JEREMIA 21:10 - BIBEL JAMITA NA DENGGAN

¹⁰ Madung Huputuskon do laho mangaroncohon kota on jana nada adong pangusayangna. Pasahaton noma kota on tu raja Babel; giot surbuonnia kota on lopus abis sudena. Au Tuhan madung mandok songon i.”

JEREMIA 21:10 ပူးပေါင်းရင်းမြစ်များ

2 JUJUR TAON 36:19

Ditolbakkon ia ma tembok ni kota Jerusalem jana disurbu ia kota i dohot Bagas Ni Tuhan maradu bagas godang maradu sude angka barang sigodang arga na adong dope di bagasan angka bagas godang i.

MASMUR 34:16

Hape anggo halak na jahat, dialo Ia; dung mate, tibu-tibu halahi lupa sian roha.

JEREMIA 17:27

Tarjadi ma sudena i muda dung marpangoloion hamu tu Au jana diparbadia i hamu Ari Sabat i songon ari na mardohonan. Ulang maroban barang bagi aha pe hamu mamolus sian angka horbangan ni Jerusalem anggo di ari i. Muda dilanggar hamu do angka na Huparentahon i, tutungonKu abis angka horbangan ni Jerusalem i dohot angka bagas godang na disi jana nada haintopan api i.’ ”

JEREMIA 26:6

Anggo laing tong do hamu manangkang, baenonKu do bagas paribadatan on songon na Hubaen tu Silo, lopus sandok bangso na satano on mamake goar ni Jerusalem on gabe bura.”

JEREMIA 33:5

Parcuma do nialo halak Babel i, harana hum na pabahat-bahat bangke ni jolma do i lopus gok kotamunu, i ma angka na Humatehon di bagasan muruk dohot rimasKu maradopkon halahi. Nada ringkot be rohangKu mida kota on, hara ni angka jolma na disi na dung mambaen jahat.

JEREMIA 34:2

Disuru Ia ma au kehe tu si Zedekia raja ni Juda mandok songon on, “Au Tuhan Debata ni Israel, giot pasahatonKu kota on tu raja ni Babel jana surbuonnia noma i lopus abis.

JEREMIA 34:22

ParentahononKu ma anso mulak halahi tu kota on, jadi serangon ni halahi ma, masuhanna lalu surbuonna. Giot baenonKu angka kota ni Juda songon halongonan na so diingani ni jolma. Au Tuhan, madung mandok songon i.”

JEREMIA 38:17

Dung i hudok ma tu si Zedekia, songon on do didok Tuhan Na Markuaso i, Debata na nisomba ni halak Israel, “Muda dipasahat ho do dirimu tu angka tentara ni raja Babel i, nada bunuonna ho, jana kota on pe nada tutungonna. Malua do ho dohot dongan sabagasmu.

JEREMIA 38:18

Tapi muda nada ra ho manyora, madabu ma kota on tu tangan ni halak Babel; surbuon ni halahi ma kota on lopus abis, jana ho pe nada tarbaen malua.”

JEREMIA 38:23

Hudok ma mangulahi, “Sude isi ni bagas ni raja i obanon ni halak Babel ma haruar. Raja i sandiri pe nada malua. Tangkupon ni raja Babel ma raja i jana kota on surbuonna ma sude.”

JEREMIA 39:16

mandok tu si Ebedmelek halak Sudan i bahaso na nidok ni Tuhan Na Markuaso i, Debata ni Israel songon on, “Songon na Hudok na salpu i, na giot paroonKu parmaraan tu kota on, jana nada hasonangan. Idaonmu do tarjadi na masa i.

JEREMIA 39:8

Disurbu angka halak Babel i muse ma bagas godang ni raja i dohot angka bagas ni rayat lalu diparrumpakkon ma angka tembok ni Jerusalem i.

JEREMIA 44:11

Jadi hara ni i, Au Tuhan Na Markuaso, Debata ni Israel, baenonKu ma hamu songon Juda jana patimpasonKu.

JEREMIA 44:27

JalahanKu do dalan anso mago hamu jana nada marhasonangan lopus mate hamu sudena, bope di parporangan sanga pe hara ni nyae masa.

JEREMIA 52:13

Disurbu si Nebusaradan ma Bagas Ni Debata, bagas godang ni raja i dohot sude bagas ni halak na godang-godang di Jerusalem.

JEHESKIEL 15:7

Au sandiri angkon mangalo halahi. Haru pe malua halahi sian api, tapi panganon ni api i do halahi. Jadi botoonmunu ma bahaso Au do Tuhan hatiha Hualo halahi.

JEHESKIEL 24:11

Saonnari baen ma hudon loyang na rumar i di ginjang ni api i jana padiar disi lopus mosok marrara. Dung mosok tasikna i, baru ma ias hudon i mangulahi mangihutkon aturan ni ugamo.

HAMALIMON 17:10

Muda adong sahalak Israel sanga sahalak na leban na dung honok rap dohot halak Israel, mangankon juhut na marmudar dope, gabe aloon ni Tuhan ma halahi, jana nada etongon be ia sada sian halakNia.

HAMALIMON 26:17

Au do alomunu, gabe ditaluhon hamu jana halak na mangkagigihon hamu, gabe mangkuasoi hamu. Gok biar ma hamu, gabe marlojong hamu haru so adong mangayak-ayak.

AMOS 2:5

Hara ni i, tongosonKu ma api tu Juda jana surbuonna ma lopus abis angka benteng ni Jerusalem.”

AMOS 9:4

Muda hona tangkup halahi dibaen musu, parentahononKu ma anso dibunu halahi. Madung putus rohangKu laho mangabisi halahi jana nada urupanKu halahi.”

ZAKARIA 1:6

Tapi sude hata dohot angka paraturanKu na dung Huparentahon tu angka naposongKu, angka panurirang, nada he madung lalu i tu angka ompumunu?” Jadi muba ma roha ni halahi, jana ninna ma, “Songon Tuhan Na Markuaso na marsangkap mambaen pangalaho maradopkon hita, tudos tu na hita karejohon, songon i ma dibaen Ia pangalaho maradopkon hita.”