JEREMIA 36:3 - BIBEL JAMITA NA DENGGAN

³ Betak na ra do halak Juda mantak mambaen na jahat muda dibege halahi taringot tu sude parmaraan na giot dondonkononKu tu halahi. Jadi ampunanKu do dosa dohot hajahatan ni halahi.”

JEREMIA 36:3 ပူးပေါင်းရင်းမြစ်များ

NEHEMIA 1:9

Tapi muda mulak hami mangulahi tu Ho jana hami oloi parentaMu, jadi palagutonMu ma hami mangulahi na dung dipaserakMi haru pe hami di angka ujung ni portibi on. Dung i paulahonMu ma hami tu inganan na dung ditodoMi gabe inganan maribadat tu Ho.

MASMUR 139:24

Pareso ma betak na sala do dalan na hubolus, togu ma au di dalan na manongtong.

JESAYA 6:10

Pamajal ma pikiran ni angka jolma i, paingol pinggolna i jana papitung matana i, anso ulang marnida sanga marbinege sanga mangarti jana anso ulang ro tu Au jana malum.”

JEREMIA 18:11

Didok Tuhan ma tu au, “Saonnari paboa ma tu angka halak Juda dohot tu halak na mangingani Jerusalem paboa na mambaen sangkap do Au saonnari laho mangalo halahi, dohot pasidungkon uhuman tu halahi. Suruhon ma anso diantak halahi parngoluon ni halahi na mardosai i jana dipadenggan halahi pangalaho dohot parbuatan ni halahi.

JEREMIA 18:8

hape muba roha ni bangso i sian dosana, jadi gabe Husundati do nietKi.

JEREMIA 23:14

Tapi madung Huida jumahat dope pangalaho ni angka panurirang di Jerusalem. Margabusi do halahi dohot marmainan jana diurupi halahi do halak na jahat, gabe umpe adong sahalak pe na ra pauba rohana. Anggo di Au mandosdos do halahi sudena rap parjahat songon halak Sodom dohot Gomora.”

JEREMIA 24:7

LehenonKu ma tu halahi por ni roha laho mamboto bahaso Au do Tuhan. Jadi gabe bangsongKu ma halahi, jana Au gabe Debata ni halahi, angke mulak do halahi tu Au sian sandok rohana.

JEREMIA 26:3

Betak na ra do bangso i manangihon, gabe mantak mambaen na jahat gabe Husundati rohangKu laho mangago halahi hombar tu pambaenan ni halahi na jahat i.”

JEREMIA 35:15

Torus do marpupu Husuru naposongKu, sude angka panurirang tu hamu, jana madung dipaingot halahi hamu laho padenggankon pangalahomunu jana anso mantak hamu mambaen jahat. Dipaingot halahi do hamu anso ulang mamele tu angka debata jana anso ulang mangoloi tu halahi, anso tarbaen hamu torus maringanan di luat na dung Hulehen on tu hamu dohot tu ompumunu. Hape nada ra hamu mamparrohahon jana nada ra hamu manangihon.

JEREMIA 36:7

Betak na gabe martangiang do halahi tu Tuhan baenon ni i jana muba halahi sian angka parbuatan ni halahi na jahat i. Sun do muruk ni Tuhan tu halahi jana mangondam do tu halahi.”

JEHESKIEL 12:3

Hara ni i, ale anak ni jolma, taran torang dope ari, hobasi ma barang-barangmu di bagasan sada gendongan songon na somal dibaen halak pangungsi. Painte so dapot borngin, kehe ma ho di torang ni ari di jolo ni halak songon halak na dioban tu buangan. Baen ma lubang di dingding ni bagasmi jana oban ma gendonganmu na marisi angka barang-barangmu ruar sian lubang i. Porsan ma gendonganmi di abaramu, kehe ma ho tu golap-golap i; papitpit ma matami anso ulang diida ho dalan na nibolusmi. Padiar ma dipaida-ida bangso Israel sude na nibaenmi, anso gabe sipaingot di halahi. Betak na ra do halahi mamoto bahaso na jahat pangalo halahi.”

JEHESKIEL 18:23

Adong he didok rohamu, Au Tuhan Debata marsonang ni roha muda mate halak na jahat i? Nada songon i! GiotKu nian ditadingkon ia ma angka dosania anso laing mangolu ia.

