dupa tu Baal dohot manduruskon anggur baen pelean tu angka debata.

JEREMIA 34:2

Disuru Ia ma au kehe tu si Zedekia raja ni Juda mandok songon on, “Au Tuhan Debata ni Israel, giot pasahatonKu kota on tu raja ni Babel jana surbuonnia noma i lopus abis.

JEREMIA 34:22

ParentahononKu ma anso mulak halahi tu kota on, jadi serangon ni halahi ma, masuhanna lalu surbuonna. Giot baenonKu angka kota ni Juda songon halongonan na so diingani ni jolma. Au Tuhan, madung mandok songon i.”

JEREMIA 37:10

Haru pe umpamana ditaluhon hamu sude tentara ni Babel i lopus tading hum angka jolma na margasai di bagasan angka bandar ni halahi, laing jongjong do halahi manyurbu sude kota on.”

JEREMIA 38:18

Tapi muda nada ra ho manyora, madabu ma kota on tu tangan ni halak Babel; surbuon ni halahi ma kota on lopus abis, jana ho pe nada tarbaen malua.”

JEREMIA 5:10

SuruonKu ma musu i laho manyegohon kobun anggur ni halahi, tapi nada jabat pola mambaen buang kobun i. SuruonKu ma musu i manggotap ranting ni angka bona ni anggur ni halahi, angke nada Au antong nampuna angka rantingna i.

JEREMIA 7:20

Au Tuhan Debata, padondonkononKu ma murukKu na jorbut i tu bagas paribadatan on, tu jolma dohot tu binatang dohot tu suan-suanan dohot tu suha ni tano. Marjimbur-jimbur ma murukKu songon api na so haintopan.”

ANDUNG 1:10

Dirampas angka musuna sude sinadonganna; diida ia halahi masuk tu Bagas Ni Debata, haru pe diorai hian mambaen na songon i di halak na so masuk bangso ni Tuhan i.

ANDUNG 2:2

Ganop kota na adong di Juda, dironcohon Ia nada adong ibo ni roha. Angka benteng na mangondingi luat i dionjarkon Ia lopus marumpahi. Didabuhon Ia lopus marbile noma harajaan i dohot angka pamimpinna.

ANDUNG 2:7

Ditulak Tuhan do langgatanNa na badia i. Nada ra be Ia mangakui bagasNia sandiri; dipadiar Ia musu i mangaroncohon angka tembokna i. Di ingananta na salpu i maribadat marjop ni roha, marsurak musu songon na marpesta.

JEHESKIEL 16:41

Surbuan ni halahi ma angka bagasmu jana suruonna angka dadaboru manyaksihon paruhumanmu. Songon i ma baenonKu mangantak parhamainonmi. Nada be ho marbagi-bagi silua tu angka haholongan ni rohamu.

JEHESKIEL 23:47

Padiar ma didangguri halahi dohot batu jana dibunu dohot podang. Padiar ma dibunu angka dakdanak ni halahi jana disurbu angka bagas ni halahi.

JEHESKIEL 33:21

Di tanggal lima bulan sampulu, di taon padua bolaskon habuangannami, ro ma sada halak na malua sian Jerusalem jana dipaboa ia ma tu au na dung madabu kota i.

AMOS 2:5

Hara ni i, tongosonKu ma api tu Juda jana surbuonna ma lopus abis angka benteng ni Jerusalem.”

MIKA 3:12

Hara ni hajahatanmi, pangkuran noma Sion songon ladang. Jerusalem gabe timbunan ni angka batu, jana dolok ni Bagas Na Badia gabe gasgas.