JEREMIA 22:18 - BIBEL JAMITA NA DENGGAN

¹⁸ Hara ni i, taringot tu si Joyakim raja ni Juda anak ni si Josia, didok Tuhan songon on, “Nada tangisan ni halak hamamatenia, nada adong na mandok, ‘Iale, dongan iale.’ Nada adong na marhabot ni roha sanga na pio-pio, ‘Ibo roha mida raja i atehe!’

JEREMIA 22:18 ပူးပေါင်းရင်းမြစ်များ

2 SAMUEL 1:26

O Jonatan, ale-alengku, hancit ate-atengku, angke na arga situtu do ho di au. Holong ni rohamu lumobi surungna tu au, umbagas dope i sian holong ni roha ni dadaboru.

1 RAJA-RAJA 13:30

Di kuburan ni sahorong panurirang na matobang i sandiri noma dikubur bangke i, lalu marsiluluton ma ia dohot angka dakdanaknia. “Ibo ni roha i mida kahanggingkon, ibo ni roha i,” ning halahi.

2 RAJA-RAJA 23:36

Marumur dua pulu lima taon ma si Joyakim na gabe raja ia di Juda, jana sabolas taon honokna mamarenta ia di Jerusalem. Si Zebudo do goar ni inangnia boru ni si Pedaya sian kota Ruma.

2 RAJA-RAJA 23:6

Laing diparuar ia muse do patung ni Debata Asera sian Bagas Ni Debata i, dioban ma i tu balian ni kota tu Rura Kidron. Ditutung ma disi patung i, diduda ma tiranggongna i lamot, jana disampakkon ma abuanna i tu ginjang ni kuburan ni halak na bahat.

1 JUJUR TAON 3:15

Adong do opat anak ni si Josia, i ma si Johanan, si Joyakim, si Zedekia dohot si Joahas.

2 JUJUR TAON 35:25

Dikarang Panurirang Jeremia ma sada ende andung di Raja Josia. Lopus tu sadari on dipake angka parende do ende i di Israel, halaklahi bope dadaboru di parningotan siluluton tu si Josia. Dipamasuk do ende i tu bagasan parpunguan ni angka ende andung.

2 JUJUR TAON 36:5

Marumur dua pulu lima taon ma si Joyakim di na gabe raja ni Juda ia, jana sabolas taon ia mamarenta di Jerusalem. Mardosa do ia tu Tuhan Debatania.

JEREMIA 16:4

Marmatean do halahi hona nyae na mambaen mate, jana marmatean ma halahi di parporangan sanga mate tangkuraparon. Sahalak pe nada adong na manangisi halahi sanga na manguburkonsa. Marampar do bangke ni halahi songon rompak-rompak di tano i, jana dipapangani unggas ma i dohot angka binatang.

JEREMIA 16:6

Marmatean ma halak na kayo dohot halak na pogos di luat on jana nada adong halak na manguburkon halahi. Sahalak pe nada adong na mamparkanciti dirina sanga mancukur uluna songon tanda ni arsak roha ni halahi.

JEREMIA 21:11

Disuru Tuhan ma au palalu tona on tu bagas ni raja ni Juda, pomparan ni si Daud, “Tangihon sanga aha na Hudok, Au Tuhan mandok. Parayak ma anso didalankon hatigoran ganop ari. Palua ma halak na hona incop sian tangan ni halak na mangincopsa. Muda nada songon i gabe gara ma murukKu songon api na so haintopan baenon ni hajahatan na nipambaenanmunu.”

JEREMIA 22:10

Hamu halak Juda, ulang ma hamu marsak hara ni parmonding ni Raja Josia. Si Joahas anakna i ma tangisi hamu angke madung hona oban ia jana nada mulak be. Nada idaonna be tano hatubuanna.

JEREMIA 22:12

Marujung di habuangan do ngolunia jana nada idaonnia be luat on.”

JEREMIA 34:5

tapi sonang do parmatemu. Jana songon na somal ditutung rayat i hamonyan di na manguburkon angka ompumunu na mamarenta di jolomu, laing songon i ma baenon ni rayat i tutungonna hamonyan di ho. Marsiluluton ma halahi jana dokkononna, ‘Iale! Nada adong be hape rajanami!’ Au Tuhan, madung mandok songon i.”

JEREMIA 36:30

Hara ni i Au Tuhan mandok tu ho ale Joyakim, sahalak pe sian pomparanmu nada adong be na mamarenta songon pomparan ni si Daud. Sampakkonon ma bangkemu tu balian, dipangan las ni ari di arian dohot ombun manyorop di bornginna.