JEREMIA 2:31 - BIBEL JAMITA NA DENGGAN

³¹ O hamu Israel, tangihon ma angka hatangKon. Unjung ma he Au songon padang halongonan maradopkon hamu, sanga songon tano na golap bulita jana na gok parmaraan? Hape biasi didok hamu sai na giot bebas hamu, jana nada ra be mulak mangulahi tu Au?

JEREMIA 2:31 ပူးပေါင်းရင်းမြစ်များ

1 RAJA-RAJA 11:22

“Biasi?” ning raja i manyapai. “Adong he na hurangan ho dison, umbaen na giot mulak ho tu tano hatubuanmu?” “Nada nian,” ning si Hadad, mangalusi, “Tapi padiar ma songon i kehe au.” Jadi mulak ma ia tu tano hatubuannia.

2 JUJUR TAON 31:10

didok sintua ni Malim Asarya sian pinompar ni si Zadok ma tu raja i: “Sian dung dipungka halak mamboan silehen-lehen tu Bagas Ni Tuhan; sai mangan do hami jana butong jana marlobi-lobi dope bahat sajo; angke madung dipasupasu Tuhan bangsoNia, hara ni i do umbaen na lobi angka guguan on.”

JOB 21:14

Hape nian didok halahi do tu Debata, ‘Padao ma sian hami, kehe ma Ho da! Nada pardulinami jana nada ra hami mangastui, sanga aha na di rohaMi bope hagiotMu salaho tu ngolunami.’

MASMUR 10:4

Nada parduli tu Tuhan anggo halak pardosa; hara ni jungkatna, dipikiri ia nada adong Debata.

MASMUR 12:4

Didok halahi do, “Markuaso do hami marhite dilanami; tarbaen hami mangkatai sagiotnami, jana nada adong tarbaen na mangambati!”

PODA 30:9

Harana, muda ompot kayo au, betak na gabe dokkononku do, na so porlu Ho di au. Jana muda marpogos au, betak na manangko ma au, jadi gabe hodar goarMu.”

JESAYA 45:19

Nada Au mandok hata marsibuni-sibuni, sangkapKu nada i Hututup-tutupi. Nada Hupangido sian bangsongKu Israel anso jalahanna Au di inganan na lungun di na pinjil. Au do Tuhan; na patangkas habonaran, jana Hubaritahon hatigoran.”

JEREMIA 2:20

Didok Tuhan, “Madung honok na so ra ho tunduk tu Au; nada ra ho mangoloi sanga marsomba tu Au. Di puncu ni ganop dolok na gincat, dohot di toru ni sandok hayu na rumbun disomba ho do angka debata ni hagabean.

JEREMIA 2:25

Ale Israel, tongtong ma ho marsipatu jana ulang padiar manguas ho hara ni na parayakkon debata na asing. Tapi nimmu do, ‘Nada! Nada tarbaen au mulak. Madung huhaholongi debata na asing jana i noma ihutkononku.’ ”

JEREMIA 5:5

Dumengganan ma au kehe tu angka halak na godang anso mangkatai dohot halahi. Anggo halahi pasti diboto halahi sanga aha hagiot ni Tuhan Debata ni halahi.” Hape halahi sude pe nada ra diparenta Tuhan; nada ra halahi mangoloi Ia.

JEREMIA 5:6

I ma dalanna gabe soroon ni singa na sian harangan halahi, jana diparsuragehon ni sorigala na sian padang halongonan. Humadeap ma angka angguliman manjalahi soroanna di bagasan angka kota ni halahi, jana sanga ise na ruar sian bagasna soroanna noma i. Patunda ni na dung bahat do halahi mardosa umbaen na tarjadi sudena i, jana marpupu halahi manghudukkon Debata.

JEHESKIEL 14:5

Sude gana-ganaan i padaohon bangsongKi do sian Au, tapi marhite alus i sai anggiat ma nian mulak bangsongKi tu Au.’

HOSEA 13:6

Hape dung lalu hamu di tano na denggan jana butongan hamu lopus sombu, gabe ginjang ma rohamunu jana lupa ma hamu tu Au.

AMOS 1:1

Hata salaho tu si Amos, sada halak parmahan sian kota Tekoa, taringot tu Israel di hatiha Raja Usia mamarenta di tano Juda jana Raja Jerobeam anak ni si Joas mamarenta di Israel, dua taon painte so ro lalo.

MIKA 6:9

Habisuhon do muda mangkabiari Debata. Pio-pio do Ia tu halak na mangingani kota, didok Ia do, “Tangihon ma ale hamu na marlagut di bagasan kota!

1 KORINTUS 4:8

Nada adong be na hurang di hamu! Madung mamora hamu! Ma gabe raja hamu! Hape hami inda. Denggan ma i, muda tutu do raja hamu, anso tarbaen hami rap dohot hamu mamarenta.

PANGARATAION 31:20

ObanonKu ma halahi tu tano na napu jana na marlobian susu dohot madu, songon na dung Hujanjihon tu ompu ni halahi. Dapot halahi ma disi sipanganon na porlu di halahi jana mangolu di bagasan sonang ma halahi. Tapi di pudian ni ari marbalik ma halahi jana marsomba tu angka debata na asing. Tulahon ni halahi ma Au jana gagaan ni halahi ma parjanjianKu,

PANGARATAION 32:15

Gabe maradong bangso ni Tuhan, tapi sai tagi mangalo, ditulak halahi do Sipalua na gumogo. Mamokmohi halahi, butongan sipanganon. Ditadingkon halahi do Debata Na Manjadihon.

PANGARATAION 32:18

Ditadingkon halahi do Debata Sipalua, Tuhan silehen ngolu dihalupahon.