JEREMIA 29:18 - BIBEL JAMITA NA DENGGAN

¹⁸ Kojar-kojaronKu halahi marhite porang, tangkuraparon, dohot nyae masa lopus jorbut pangkilalaan ni sude bangso na satano on marnida na masa tu halahi. Siincak-incahan noma halahi jana goar ni halahi gabe songon bura.

JEREMIA 29:18 ပူးပေါင်းရင်းမြစ်များ

2 JUJUR TAON 29:8

Jadi di bagasan hamuruhonNa, diuhum Tuhan ma Jerusalem dohot Juda. Jana torang do diboto hamu sudena, songon dia songgotna dohot jorbutna pangkilalaan ni sude halak di tindakan ni Tuhan i.

MASMUR 44:11

Dipadiar Ho do hami dibante songon biri-biri, disarsarkon Ho do hami di tonga-tonga ni angka bangso.

JESAYA 65:15

Pakeon ni bangso na Hupili i ma goarmu songon bura. Au, Tuhan Debata, bunuonKu noma hamu. Tapi anggo halahi na burju mangoloi Au, lehenonKu ma goar na imbaru.

JEREMIA 15:4

BaenonKu ma manyikur sandok bangso na di tano on marnida halahi. Patunda ni parbuatan ni si Manase anak ni si Hiskia ma Hubaen sudena i, i ma pangalahonia di Jerusalem dompak na gabe raja ia di Juda.”

JEREMIA 18:16

Madung dibaen halahi luat on gabe inganan na jorbut jana gabe sihata-hataan sapanjangna. Sandok halak na mamolus marsiupirkon uluna be hara ni jorbut ni pangkilalaanna.

JEREMIA 19:8

BaenonKu hamamago na mansai jorbut tu kota on, anso sude halak na mamolus sian i tarsonggot jana mangupir.

JEREMIA 24:10

ParoonKu tu halahi parporangan, tangkuraparon, dohot nyae masa lopus marmatean halahi sude jana umpe sada na tading di luat na dung Hulehen on tu halahi dohot ompu ni halahi.”

JEREMIA 24:9

Giot baenonKu ma halahi gabe marjaya, lopus gabe mabiar sandok bangso na adong di tano on. Sanga na di dia angkon Hupaserak halahi, siincak-incahan halahi, sipartataan jana sipargonjak-gonjakkonon. Songon hata bura do goar ni halahi.

JEREMIA 25:9

‘PiohononKu ma sude bangso na sian Utara, songon i muse naposongKu si Nebukadnesar raja ni Babel. ArahononKu ma halahi marporang mangalo Juda dohot halakna i sude dohot bangso na humaliangsa. PatimpasonKu sude bangso on rap dohot angka bangso hombarna jana padiaronKu malala sapanjangna. Tarsonggot ma halak na midasa jana panyogiton. Au Tuhan, madung mandok songon i.

JEREMIA 26:6

Anggo laing tong do hamu manangkang, baenonKu do bagas paribadatan on songon na Hubaen tu Silo, lopus sandok bangso na satano on mamake goar ni Jerusalem on gabe bura.”

JEREMIA 27:8

Tapi anggo bangso sanga harajaan na so ra tunduk tu si Nebukadnesar, uhumonKu do i marhite porang, tangkuraparon, dohot nyae lopus ujungna tunduk bangso i tusia.

JEREMIA 29:17

Didok Tuhan Na Markuaso i do, ‘ParoonKu ma parporangan, tangkuraparon dohot nyae masa tu halahi; giot baenonKu halahi songon batu ni ara na santak busuk na so tarpangan.

JEREMIA 29:22

Jadi muda adong halak na dioban tu Babel na giot mamurai sada-sada halak, dokkonon ni halahi ma, ‘Sai dibaen Tuhan ma ho nian songon si Zedekia dohot si Ahab na nitutung ni raja Babel mangolu-olu.’

JEREMIA 32:24

Madung dipajongjong halak Babel angka tembok humaliang ni kota on laho manghobuk dohot mangarampassa jana saonnari mangaroro ma halahi. Parporangan, tangkuraparon dohot nyae masa ma mambaen madabu kota on tu tangan ni halahi. Diida Ho do tulus sude sandok na nidokkonMu.

JEREMIA 34:17

Hara ni i Au Tuhan mandok, anggo hamu madung mangalaosi tu parentangKu; nada dipalua hamu dongan sabangsomunu Israel. Antong saonnari Hulehen ma hamu bebas mamili: Bebas laho mate di partempuran, mate dibaen nyae masa, sanga mate tangkuraparon. Giot baenonKu mabiar bangso na satano on mida sipamasaonKu tu hamu.

JEREMIA 42:18

Songon dia pangalaluhonKu, Au Tuhan Na Markuaso, Debata ni Israel, di hamumurukKu dohot hosom ni rohangKu tu halak Jerusalem, songon i muse ma palaluonKu hosom ni rohangKu tu hamu na kehe tu Mesir i. Gabe mabiar ma halak mida hamu; incahanna hamu, jana goarmunu baenon ni halak gabe songon bura. Nada idaonmunu be bona bulumunu on.”

