JEREMIA 32:35 - BIBEL JAMITA NA DENGGAN

³⁵ Dipambaeni halahi do angka langgatan tu Baal di Rura Hinom, jana dipelehon halahi angka dakdanak halaklahi dohot dadaboru ni halahi tu Debata Molok. Hape nian na so jungada do Husuru halahi patupahon na songon i, salang tubu di bagasan rohangKu pe nada jungada sisongon i paboa na giot baenon ni halahi parbuatan na songon i jorbutna dohot na mambaen halak Juda mardosa.”

JEREMIA 32:35 ပူးပေါင်းရင်းမြစ်များ

1 RAJA-RAJA 11:33

Giot songon i ma baenonKu hara ni na nitadingkon ni si Salomo Au jana marsomba ia tu angka debata: I ma Astoret, debata boru-boru na sian Sidon; Kamos, debata ni Moab, dohot Milkom, debata ni Amon. Madung mardosa si Salomo jana dilaosi ia angka na Huparentahon. Anggo amangnia si Daud diihutkon do angka tona dohot parentangKu, hape anggo si Salomo, nada.

1 RAJA-RAJA 11:7

Di ginjang ni dolok na di Habincaran ni Jerusalem i, dipajongjong ia do inganan parsombaan tu Kamos, debata ni Moab dohot tu Molok debata ni bangso Amon – na nihagigihon do debata na dua i.

1 RAJA-RAJA 14:16

Tadingkonon ni Tuhan noma Israel hara ni na dung mardosa si Jerobeam jana patundania gabe mardosai muse halak Israel.”

1 RAJA-RAJA 15:26

Laing songon amangna i na mamarenta di jolonia, si Nadab pe mardosa do maradopkon Tuhan jana hara ni patundania gabe mardosa muse halak Israel.

1 RAJA-RAJA 15:30

Mardosa si Jerobeam jana patundania gabe mardosai halak Israel. Songon i ma dipagilap si Jerobeam muruk ni Tuhan, Debata na nisomba ni halak Israel i.

1 RAJA-RAJA 16:19

Tarjadi pe songon i, laing songon Raja Jerobeam do si Zimri na mardosa do maradopkon Tuhan jana patundania gabe mambaen dosa halak Israel.

1 RAJA-RAJA 21:22

Angkon songon isi ni bagas ni Raja Jerobeam anak ni si Nebat i hamu sabagas dohot songon isi ni bagas ni si Baesa anak ni si Ahia i, hara ni na dung mardosa halak Israel patunda ni ho jabat tarsunggul murukKu dibaen ho.’

2 RAJA-RAJA 21:11

“Na jorbut do jahat ni Raja Manase, dao dope jumorbut pangalahonia ulang pado pangalaho ni halak Kanaan; jana marhite angka gana-ganaannia na nipaturenia, patunda ni i ma gabe mardosa halak Juda.

2 RAJA-RAJA 21:4

Madung didok Tuhan, Bagas Ni Debata do inganan paribadatan tuSia, hape disi muse noma dipajongjong ia angka langgatan laho manyomba angka debata.

2 RAJA-RAJA 23:10

Tofet, i ma inganan pamelean ni debata na di Rura Hinom, dipahodar do. Jadi dung songon i nada adong be tarbaen halak laho mamelehon dakdanakna songon haul situtungon di Debata Molok.

2 RAJA-RAJA 23:15

Ditutung ma patung ni debata boru-boru Asera jana inganan pamelean na di Betel disegohon. Raja Jerobeam anak ni si Nebat do na pajongjong pamelean i – i ma raja na mambaen halak Israel mardosa.

2 RAJA-RAJA 3:3

Tapi laing songon Raja Jerobeam anak ni si Nebat na mamarenta painte so ia, laing mardosa do halak Israel hara ni ia jana sai dikarejohon ia do manyomba na songon i.

2 JUJUR TAON 33:6

Dipelehon ia do angka dakdanaknia gabe haul situtungon di Rura Hinom. Dipadalan ia muse do pangalaho hadatuon, na martondung, aji, dohot na mangido panogu-noguon tu angka sumangot. Mardosa situtu do ia tu Tuhan jabat dipagurgur ia muruk ni Tuhan.

