JEREMIA 23:5 - BIBEL JAMITA NA DENGGAN

⁵ Didok Tuhan ma, “Dapot do i hatihana, patubuonKu ma di pomparan ni si Daud sada tunas na tigor. Marhite bisuk mamarenta raja i, jana patulusonna hatigoran dohot hatutuan di sandok luat.

JEREMIA 23:5 ပူးပေါင်းရင်းမြစ်များ

2 SAMUEL 23:3

Madung mangkuling Debata ni Israel; didok pangondian ni Israel do tu au: “Muda sahalak jolma mamarenta rayatna mardongan hatigoran na mamimpin mardongan pangoloion tu Tuhan.

MASMUR 45:4

Maju ma da mardongan sahala manuju habonggalan marayakkon hajojongjong ni hatigoran dohot uhum. Gogo ni raja i ma da padumpangkon hamonangan na marbungaran.

MASMUR 80:15

Ro ma Ho paluahon hami bangsoMon na songon bona ni anggur, i ma na nisuanMu sandiri.

MASMUR 99:4

Raja na marsahala, dihaholongi Ho do na tutu, madung dihajongjongkon Ho do hatutuan. Uhum dohot hatigoran didalankon Ho di tonga-tonga ni pomparan ni si Jakob.

JESAYA 33:5

Sangap situtu ma da antong Tuhan! Angke Ia do na mangarajai. BaenonNia ma hasintongan dohot hatigoran manggohi Jerusalem

JESAYA 4:2

Ro do hatiha ni i baenon ni Tuhan sandok suan-suanan dohot hayu tubu lalu magodang boti jeges di luat on. Anggo di ari i marmoga-moga ma pangkilaan ni Israel jana godang rohana hara ni suha ni tano i.

JESAYA 42:6

“Au ma da Tuhan, na mamiohon ho, markite-hite hasintongan, na maniop tanganmu; madung Hubaen jana Hulehen ho gabe janji tu sude jolma gabe sinondang tu angka bangso;

JESAYA 45:24

Dokkonon ni halak ma, ‘Hum di Tuhan dapot hagogoan dohot hamonangan!’ Tapi manjagit hahaila ma sude na margoyak ni roha mida Ia.

JESAYA 52:13

Satutuna, monang do naposongKu, pagincaton do ia, dipuji-puji jana dipasangap.

JESAYA 53:10

Tapi hagiot ni Tuhan do manaon na hancit ia, jana mate songon haul panyesa ni dosa. Idaonnia do pomparannia jana ginjang umurnia tulus ma hagiot ni Tuhan markite-hite ia.

JESAYA 53:2

Songon tumbur do ia tubu di adopan ni Tuhan, jana songon tunas sian tano na mahiang. Nada adong hajegesonna jana nada adong hasangapanna, na mambaen hita mangaligi tusia: Nada adong tompana, na mambaen hita marpor ni roha.

JESAYA 9:5

Sipatu ni tentara na mangolat dohot bajuna na margulu mudar, gabe bagian ni api lopus puntung sasudena.

JESAYA 9:6

Madung sorang di hita sada dakdanak; dibasa-basahon di hita sada anak. Ia ma na gabe pamimpinta. Digoari do Ia: “Panuturi Na Marroha”, “Debata Parkuaso”, “Ama Salolot ni lolotna”, “Raja Ni Hadameon”.

JESAYA 9:7

Mur tu godangna do kuasonia, jana tongtong dame harajaannia. Ia ma raja na songon panggonti ni si Daud, marojakan tu hatigoran dohot hasintongan do harajaannia sian mulai saonnari lalu tu salolotna. Angkon tulus sudena i baenon ni Tuhan Na Markuaso i.

JEREMIA 22:15

Muda dipajongjong ho bagas godang mamake hayu sampinur Libanon na jumegesna, i ma he tandana paboa ho ma raja na dumenggan sian angka raja na asing? Ingot ma jolo tu amangmu. Didai ia do ngolu na sonang jana mardohar do ia di sude karejonia, angke tigor jana lidang do ia tongtong jana tigor do dibaen ia parkaro ni halak na pogos.

JEREMIA 22:3

“Tigor jana jujur ma pambaenanmunu! Palua ma halak na hona incop sian tangan ni halak na mangincopsa. Ulang ma manjahati sanga manyosak hamu tu halak na leban, dakdanak na so marama so marina, sanga na mabalu. Ulang ma bunu hamu halak na so marsala di inganan on, ninna Tuhan.

JEREMIA 22:30

“Na dung ditontuhon do jolma i agoan angka dakdanakna jana sai lus di bagasan ngoluna. Sian pomparanna nada adong na marhasil mamarenta di Juda songon raja sian pomparan ni si Daud. Au Tuhan, madung mandok songon i.”

JEREMIA 23:6

Muda dung mamarenta ia, malua ma halak Juda jana Israel mangolu ma di bagasan sonang. Goaron ma raja i ‘Tuhan do hasintonganta.’

JEREMIA 29:11

Nada he Au sandiri mamboto angka sangkapKu taringot tu hamu? Nada na giot mangago hamu angka sangkap i; tapi na giot tu hasonanganmunu do i dohot mangalehen tu hamu arop ni roha na denggan di hatiha na ro.

JEREMIA 30:3

Angke dapot do muse hatihana pasuangonKu mangulahi bangsongKu Israel dohot Juda; obanonKu do halahi mangulahi mulak tu tano na dung Hulehen tu ompu ni halahi. Halahi noma nampuna tano i mangulahi. Au Tuhan, madung mandok songon i.”

