JEREMIA 2:19 - BIBEL JAMITA NA DENGGAN

¹⁹ Hajahatanmu sandiri do manguhumi dirimu; hona parkancitan ho hara ni na ditulakmu Au. Saonnari taonkon ma paetna dohot paniakna muda dihudukkon jana nada dipasangap ho Au. Au, Tuhan Debatamu madung mandok songon i; Au ma da Tuhan Debata Na Markuaso jana Na Gumogo.”

JEREMIA 2:19 ပူးပေါင်းရင်းမြစ်များ

1 RAJA-RAJA 18:18

“Nada au sibaen gaor,” ning si Elia, “Tapi raja i sandiri do, raja i dohot dongan sabagas ni raja i. Di na marsomba raja i tu angka gana-ganaan ni Baal dilaosi raja i ma angka na niparentahon ni Tuhan.

2 JUJUR TAON 12:5

Ma marlagut di hatiha i Raja Rehabeam dohot angka pamimpin ni Juda di Jerusalem anso maporus sian si Sisak. Ro ma Panurirang Semaya mandok tu halahi, “Songon on do pandok ni Tuhan, ‘Ditadingkon hamu do Au antong, jadi saonnari Au pe Hutadingkon ma hamu anso gabe dikuasoi si Sisak hamu.’ ”

2 JUJUR TAON 21:10

Mamungka sian i nada tunduk be Edom tu Juda. Laing di hatiha i mangalo muse ma Libna. Tarjadi pe sudena i hara ni na nitadingkon ni si Joram do Tuhan, Debata na nisomba ni ompuna.

2 JUJUR TAON 25:16

“Pahohom,” ning si Amasia, “Anggo inda, hami bunu ho annon! Nada jungada hami angkat ho gabe panuturi ni raja!” Jadi gabe sip ma panurirang i, tapi painte so i sanga dope tardokkon ia, “Saonnari ma pasti huboto na matehonon ni Debata noma raja i hara ni pambaenan ni raja i, boti hara ni na so diterge raja i sipaingotku.”

MASMUR 36:1

Halak na jahat mangihutkon pangelek ni dosa; umpe mabiar ia saotik mida Debata.

HARURUAR 33:6

Songon i ma dalanna nada mamake barang parhiasan be halak Israel mamungka sian Dolok Sinai.

PODA 1:31

Jadi, patunda ni angka parbuatanmunu i rasoanmunu ma i lopus gabe mardangol hamu.

PODA 1:32

Mate ma halak na so marpangalaman patunda ni na so ra manjagit au, jana magete ma halak na oto hara ni na so ra mangalehen rohana tu au.

PODA 5:22

Songon tirangkap do dosa ni jolma na jahat na manjorat halakna i sandiri.

JESAYA 3:9

Bohi ni halahi patidahon hajahatanna, jana songon halak Sodom, patar-patar halahi paboahon angka dosana, nada ditabunihon be. Marjaya ma halahi! Angke diparo halahi do uhum tu dirina sandiri.

JESAYA 5:5

Antong, songon on noma baenonKu kobun anggurKi: AngkatonKu noma handang na humaliang kobun i, tembok na manjagohon kobun i pe rumpakkononKu noma i, padiaronKu ma angka binatang riar manjampali i lalu mandege-degesa.

JESAYA 50:1

Songon on do hata ni Tuhan: “Di dia ulaning surat sirang ni inangmu tanda na Huusir ia? Sanga tu ise dehe sian parsingiranKu, jungada Hugadis ho? Satutuna, hara ni hasalaanmu sandiri do umbaen na targadis ho, jana hara ni pangalaosimu sandiri do umbaen na diusir inangmu.

JEREMIA 1:16

UhumanKu ma bangsongKi patunda ni na mardosa halahi jana dihudukkon halahi Au. Dihaulkon halahi do antong haul tu angka debata na asing, jana dipambaeni halahi patung lalu disomba halahi.

