JEREMIA 24:9 - BIBEL JAMITA NA DENGGAN

⁹ Giot baenonKu ma halahi gabe marjaya, lopus gabe mabiar sandok bangso na adong di tano on. Sanga na di dia angkon Hupaserak halahi, siincak-incahan halahi, sipartataan jana sipargonjak-gonjakkonon. Songon hata bura do goar ni halahi.

JEREMIA 24:9 ပူးပေါင်းရင်းမြစ်များ

1 RAJA-RAJA 9:7

gabe paruaronKu ma bangsongKu Israel sian luat na dung Hulehen di halahi. Au pe tinggalkononKu ma bagas parsombaan na dung Hudokkon gabe inganan na dung mardohonan laho marsomba tu Au. Sanga didia pe halak Israel angkon dilayasi jana dipartatai halak.

2 JUJUR TAON 7:20

gabe paruaronKu ma hamu sian luat na dung Hulehen on tu hamu. Bagas on pe na dung Hutotopkon gabe inganan maribadat tu Au, tinggalkononKu ma. Sanga na di dia pe layasan ma bagas paribadatan on jana gabe sipartataan.”

MASMUR 69:11

Mamake abit goni do au tanda ni hamarsakan, hape dalan do i di halahi gabe sindiran.

JESAYA 43:28

Patunda ni i pahodaronKu noma angka malim di BagasKu, jana Israel pasahatonKu anso dipabile jana diabiskon.”

JESAYA 65:15

Pakeon ni bangso na Hupili i ma goarmu songon bura. Au, Tuhan Debata, bunuonKu noma hamu. Tapi anggo halahi na burju mangoloi Au, lehenonKu ma goar na imbaru.

JEREMIA 15:4

BaenonKu ma manyikur sandok bangso na di tano on marnida halahi. Patunda ni parbuatan ni si Manase anak ni si Hiskia ma Hubaen sudena i, i ma pangalahonia di Jerusalem dompak na gabe raja ia di Juda.”

JEREMIA 19:8

BaenonKu hamamago na mansai jorbut tu kota on, anso sude halak na mamolus sian i tarsonggot jana mangupir.

JEREMIA 25:18

Jerusalem dohot sude kota na di Juda, rap dohot raja-raja maradu angka pamimpinna, hupaksa inumonna anggur i, lopus gabe songon padang na harsang halahi jana songon parbeguan. Lalu tu sadari on dipake do goar ni halahi songon hata bura.

JEREMIA 26:6

Anggo laing tong do hamu manangkang, baenonKu do bagas paribadatan on songon na Hubaen tu Silo, lopus sandok bangso na satano on mamake goar ni Jerusalem on gabe bura.”

JEREMIA 29:18

Kojar-kojaronKu halahi marhite porang, tangkuraparon, dohot nyae masa lopus jorbut pangkilalaan ni sude bangso na satano on marnida na masa tu halahi. Siincak-incahan noma halahi jana goar ni halahi gabe songon bura.

JEREMIA 29:22

Jadi muda adong halak na dioban tu Babel na giot mamurai sada-sada halak, dokkonon ni halahi ma, ‘Sai dibaen Tuhan ma ho nian songon si Zedekia dohot si Ahab na nitutung ni raja Babel mangolu-olu.’

JEREMIA 34:17

Hara ni i Au Tuhan mandok, anggo hamu madung mangalaosi tu parentangKu; nada dipalua hamu dongan sabangsomunu Israel. Antong saonnari Hulehen ma hamu bebas mamili: Bebas laho mate di partempuran, mate dibaen nyae masa, sanga mate tangkuraparon. Giot baenonKu mabiar bangso na satano on mida sipamasaonKu tu hamu.

JEREMIA 42:18

Songon dia pangalaluhonKu, Au Tuhan Na Markuaso, Debata ni Israel, di hamumurukKu dohot hosom ni rohangKu tu halak Jerusalem, songon i muse ma palaluonKu hosom ni rohangKu tu hamu na kehe tu Mesir i. Gabe mabiar ma halak mida hamu; incahanna hamu, jana goarmunu baenon ni halak gabe songon bura. Nada idaonmunu be bona bulumunu on.”

JEREMIA 44:12

Jana ampot adong sian halak Juda na teba i na sai marpor ni roha tu Mesir laho maringanan disi, gabe bunuonKu ma halahi. Sude halahi na menek na godang, mate ma di Mesir baenon ni porang sanga hara ni haleon potir. Gabe jorbut pangkilalaan ni halak mida halahi jana palayasonna halahi. Gabe goar bura ma baenon ni halak goar ni halahi.

JEREMIA 44:13

Songon panguhumingKu tu Jerusalem, laing songon i ma uhumanKu halahi na maringanan di Mesir. Marmatean ma halahi baenon ni porang, hara ni haleon potir, sanga hara ni nyae masa.

JEREMIA 44:22

Nada tahan be Tuhan paida-ida pangalaho dohot pambaenanmunu na jahat i; hara ni i do umbahen na gabe lobu tanomunu, nada adong na mangingani lopus sadari on.

JEHESKIEL 23:46

Didok Tuhan Debata i ma, “Padiar ma bangkit sarombongan jolma laho mamparkanciti dohot mangarampas siboru panggampang na dua i.

JEHESKIEL 25:3

Suru ma bangso i manangihon sanga aha na Hudok, Au Tuhan Debata mandok tu halahi, ‘Sonang do rohamunu paida-ida inganan na badiangKu dipahodar dohot tano Israel disegohon jana halak Jahudi dioban tu habuangan.

JEHESKIEL 26:2

“Ale jolma parsantongkinan, marsurak-surak do halak Tirus lalu mandok, ‘Madung maronco Jerusalem! Gogona di parboniagaan madung mago! Nada be imbangta i!’ ”

JEHESKIEL 5:8

Jadi, Au Tuhan Debata mandok, bahaso musumu do Au. UhumanKu ma ho di adopan ni angka bangso.

PANGARATAION 28:25

Muda nada dioloi ho Tuhan Debatamu, pamonangonNia ma angka musumunu mangalo ho. Porangonmunu ma halahi sian sada dalan, tapi maporus ma ho masarsar tu pitu dalan. Gaor ma sude bangso na satano on muda diida halahi na masa tu ho.

PANGARATAION 28:37

Tarsonggot be ma angka jolma na marnida ho di inganan parserahanmunu dibaen Tuhan paida-ida na masa di ho; siincak-incahan ni halak ma ho jana sipartataanna.