JEREMIA 44:12

Jana ampot adong sian halak Juda na teba i na sai marpor ni roha tu Mesir laho maringanan disi, gabe bunuonKu ma halahi. Sude halahi na menek na godang, mate ma di Mesir baenon ni porang sanga hara ni haleon potir. Gabe jorbut pangkilalaan ni halak mida halahi jana palayasonna halahi. Gabe goar bura ma baenon ni halak goar ni halahi.

JEREMIA 44:22

Nada tahan be Tuhan paida-ida pangalaho dohot pambaenanmunu na jahat i; hara ni i do umbahen na gabe lobu tanomunu, nada adong na mangingani lopus sadari on.

JEHESKIEL 12:15

Di na Huparserakkon halahi di tonga-tonga ni angka bangso na asing di tano sileban, botoon ni halahi ma bahaso Au do Tuhan.

JEHESKIEL 22:15

PaserahonKu ma halak na mangingani ho tu sude negara dohot bangso jana antahonKu ma pambaenanmu na jahat i.

JEHESKIEL 23:46

Didok Tuhan Debata i ma, “Padiar ma bangkit sarombongan jolma laho mamparkanciti dohot mangarampas siboru panggampang na dua i.

JEHESKIEL 36:19

Hona uhum ma halahi Hubaen hombar tu parngoluon dohot pangalaho ni halahi, jadi Hupaserak ma halahi tu angka luat na asing.

JEHESKIEL 5:15

Anso sai gabe siincahan jana sipalayason dohot siparjoraan dohot habiaran di halak parbegu angka na humaliang ho, muda muruk Au jana marrimas jana Huuhumi ho di bagasan muruk marhite pincang-pincang ni harimason.

JEHESKIEL 6:8

Adong do saotik sian halahi sipaluaonKu sian panyambolan i, tapi paserahon do halahi di tonga-tonga ni angka bangso.

HAMALIMON 26:33

ParoonKu ma parporangan di luatmunu jana manyarsar hamu di luat na leban. Angka ladangmu gabe tarulang jana kotamu gabe abu.

AMOS 9:9

BaenonKu ma parenta jana piaranna ma bangso Israel songon pamiari ni halak di gandum di bagasan anduri. Laho pasidingkon sude na so marguna sian tonga-tonga ni halahi, hursuhonKu ma halahi di tonga-tonga ni angka bangso.

MIKA 6:16

Tarjadi pe sudena i patunda ni na niihutkonmunu ma angka parbuatan jahat na nibaen ni Raja Omri dohot Raja Ahab, anakna i. Diihutkon hamu do antong angka pangalaho ni halahi. Hara ni i roncohononKu ma hamu, jana siincahan dohot silayason ni sandok bangso ma hamu.”

ZAKARIA 7:14

Songon halingsungsung, Huombuskon halahi tu tonga-tonga ni angka bangso na so nitanda ni halahi. Dung i mamolngit ma tano i, nada adong be na manginganisa. Songon i ma tano na jeges i gabe mamolngit dibaen halahi.”

ZAKARIA 8:13

Jana na jolo madung manjadi bura hamu di tonga-tonga ni angka bangso, o hamu halak Juda dohot halak Israel. Jadi saonnari giot paluaonKu noma hamu, anso gabe pasupasu hamu. Ulang hamu mabiar, patogu ma rohamunu!”

BILANGAN 5:27

Sugari na dung tutu dadaboru i markarosuan gabe hancit situtu ma hilalaon ni dadaboru i baenon ni aek i, busungon ma butuhana jana hesut hae-haena. Gabe bura ma goarna i di tonga-tonga ni bangsona.

LUKAS 21:24

Adong ma na dibunu dohot podang, adong muse ma i na dioban gabe taban tu angka luat ni halak; jana dege-degeon ni halak ma Jerusalem lopus abis hatiha na dung nitontuhon ni Tuhan i tu halahi.”

PANGARATAION 28:25

Muda nada dioloi ho Tuhan Debatamu, pamonangonNia ma angka musumunu mangalo ho. Porangonmunu ma halahi sian sada dalan, tapi maporus ma ho masarsar tu pitu dalan. Gaor ma sude bangso na satano on muda diida halahi na masa tu ho.

PANGARATAION 28:37

Tarsonggot be ma angka jolma na marnida ho di inganan parserahanmunu dibaen Tuhan paida-ida na masa di ho; siincak-incahan ni halak ma ho jana sipartataanna.

PANGARATAION 28:64

Paserahon ni Tuhan ma ho di tonga-tonga ni angka bangso, sian ujung na sada tu ujung na sada nari di tano on. Sombaonmunu ma disi angka debata na dibaen sian hayu dohot batu, i ma angka debata na so unjung hian disomba ho dohot ompumunu.