ZEPANYA 2:3

Jalahi ma Tuhan, ale hamu angka na toruk roha di luat on, na mangoloi parentaNia; jalahi ma hatigoran, jalahi ma toruk ni roha; betak na adong dope di hamu parlinggoman di hatiha hamumuruk ni Tuhan.

MATEUS 13:15

Harana, ma jogal roha ni halak on, ma gabe maingol pinggol ni halahi, dipapitpit halahi muse do mata ni halahi. Tarjadi pe i anso unang marnida do mata ni halahi, jana anso ulang marbinege pinggol ni halahi, jana anso ulang mangastui roha ni halahi, anso ulang ro halahi tu Au, jana gabe pamalumonKu ma halahi.’ ”

MARKUS 4:12

Dibaen Debata pe songon i, anso ‘Torus do bolnang halahi mangaligi, tapi umpe diidasa, torus do halahi manangihon, tapi umpe mangarti, angke sugari diida jana diastui halahi gabe ro ma halahi tu Debata dung i gabe ampunan ni Debata ma halahi.’ ”

LUKAS 20:13

Ujungna didok nampuna kobun i ma, ‘Bia noma ulaning baenonku tusi? Anak haholongan ni rohangki noma da husuru tusi. Tontu anggo i pasangapon ni halahi ma!’

BAENON NI ANGKA RASUL 26:18

mangungkap parnidaan ni halahi anso morot halahi sian hagolapan jana masuk tu na torang; anso malua halahi sian gomgoman ni Sibolis gabe dirajai Debata halahi. Jadi dung porsaya halahi tu Au, niampunan ma sude dosa ni halahi jana gabe anggota na tarpili ma halahi songon halak ni Debata.’ ”

BAENON NI ANGKA RASUL 26:20

Tangkas do hupatorang sanga na tu ise pe anso marsipauba rohana be sian angka dosana jana marsipasahat dirina be ma tu Debata jana angkon tarida ma di ngolu ni halahi be paboa na dung muba rohana sian dosa ni halahi be. Di Damaskus ma parjolo hupatorang songon i, dung i baru di Jerusalem dohot di sude Luat Judea dohot di tonga-tonga ni angka bangso na asing.

BAENON NI ANGKA RASUL 28:27

Angke madung jogal roha ni bangso on, disumpol halahi do pinggolna jana dipapitpit matana. Angke sugari nada songon i, tontu marnida do mata ni halahi, marbinege do pinggolna, mangarti muse do roha ni halahi, jana mulak do halahi tu Au, disi ma Hupamalum halahi.’ ”

BAENON NI ANGKA RASUL 3:19

Hara ni i, pauba hamunu ma rohamunu sian angka dosamunu jana mulak ma hamu tu Debata, anso disesa Ia sude angka dosamunu i.

PANGARATAION 30:2

Muda giot mulak hamu dohot pomparanmunu tu Tuhan, jana sian sandok rohamunu giot mangoloi angka parentaNia na hulehen tu hamu sadari on,

PANGARATAION 30:8

Mangulahi ma hamu mangoloi Tuhan dohot mandalankon sude parentaNia na hulehen tu hamu sadari on.

PANGARATAION 5:29

Sugari nian sai songon i ma pangkilalaan ni halahi! Sugari sai tongtong halahi nian mabiar tu Au jana dioloi sude na Huparentahon, gabe sonang do halahi dohot pomparan ni halahi salolot-lolotna.

2 PETRUS 3:9

Nada tarlambat Debata mangalehen sanga aha na nijanjihonNia songon na nipikiran ni deba halak. Tapi sobar do Ia paadop-adop hamu, angke sahalak pe nada dihagioti Ia mago. GiotNia ulang so muba nian sude roha ni jolma sian angka dosana be.

1 SAMUEL 7:3

Dung i didok si Samuel ma tu halak Israel, “Muda na giot marbalik ma hamu tu Tuhan jana marsomba tuSia sian sandok rohamunu, angkon ambungkononmunu do sude debata na asing dohot patung ni Dewi Astoret i. Pasahat hamu dirimunu sude tu Tuhan jana hum tuSia sajo ma hamu marsomba, jadi gabe paluaonNa ma hamu sian halak Pilistin.”