JEREMIA 36:9 - BIBEL JAMITA NA DENGGAN

⁹ Di bulan sambilan taon palimahon dung mamarenta si Joyakim raja ni Juda, puaso ma rayat anso maruli ibo ni roha sian Tuhan. Puaso do sude halak na maringanan di Jerusalem dohot angka halak na ro sian kota-kota na di Juda.

JEREMIA 36:9 ပူးပေါင်းရင်းမြစ်များ

2 JUJUR TAON 20:3

Gabe mabiar ma si Josafat lalu martangiang ma ia mangido panogu-noguon sian Tuhan. Dung i diparentahon ia ma anso puaso sude rayat i.

NEHEMIA 9:1

Tanggal dua pulu opat laing di bagasan bulan i, marlagut ma halak Israel. Puaso ma halahi laho patuduhon manyosal halahi di angka dosa ni halahi. Madung asing halahi sian sude halak na asing. Songon tanda ni na marsak, mamake abit goni do halahi jana dipambaeni halahi ma tano tu ulu ni halahi. Dung salpu i jongjong ma halahi mangoku sude dosa ni halahi dohot dosa ni angka ompu ni halahi.

ESTER 4:16

“Palagut ma sude halak Jahudi na di Susan anso martangiang salaho tu au. Ulang ma hamu mangan tolu ari tolu borngin lolotna. Au sandiri pe dohot angka bujing-bujing na mangoloi au laing puaso do. Dung sidung i, mangadop ma au tu raja i, haru pe mangalanggar undang-undang do i. Muda angkon mate ma au hara ni i, padiar ma mate au tusi!”

JEREMIA 36:1

Di taon paopatkon dung si Joyakim anak ni si Josia gabe raja di Juda, didok Tuhan ma tu au,

JEREMIA 36:22

Bulan sambilan hatiha i jana topet do raja i hatiha juguk di jolo ni parapian di bagas godang musim ngalinia.

JEREMIA 36:6

Tapi sanoli on muda hatiha puaso halak, angkon kehe do ho tusi jana siseonmu gogo sude na hudokkon i tuho, anso sude dibege halahi na nidok ni Tuhan tu au. Padalan ma i di inganan na tumbuk begeon ni sude halak tu ho, dohot tu halak Juda na marroan sian angka kota ni halahi be.

JOEL 1:13

Hamu ale angka malim na markobasi di langgatan, pake hamu ma abit goni anso martangisan. Masuk ma tu Bagas Ni Tuhan marbornginma laho mangandung disi, angke nada adong be haul anggur dohot gandum.

JOEL 1:14

Parentahon bangsomi anso puaso, patupa hamu ma sada ari parpunguan bolon! Ontang ma angka pamimpin maradu hatobangonna maradu sude angka na maringanan di luat on, anso marroan tu Bagas Ni Tuhan Debata, laho martangiang jana pio-pio mangido tolong tuSia.

JUNUS 3:5

Halak Ninive porsaya tu Debata, dung i diumumkon ma puaso jana angka halak na magodang sangape dakdanak mamate abit paboa marsak ni roha.

ZAKARIA 8:19

“Gabe ari pesta na gok jop ni roha dohot hasonangan ma di halak Juda puaso na didalankon di bulan paopatkon, palimahon, papituhon dohot pasampuluhon. Haholongi hamu ma hatigoran dohot dame!”

HAKIM-HAKIM 20:26

Jadi gabe kehe muse ma halak Israel tu Betel tangis tu Tuhan. Puaso do halahi disi lopus borngin jana dipasahat halahi do angka haul pardonganan dohot angka haul situtungon.

1 SAMUEL 7:6

Jadi marlagut ma halahi sude di Mispa. Ditimbai halahi ma aek jana diparduruskon halahi ma i gabe songon haul tu Tuhan, jana dipaudut halahi tu na marpuaso tangging sadari i. Didok halahi ma, “Madung mardosa hami tu Tuhan.” (Di Mispa ma dipungka si Samuel pasidungkon angka parkaro parsalisian ni halak Israel.)