JEREMIA 32:23 - BIBEL JAMITA NA DENGGAN

²³ Tapi di na ro halahi tu luat on lalu mangarampassa, nada marpangoloion halahi tu angka parentaMu, jana nada mangihutkon pangajaranMu parngoluon ni halahi; sude na niparentahonMu tu halahi sada pe nada adong didalankon halahi. Hara ni i, gabe diparo Ho ma sude parmaraan on tu halahi.

JEREMIA 32:23 ပူးပေါင်းရင်းမြစ်များ

ESRA 9:7

Mamungka sian zaman ni angka ompunami lopus saonnari, sai mardosa do hami bangsoMon tu Ho. Patunda ni i ma umbaen na talu hami, angka rajanami dohot angka malimnami dibaen angka raja na asing i. Hona bunu hami, disamun dohot dihaldung gabe taban. Madung dipalayas hami marabis-abis, songon pangalaho na masa di ari sadari on.

NEHEMIA 9:15

Dompak male jana hurang mangan halahi, dipaijur Ho do roti sian langit i. Jana sian batu na himpal, na gogo jana na koras, dipadalan Ho aek na pasombu nguas maradu doras. Disuru Ho do halahi mangingani tano, na nijanjihonMu tu halahi mardongan sumpa.

MASMUR 78:10

Dilaosi halahi do parjanjian ni Debata dohot halahi, jana aturanNa nada dioloi.

JEREMIA 2:7

Tu tano napu Hutaruhon halahi laho mandai sude suha ni tano i. Hape dipahodar halahi do tanongKi disi diparsayang halahi do sinadonganKi.

JEREMIA 26:4

Disuru Tuhan ma au mandok tu halahi, “Au Tuhan, madung mamarentahon anso mangoloi hamu tu Au jana angkon dalan – kononmunu do angka aturan na dung Hulehen tu hamu.

JEREMIA 44:10

Tapi lopus sadari on nada ra hamu paserep rohamunu. Nada dipasangap hamu Au jana pardalan ni ngolumunu nada mangihutkon TonaKu na Hulehen tu hamu dohot tu ompumunu.

JEREMIA 7:26

Hape nada adong na manangihon sanga na mamparrohahon. Mur jumogal do rohamunu jana mur jumahat sian ompumunu.”

ANDUNG 1:18

Tapi tigor do anggo Tuhan, angke parentaNia do antong na nilaosan. Tangihon ma au, ale angka bangso! Ligi ma au di bagasan pardangolan on. Hona tangkup na poso dohot nauli bulungku, jana dioban tu habuangan.

ANDUNG 1:8

Dipahodar Jerusalem do dirina sandiri dohot dosa na nibaenna i mambaen gigi. Saonnari talak-talak ia jana marlayas; ma pola mago sude hagodanganna. Humolos ia, hara ni na dung maluak bohina.

JEHESKIEL 20:18

Tapi sabalikna, Hupaingot ma angka bagian na umposo sian halahi, Hudok songon on, ‘Ulang ma ihutkon hamu angka aturan na nibaen ni angka ompu na umpompar hamu. Ulang tiru hamu hasomalan ni halahi jana ulang ramun baen hamu dirimunu marhite na dohot marsomba angka debata ni halahi.

JEHESKIEL 20:21

Hape angka na umposo i pe manggagai do tu Au. Dilaosi halahi do angka tona na sian Au jana dipasiding halahi do parenta na sian Au, na manjamin tongtong mangolu sanga ise na mandalankonsa. Jadi hara ni i madung hobas Au laho palaluhon murukKu maradopkon halahi di parhorsihan i jana mamunu halahi sude.

JEHESKIEL 20:8

Tapi dialo halahi do Au jana nada ditangihon halahi. Nada ra halahi mangambungkon angka patung sihagigian i jana nada ra halahi mantak marsomba tu gana-ganaan ni Mesir i. Dompak disi dope halahi madung hobas Au palalu murukKu tu halahi.

LUKAS 17:10

Songon i muse ma hamu. Muda dung dioloi hamu sude na niparentahon tu hamu, dok hamu ma, ‘Anggo hami hum naposo na somal-somal i do hami; hum na patut baenon do na hami karejohon i.’ ”

JOHANNES 15:14

Angka ale-alengKu ma hamu muda dikarejohon hamu sanga aha na Huparentahon tu hamu.

GALATIA 3:10

Sanga ise halak na marguru tu Tona, na mangolu di toru ni bura do halahi sudena. Angke tarsurat do di Buku Na Badia i, “Sanga ise na so burju mandalankon sasudena parenta na tarsurat di Tona i, buraan ni Debata ma halakna i!”

JAKOBUS 2:10

Harana sanga ise na mangkarejohon sude Tona i, tapi nada dikarejohon ia sada sian i, na marsala do ia maradopkon sasudena i.

JOSUA 21:43

Songon i ma dilehen Tuhan tu halak Israel sude tano na dung DijanjihonNia i mardongan sumpa tu ompu na umpompar halahi. Dung dibuat tano i, maringanan ma halak Israel disi.

JOSUA 23:16

Muda dilanggar hamu pudun-pudun ni parjanjian antara ni Tuhan dohot hamu, gabe kehe hamu mangoloi dohot marsomba tu angka debata na asing, gabe muruk ma Tuhan jana hona uhumanNa ma hamu. Jana nada jabat sadia honok nari dung i, nada adong be umpe sahalak na tinggal sian hamu di tano na denggan on, na nilehen ni Tuhan di hamu.”