JEREMIA 30:9

Mangoloi noma halahi tu Au Tuhan Debata ni halahi, dohot tu sada halak sian pomparan ni si Daud na giot angkatonKu gabe raja.

JEREMIA 31:27

Au, Tuhan mandok dapot do i hatihana gohanKu Israel dohot Juda markite-hite jolma dohot pahan-pahanan.

JEHESKIEL 21:27

RoncohononKu ma sudena kota on, lopus di sude inganan hum sego-segona noma na adong. Tapi dung ro pe halak na Hutodo i laho manguhumi kota on anso tarjadi na songon i. Tusia ma pasahatonKu kota on.”

JEHESKIEL 34:16

JalahanKu ma na mago i, obanonKu mulak na lilu i, na margasa balutonKu, na marnyae ubatanKu; tapi anggo na mokmok dohot na gogo i abiskononKu, angke parmahan na mambaen na denggan do Au.

JEHESKIEL 34:29

PanapuonKu angka ladang ni halahi anso ulang masa be haleon di luat i. Nada marlayas be halahi baenon ni angka bangso na asing.

JEHESKIEL 45:8

Gabe tano ni angka parkuaso na mamarenta di tano Israel ma i, anso ulang sai dipisat halahi be rayat i, tapi anso dilehen halahi salobi ni tano i gabe bagian ni angka marga-marga ni Israel.

DANIEL 9:24

Pitu noli pitu pulu taon, i ma hatiha na ditontuhon ni Debata laho paluahon bangsomu dohot kotamu na badia i sian dosa dohot hajahatan. Ampunan noma sude jana pahoton hatigoran na manongtong, lopus gabe tulus tarjadi parnidaan i, jana Bagas Ni Tuhan na badia i pasahaton ma mangulahi tu Tuhan i.

HOSEA 1:11

PasadaonNa ma mangulahi bangso Israel dohot bangso Juda. Angkaton ni halahi ma sada pamimpin jana mur mabahat ma halahi jana sonang di tano ni halahi. Tutu do, gabe ari na godang ma Ari Ni Jisreel.

HOSEA 3:5

Tapi ro do i hatihana mulak bangso Israel tu Tuhan Debata ni halahi dohot tu raja ni halahi na sian pomparan ni si Daud. Jadi gabe mabiar ma halahi jana marhabiaran tu Tuhan boti jagiton ni halahi ma angka pasupasuNa.

AMOS 9:11

Didok Tuhan ma, “Dapot do i arina pasuangonKu na masa di halak Israel anso mulak gabe songon di hatiha ni Raja Daud mamarenta. Saonnari songon bagas na marumpak do halahi. Tapi padengganonKu mangulahi lopus gabe songon na salpu i.

MIKA 5:3

Markarejo ma ia jana marmahani halahi markite-hite hagogoon ni Tuhan i dohot markite-hite hamuliaan ni goar ni Tuhan Debatania sandiri. Mangolu di bagasan sonang ma bangsona i, dibaen okuon ni jolma na satano on do hagodangannia,

ZAKARIA 3:8

Tangihon ma, ale Malim Godang Josua, dohot hamu ale angka malim na asing, hamu ma da na songon gambaran ni hatiha hasonangan na giot ro. PatidahononKu ma di hatiha i naposongKu i ma Sada Tunas.

ZAKARIA 9:9

Ale boru Sion, marjop ni roha ma ho! Marolop-olop ma hamu ale pangisi ni Jerusalem! Ligi ma! Ro rajamu mardongan hamonangan! Raja na tigor do Ia na maroban haluaan. Na serep roha do Ia, jana mangalombut halode, sada halode jara-jara.

MATEUS 2:2

Disapai halahi ma, “Di dia do Dakdanak na sorang i, i ma na gabe Raja ni halak Jahudi i? Na hami ida do bintangNa bincar di sabola Habincaran, jadi na giot marsomba tuSia do umbaen na ro hami.”

JOHANNES 1:45

Dung i marsuo muse ma si Pilipus dohot si Natanael jana didok ia ma, “Madung marsuo hami dohot Ia na nidok ni si Musa di bagasan Buku Tona i, dohot na nidok ni angka panurirang, i ma Jesus anak ni si Josep halak Nasaret i.”

JOHANNES 1:49

Didok si Natanael ma, “Rabbi, Anak Ni Debata do Ho! Ho do Raja ni halak Israel!”

1 KORINTUS 1:30

Hara ni na nibaen ni Debata sandiri do umbaen na gabe mardomu hamu dohot Kristus Jesus. Na nilehen ni Debata do Kristus tu hita, anso marguru tu Kristus hamaloanta. Angke Kristus do na padenggankon hita mangulahi dohot Debata. Laing Kristus do na papitahon hita anso gabe bangso na polin hita di Debata. Kristus muse do na paluahon hita.

IBRANI 8:8

Hape madung tardapot Debata hasalaan i di bangsoNa i, gabe didok Debata ma, “Ingot hamu ma, na ro ma hatihana, baenonKu ma janji na imbaru dohot bangsongKu Israel, dohot tu Marga Juda.

HALUMBAAN 19:11

Dung i huida ma mungkap banua ginjang, haruar ma sada kudo na bontar, jana na juguk di ginjangna i margoar, “Na Setia dohot Na Sintong,” jana markite-hite hatigoran do Ia manguhumi dohot marporang.