2 JUJUR TAON 33:9

Patunda ni si Manase gabe dibaen angka rayat ni Juda do angka dosa na jumahat sian na nibaen ni angka bangso na di Kanaan na niusir ni Tuhan di hatiha na masuk bangso ni Tuhan i tu tano i.

2 JUJUR TAON 36:14

Tamba ni i, dipahodar angka pamimpin ni Juda, angka malim dohot rayat do Bagas Ni Tuhan na dung dihapunjungkon tu Tuhan i sandiri, harana dohot do antong halahi sandiri marsomba gana-ganaan dohot mangihutkon parngoluon na mardosa songon angka bangso na asing na humaliang halahi.

HARURUAR 32:21

Didok ia ma tu si Harun, “Aha do dibaen bangso on tu ho, umbaen na gabe diparo ho dosa na songon i godang tu halahi?”

JESAYA 57:5

Ale angka halak na matutung dibaen hagiot ni daging donok tu angka hayu parbeguan, ditoru ni hayu na rimbun, ale angka halak na manyambol dakdanak di rura-rura, di bagasan holang-holang ni dolok batu.

JEREMIA 19:2

anso rap hami kehe tu Rura Hinom mamolus sian Pintu Horbangan Beling. Angkon disi ma paboaonku tonaNia i.

JEREMIA 30:14

Sude haholonganmu, madung lupa tu ho; nada ra be halahi mamikirkon ho. Songon musu, Au giot mangaroro jana manguhumi hamu maradu gogo hara ni bahat ni dosamu jana godang hasalaanmu.

JEREMIA 44:4

Sai torus do marpupu Husuru naposongku angka panurirang, na mangorai hamu mambaen hajahatan na Huhagigihon i.

JEREMIA 7:30

Mambaen hajahatan do halak Juda. Dibaen halahi do angka gana-ganaan ni halahi na Huhagigihon i di bagasan BagasKu, gabe hodar dibaen halahi.

JEREMIA 7:31

Madung dipajongjong halahi sada langgatan na margoar Tofet di Rura Hinom laho manghaulkon angka dakdanak ni halahi baen haul situtungon. Hape so jungada Husuru halahi mambaen sisongon i, salang tubu di bagasan rohangKu pe nada unjung na songon i.

JEHESKIEL 23:37

Marhamainan do halahi dohot mamunu jolma; madung marhamainan halahi dohot angka gana-ganaan jana dibunu halahi angka dakdanakKu na nitubuhon ni halahi, madung dipelehon halahi angka dakdanak i tu angka gana-ganaan ni halahi.

HAMALIMON 18:21

Ulang lehen sada pe sian anakmu gabe dihaulkon tu Debata Molok, angke pangalaho na songon i na palayas goar ni Tuhan do i.

BAENON NI ANGKA RASUL 7:43

Bandar ni si Molokh do na nipaoban-obanmunu i rap dohot gana-ganaan ni bintang ni debatamunu na margoar Refan; i ma gana-ganaan na nibaenmunu gabe sisombaon. Hara ni i, angkon Huambungkon hamu lopus tu bariba an di Luat Babel.’

PANGARATAION 12:31

Ulang cubo-cubo hamu maniru pambaen ni halahi marsomba tu angka debata ni halahi laho manyomba Tuhan Debatamunu, angke dompak marsomba, dipatupa halahi do angka pangalaho na jorbut na nihagigihon ni Tuhan. Salang angka dakdanak ni halahi sandiri pe antong ditutung halahi do di ginjang ni langgatan gabe songon haul tu angka debata ni halahi i.

PANGARATAION 18:10

Ulang pelehon hamu angka dakdanakmunu di bagasan api di ginjang ni langgatanmunu. Ulang patola hamu bangsomunu gabe tukang ramal, manjalahi angka tanda-tanda, mamake jampi-jampi sanga

PANGARATAION 24:4

Di na dua pangalaho on, nada tola halaklahinia na parjolo i mambuat ia mangulahi; angkon songon dadaboru na dung dipahodar do i idaonnia. Muda laing dipake ia dope i mangulahi, i ma sada pangalaho na pabilehon Tuhan. Nada tola baenonmunu dosa na songon i jahatna di tano na giot silehenon ni Tuhan i tu hamu.”