JEREMIA 21:4 - BIBEL JAMITA NA DENGGAN

⁴ Paboahon na nidok ni Tuhan, Debata ni Israel songon on, “Zedekia, pataluonKu ma paranganmi na topet marporang mangalo raja ni Babel dohot paranganna. PagukguhonKu ma angka sinjata ni tentaramu di tonga-tonga ni kota i.

JEREMIA 21:4 ပူးပေါင်းရင်းမြစ်များ

JESAYA 10:4

Mate di bagasan porang sajo ma bagianmunu, sanga disarat-sarat songon halak na tartaban. Tapi laing na muruk dope Tuhan jana sai giot manguhumi.

JESAYA 13:4

Tangihon ma sora na gaor-gaor di dolok i – sora ni halak na marlagut bahat sajo, hagaoron ni angka bangso dohot angka harajaan na marlagut. Hatiha mamareso barisan na giot marporang i ma Tuhan Na Markuaso i.

JESAYA 5:5

Antong, songon on noma baenonKu kobun anggurKi: AngkatonKu noma handang na humaliang kobun i, tembok na manjagohon kobun i pe rumpakkononKu noma i, padiaronKu ma angka binatang riar manjampali i lalu mandege-degesa.

JEREMIA 20:4

Tuhan sandiri mandok, ‘BaenonKu ma ho gaor di bagasan dirimu sandiri dohot di angka donganmu. Idaon ni matamu ma halahi bunuon ni musu ni halahi. PadiaronKu ma sude halak Juda patunduhon ni Babel; haldungonna deba sian halahi gabe taban tu Babel jana tebana i mate niuhuman.

JEREMIA 21:3

Dung i ninna si Jeremia ma tu halahi, “Songon on ma dokkon hamu tu si Zedekia:

JEREMIA 32:24

Madung dipajongjong halak Babel angka tembok humaliang ni kota on laho manghobuk dohot mangarampassa jana saonnari mangaroro ma halahi. Parporangan, tangkuraparon dohot nyae masa ma mambaen madabu kota on tu tangan ni halahi. Diida Ho do tulus sude sandok na nidokkonMu.

JEREMIA 32:3

hara ni na ditudu au pabotohon na nidok ni Tuhan songon on, “PadiaronKu do raja ni Babel manaluhon kota on.

JEREMIA 32:5

Dung i obanonna ma si Zedekia tu Babel jana maringanan disi lopus Huuhumi ia. Haru pe diporangi ia halak Babel, nada manjadi karejonia i. Au Tuhan, madung mandok songon i.”

JEREMIA 33:5

Parcuma do nialo halak Babel i, harana hum na pabahat-bahat bangke ni jolma do i lopus gok kotamunu, i ma angka na Humatehon di bagasan muruk dohot rimasKu maradopkon halahi. Nada ringkot be rohangKu mida kota on, hara ni angka jolma na disi na dung mambaen jahat.

JEREMIA 35:17

Hara ni i, Au Tuhan Na Markuaso, Debata ni Israel, paroonKu ma tu hamu halak Juda dohot Jerusalem – sandok parmaraan na giot dondonkononKu tu hamu, songon na dung Hudokkon i. Hubaen pe sudena i, hara ni na so ra do hamu manangihon muda mangkuling Au tu hamu jana nada ra hamu mangalusi di na pio-pio Au tu hamu.”

JEREMIA 39:3

jana ditaluhon ma Jerusalem. Jadi marroan ma sude angka perwira tinggi ni raja Babel jana diingani ma Pintu Horbangan Tonga. Deba sian halahi i ma si Nergal-Sareser, si Samgar Nebo, si Sarsekim kepala ni rumahtangga ni bagas godang, si Nergal-Sareser Rabmag dohot angka parpangkat na asing.

JEREMIA 52:18

Angka barang-barang on pe dioban halahi do: Sodok-sodok, inganan ni sirabun ni langgatan, angka parkokas ni lampu, angka sambong panarean ni mudar ni binatang na disambol baen haul, angka sambong sipakeon manutung dupa dohot angka barang-barang na asing na sian tumbaga sipakeon di paribadatan. Angka barang sere dohot perak, masuk ma disi angka mangkuk, dalihan, angka sambong inganan ni mudar ni pahan-pahanan na disambol baen haul, inganan ni sirabun, pat ni parlampuan, angka sambong panutungan ni dupa dohot angka mangkuk pangusean ni haul aek ni anggur.

ANDUNG 2:3

Di bagasan parpiar ni murukNa, gogo ni Israel diponggolkon Ia. Taran ro musu mangaroro, nada ringkot rohana mangalehen pangurupiNia. Songon api na manggasa-gasa mangabisi sasudena, songon i ma Tuhan muruk tu Israel.

ANDUNG 2:5

Gabe tudos tu musu do Tuhan; dilibas Ia Israel lopus mardabuan. Dironcohon Ia angka benteng dohot bagas godang, jana diparo Ia pardangolan tu halak ni Juda.

ANDUNG 2:7

Ditulak Tuhan do langgatanNa na badia i. Nada ra be Ia mangakui bagasNia sandiri; dipadiar Ia musu i mangaroncohon angka tembokna i. Di ingananta na salpu i maribadat marjop ni roha, marsurak musu songon na marpesta.

JEHESKIEL 39:3

Disi ma lipatonKu siornia i lopus madabu sian tangan siambirangnia i, jana dabuhononKu angka anak ni panania i sian tangan siamunnia.

HOSEA 9:12

Tapi haru pe adong dakdanak na sorang jana na dipagodang-godang, buatonKu do halahi; sahalak pe nada Hupaloas mangolu. Marjaya ma hamu ale bangso Israel, muda jabat Hutadingkon hamu!”

ZAKARIA 14:2

Palaguton ni Tuhan ma sandok bangso laho mamorangi Jerusalem. Taluhononna ma kota i, jana dirampasi angka bagasna i, jana angka dadaboru na disi paksaonna marmainan. Satonga sian halak kota i obanonna tu habuangan, tapi anggo na asing i tading do di kota i.

MATEUS 22:7

Dung dibege raja i na songon i, muruk sajo ma ia. Gabe disuruhon ia ma tentarania mambunu angka sibunu jolma i dohot manyurbu kota ni halahi.