JEREMIA 26:19 - BIBEL JAMITA NA DENGGAN

¹⁹ Hape nada dibunu Raja Hiskia dohot rayat i si Mika. Mur mabiar roha ni si Hiskia tu Tuhan jana mangido ibo ni roha ia. Jadi gabe ditarik Tuhan mangulahi ondam-ondamNia i laho mangago halahi. Jana saonnari pe, ra dehe hita mangalapi hamagoan godang tu dirinta?”

JEREMIA 26:19 ပူးပေါင်းရင်းမြစ်များ

2 SAMUEL 24:16

Ma lalu surusuruan na pasarsar hamatean i di lambung ni pardegean ni gandum nampuna ni si Arauna halak Jebus i. Jadi dung diida Tuhan na dung hobas surusuruan i laho mangabisi Jerusalem, dipauba Tuhan ma haputusannia i laho manguhum bangso i. Didok Tuhan ma tu surusuruan i, “Tuk ma i! Antak ma!”

2 JUJUR TAON 32:20

Jadi gabe martangiang ma Raja Hiskia dohot Panurirang Jesaya anak ni si Amos. Pio-pio ma halahi tu Debata.

2 JUJUR TAON 34:21

“Kehe ma hamu marsapa tu Tuhan salaho tu au dohot salaho tu bangso i na tinggal dope di Israel dohot Juda. Tangkasi hamu ma salaho tu pangajaran na di buku on. Madung muruk Tuhan tu hita hara ni na so diihutkon angka ompunta hata ni Tuhan jana nada dipatulus halahi na didok di buku on angkon sipatuluson.”

HARURUAR 32:14

Jadi gabe marpangulahi ma roha ni Tuhan i jana nada tulus didalankon Ia na nitahi ni rohaNia maradopkon bangso i parohon hamamago.

JESAYA 26:21

Na giot mijur ma Tuhan sian ingananNa di banua ginjang laho manguhumi pangisi ni tano on hara ni dosa ni halahi. PatorangonNa ma sude pamunuon na nibaen ni halahi di na buni. Nada tutup-tutupan ni tano i be angka na mate hona bunu i.

JESAYA 37:1

Di na nibege ni Raja Hiskia lapuran ni sitolu halak i, disibakkon ia pakeannia jana marabit goni ma ia tanda ni marsakna, lalu kehe ma ia tu Bagas Ni Tuhan.

JESAYA 37:4

Madung disuru raja Asur pangarajai inumonnia laho pabilehon Debata na mangolu i. Nada binoto betak na dung ditangihon Tuhan Debata do hata na pabilehon i, jana giot uhumanNia halahi na mandokkon i. Hara ni i, martangiang ma ho tu Debata manangiangkon angka halak hita na mangolu i dope.”

JEREMIA 26:15

Tapi ingot hamu ma, muda dibunu hamu au, hamu noma dohot halak kota on mananggung hasalaan hara ni pamunuon maradopkon halak na so marsala. Angke Tuhan do na marsuru au laho palaluhon sipaingot i tu hamu.”

JEREMIA 26:3

Betak na ra do bangso i manangihon, gabe mantak mambaen na jahat gabe Husundati rohangKu laho mangago halahi hombar tu pambaenan ni halahi na jahat i.”

JEREMIA 44:7

Jana di hatiha on, marsapa do Tuhan Na Markuaso i, Debata ni Israel sanga hara ni aha umbaen dipatupa hamu pangalaho na jahat sisongon i maradopkon dirimunu. Adong he na giot timpashononmunu sude jolma – halaklahi, dadaboru, angka dakdanak dohot na baru sorang – anso ulang adong be na teba sian bangsomunu?

AMOS 7:3

Gabe manolsoli ma Tuhan hara ni i. “Nada tulus tarjadi na niidami.”

HABAKUK 2:10

Hape nian na mangalapi hahaila tu dongan sabagasmu sajo do na nibaenmi. Manjalak tu rugimu sandiri do ho di na nisamunmu angka bangso.

ZAKARIA 7:2

Na dung diutus ni halak Betel do si Sareser dohot si Regem-Melekh dohot angka anak bua ni halahi tu Bagas ni Tuhan Na Markuaso laho palamamkon roha ni Tuhan.

BILANGAN 16:38

Madung badia barang-barang i hatiha na nipasahat di ginjang langgatan ni Tuhan. Dung i buat ma inganan ni api ni halak na hona uhum hara ni dosa ni halahi i. Angkon topaon barang-barang i gabe nipis-nipis, jana baen ma sian na dung nipis i gabe tutup ni langgatan. Gabe parningotan ma i di bangso Israel.”

MATEUS 23:35

Ujungna madabu ma tu hamu uhuman hara ni na nibunumunu sude angka na so marsala i mamungka sian pamunuon na tu si Abel na so marsala i lalu tu pamunuon na tu si Zakaria anak ni si Berekia na giot bunuonmunu di holang-kolang ni bilik na badia dohot inganan ni haul na di Bagas Ni Debata i.

BAENON NI ANGKA RASUL 5:39

Tapi muda sian Debata do mula ni i, nada tartaluhon hamunu i. Betak na tardapot muse do hamu angka dongan, na mangalo tu Debata.” Dijagit rapot i ma hata ni si Gamaliel i.

HALUMBAAN 16:6

Dibaen madung diusehon halahi mudar ni angka halak na badia dohot angka panurirang i. Madung dilehen Ho mudar gabe inumon ni halahi tama do na songon i di halahi!”