JEREMIA 29:11 - BIBEL JAMITA NA DENGGAN

¹¹ Nada he Au sandiri mamboto angka sangkapKu taringot tu hamu? Nada na giot mangago hamu angka sangkap i; tapi na giot tu hasonanganmunu do i dohot mangalehen tu hamu arop ni roha na denggan di hatiha na ro.

JEREMIA 29:11 ပူးပေါင်းရင်းမြစ်များ

MASMUR 33:11

Hape anggo sangkap ni Tuhan, laing hot do salolotna, hot do togu sangkapNia sapanjang manyahena.

MIKA 4:12

Tapi na so diboto ni angka bangso i do sanga aha na di bagasan sangkap ni Tuhan. Sian na so pamotoan ni halahi, na dipalagut do halahi anso diuhum, tudos tu gandum na dilunggukkon anso didege.

MASMUR 40:5

Tuhan, na bahat ma antong di hami pambaenanMu, ale Tuhan Debatanami, nada adong tudosanMu! Bahat do karejoMu na gabe hahomangan di hami, nada tarpajojor sudena i.

JOB 23:13

Nada muba-uba anggo Debata; nada adong tarbaen mangalo Ia. Dipatulus Ia do sanga aha giot ni rohaNia.

ANDUNG 3:26

Antong, painte ma di bagasan sonang lopus ro Tuhan mangalehen partolongan.

HOSEA 3:5

Tapi ro do i hatihana mulak bangso Israel tu Tuhan Debata ni halahi dohot tu raja ni halahi na sian pomparan ni si Daud. Jadi gabe mabiar ma halahi jana marhabiaran tu Tuhan boti jagiton ni halahi ma angka pasupasuNa.

ZAKARIA 1:6

Tapi sude hata dohot angka paraturanKu na dung Huparentahon tu angka naposongKu, angka panurirang, nada he madung lalu i tu angka ompumunu?” Jadi muba ma roha ni halahi, jana ninna ma, “Songon Tuhan Na Markuaso na marsangkap mambaen pangalaho maradopkon hita, tudos tu na hita karejohon, songon i ma dibaen Ia pangalaho maradopkon hita.”

JEREMIA 23:5

Didok Tuhan ma, “Dapot do i hatihana, patubuonKu ma di pomparan ni si Daud sada tunas na tigor. Marhite bisuk mamarenta raja i, jana patulusonna hatigoran dohot hatutuan di sandok luat.

JEREMIA 23:6

Muda dung mamarenta ia, malua ma halak Juda jana Israel mangolu ma di bagasan sonang. Goaron ma raja i ‘Tuhan do hasintonganta.’

JEREMIA 30:9

Mangoloi noma halahi tu Au Tuhan Debata ni halahi, dohot tu sada halak sian pomparan ni si Daud na giot angkatonKu gabe raja.

JEREMIA 30:10

O hamu bangsongKu, ulang be mabiar hamu! halak Israel, ulang humitir hamu! PaluaonKu ma hamu sian tano na dao, inganan pambuanganmunu. Mulak noma hamu jana di bagasan dame mangolu. Aman noma ngolumunu nada adong be sihabiaranmunu.

JEHESKIEL 11:16

Hara ni i, palalu ma jolo tonangKon tu angka donganmu na tarbuang i, Au do na maroban halahi songon i daona tu tonga-tonga ni angka bangso jana paserakkon halahi di angka luat i. Tapi haru songon i pe, sai na dongananKu do halahi taran disi halahi.

ZAKARIA 13:9

Hum sapartolu noma na mangolu sian i. Jana paiasonKu ma halahi songon perak na dipapita ni api. UjionKu ma halahi songon panguji ni halak di sere. Jadi martangiang ma halahi tu Au, jana alusanKu ma halahi. DokkononKu ma tu halahi, paboa na bangsongKu do halahi, jana okuon ni halahi muse ma, Au do Tuhan Debata ni halahi.”

MASMUR 85:9

Tutu ma da, na maringanan Debata na godang di tanonta, jana madung hobas paluahon halak na burju marugamo.

JESAYA 27:4

Nada muruk be Au sanga na biraraon. Sugari pe laing adong duhut sanga sihupi, Au noma torus mamorangi abis ma i sudena Hututungi.

JEREMIA 24:5

“Angka halak na dung dioban i tu Babel Huetong do i songon batu ni ara na jeges-jeges on; jadi hara ni i, Au Tuhan, Debata ni Israel, giot denggan do baenonKu tu halahi.

JEREMIA 33:6

Tapi pasuangonKu do muse pangalaho ni kota on dohot halakna; margogo do halahi mangulahi. LehenonKu do tu halahi hasonangan dohot hadamean na sumurung.