JEREMIA 23:3 - BIBEL JAMITA NA DENGGAN

³ Tapi palagut-lagutonKu ma teba-teba ni bangsongKi sian angka luat inganan habuangan ni halahi. ObanonKu ma halahi mulak tu bona bulu ni halahi jana mur mabahat ma pomparan ni halahi.

JEREMIA 23:3 ပူးပေါင်းရင်းမြစ်များ

MASMUR 106:47

Palua ma hami, ale Tuhan Debatanami, sian tonga-tonga ni angka bangso i oban ma hami mangulaki anso tarbaen hami mandok tarimakasi dohot mamuji goarMu na tongam i.

JEREMIA 16:15

tapi mangasahon Au Debata na mangolu, na maroban halak Israel ruar sian sada luat na di Utara dohot sude luat na asing sanga na di dia halahi Hupaserak. ObanonKu ma halahi mangulahi mulak tu bona bulu ni halahi, luat na dung Hulehen tu ompu ni halahi.”

JEREMIA 29:14

Tutu do, dumpang hamu ma Au. Palagut-lagutonKu ma hamu sian tonga-tonga ni sandok bangso sian ganop luat inganan parserahanmunu dohot habuanganmunu. ObanonKu ma hamu tu tano asalmunu on jana pasuangonKu pangalahomunu. Au Tuhan, madung mandok songon i.’

JEREMIA 30:10

O hamu bangsongKu, ulang be mabiar hamu! halak Israel, ulang humitir hamu! PaluaonKu ma hamu sian tano na dao, inganan pambuanganmunu. Mulak noma hamu jana di bagasan dame mangolu. Aman noma ngolumunu nada adong be sihabiaranmunu.

JEREMIA 30:3

Angke dapot do muse hatihana pasuangonKu mangulahi bangsongKu Israel dohot Juda; obanonKu do halahi mangulahi mulak tu tano na dung Hulehen tu ompu ni halahi. Halahi noma nampuna tano i mangulahi. Au Tuhan, madung mandok songon i.”

JEREMIA 31:7

Didok Tuhan do, “Marende ma hamu marjop ni roha di Israel bangsongKi, bangso na gumodang sian sandok bangso do i. Endehon hamu ma ende puji-pujian. ‘Na teba sian bangsoNa madung dipalua Tuhan.’

JEREMIA 31:8

Sian Utara Huoban halahi mangulahi; Hupalagut halahi sian angka ujung ni portibi. Halak na mapitung dohot na lumpu pe dohot do disi, songon i muse ina na baru horas dohot na giot di api. Giot marroan ma halahi sudena, songon bangso na godang tu luat on.

JEREMIA 32:37

PalagutonKu ma bangso on sian sude luat inganan parserahan ni halahi hara ni muruk ni rohangKu dohot rimasKu tu halahi. ObanonKu ma halahi mangulahi mulak tu inganan on jana Hubaen aman halahi maringanan di luat on.

JEREMIA 46:27

“Ale Israel bangsongKu, ulang humitir sanga mabiar hamu! PaluaonKu noma hamu sian luat na dao, disi ditaban hamu. Mulak noma hamu jana sonang maringanan di tanomunu. Mangolu ma hamu di bagasan sonang; nada adong be na porlu sihabiaran.

JEREMIA 50:19

PaulahonKu noma halak Israel tu tano ni halahi. Panganon ni halahi ma suha ni tano na sian Dolok Karmel dohot tano Basan. Butongan ma halahi marhite suha ni tano na sian Luat Efraim dohot Gilead.

JEREMIA 8:3

Jadi sanga ise halak na laing mangolu sian bangso na jahat na Husarsarkon on sun tu dia, gumonan noma dihilala halahi mate ulang pado mangolu. Au Tuhan Na Markuaso, madung mandok songon i.”

JEHESKIEL 11:17

Au, Tuhan Debata, mandok, sai na palagutonKu do halahi sian angka luat inganan parserahan ni halahi, jana paulahonKu tano Israel tu halahi.

JEHESKIEL 36:11

TambaanKu ma halak dohot pahan-pahananmu, lopus bahat sajo, umbahat sian di mulana i, jana marpinompari halahi bahat-bahat. Dos ma halahi mangolu songon di mulana i jana sonang baenonKu songon na so unjung dihilala hamu. Jadi gabe botoon ni halahi ma Au do Tuhan.

JEHESKIEL 36:24

Sian ganop bangso dohot luat, palagutonKu ma hamu jana paulahonKu tu tanomu sandiri.

JEHESKIEL 36:37

Didok Tuhan Debata i ma, “Ale bangso Israel, Hupaloas ma hamu mangulahi mangido tolong tu Au; tambaanKu ma bahat ni bilanganmunu songon punguan ni biri-biri.

HAMALIMON 26:9

Hupasupasu pe hamu jana Hulehen bahat pomparanmunu. Sude na dung Hujanjihon tu hamu, angkon patulusonKu.

MIKA 2:12

Didok Tuhan ma mangulahi, “Ale halak Israel na teba! Angkon palagutonKu do hamu jana pasadaonKu songon biri-biri na mulak tu barana. Songon padang na gok biri-biri, laing songon i ma tanomunu mangulahi gok dohot bahat ni jolma.

MIKA 7:12

Marmulahan ma tu ho angka halakmu sian ingananna be – sian Asur na di Habincaran, sian Mesir na di Selatan, sian luat na di Batang aek Efrat, sian ipar ni laut dohot sian angka dolok na dao-dao.