JEREMIA 13:22

Betak sapa-sapa hamu biasi ro i tu hamu, biasi disibakkon pakeanmunu jana dibaen tu hamu roha-rohana. Patut angkon botoonmunu, patunda ni na magodangtu do dosamunu umbaen na tarjadi sudena i.

JEREMIA 2:17

Ho sandiri do mangalapi sude na tarjadi tu ho sandiri, angke dompak Hutogu ho di pardalanan, dihudukkon ho do Au, Tuhan Debatamu.

JEREMIA 3:22

O hamu sude na manadingkon Tuhan, mulak ma hamu! PamalumonNia ma hamu, jana baenonNia ma hamu setia. Didok hamu, “Olo da, saonnari ma hami ro tu Tuhan, angke Ia do antong Debatanami.

JEREMIA 4:18

O Juda, na nialapanmu sandiri do hamagoan i tu ho. Parngoluonmu dohot angka parangemu do mambaen sude pardangolan i manyusuk tu ate-atemu.

JEREMIA 5:22

Au ma da Tuhan; biasi nada mabiar hamu tu Au? Sapatutna angkon humitir do hamu nian maradopkon Au! Au do da mambaen pante gabe batas ni laut na so hasalpuansa salolot-lolotna. Tarbaen laut i do marombak jana tarbaen galumbang i do mangamuk, tapi nada tarsalpuisa batas i.

JEREMIA 5:24

Nada unjung diingot hamu laho pasangapkon Au, hape Au do nian na manongos udan, mamungka sian bona ni ari nonat lopus tu ujungna; laing Au muse do na mangalehen masa ni sabion di hamu ganop taon.

JEREMIA 5:6

I ma dalanna gabe soroon ni singa na sian harangan halahi, jana diparsuragehon ni sorigala na sian padang halongonan. Humadeap ma angka angguliman manjalahi soroanna di bagasan angka kota ni halahi, jana sanga ise na ruar sian bagasna soroanna noma i. Patunda ni na dung bahat do halahi mardosa umbaen na tarjadi sudena i, jana marpupu halahi manghudukkon Debata.

JEREMIA 7:19

Hape anggo satutuna nada rohangKu na nipahancit ni halahi, tapi dirina sandiri do, gabe maila ma halahi.

JEREMIA 8:5

Hape anggo hamu bangsongKu, biasi ditadingkon hamu Au, jana nada ra mulak tu Au? Ditulak hamu do Au jana togu hamu marsitiopan tu gana-ganaanmunu i!

JEHESKIEL 23:30

baen na ro bagianmu na jatjat on tu ho. Gabe siboru panggampang ho di angka bangso jana dibaen ho dirimu gabe ramun marhite angka gana-ganaan ni halahi.

JEHESKIEL 39:24

Hubaen tu halahi hombar tu hahodaran dohot hajahatan ni halahi, dung i Hutadingkon ma halahi.”

HOSEA 11:7

dohot hara ni jogal ni rohana laho manadingkon Au. Jadi gabe tarpisat ma halahi, tapi nada adong na paluahon haru pe marsurak halahi mangido tolong.”

HOSEA 13:9

SargehononKu ma hamu, ale bangso Israel! Jana ise ma na margogo mangurupi hamu?

HOSEA 14:1

Angkon uhumon do Samaria hara ni na mangalo tu Au. Marmatean ma rayatna i di bagasan parporangan; hona giling angka dakdanakna na baru sorang, jana angka dadaboru na denggan pamatangna hona bola butuhana i.”

HOSEA 4:16

Harana tangkang do Israel songon lombu na tangkang, giot bia ma he Tuhan marmahani halahi, songon biri-biri di tano lapang?

HOSEA 5:5

Torang do tarida bulbul ni bangso Israel jana i ma tanda ni hajahatan ni halahi. Dosa ni halahi do mambaen tartuktuk lalu tinggang Efraim, jana dohot do bangso Juda tinggang rap dohot halahi.

HOSEA 7:2

Na so unjung do mamolus di pikiran ni halahi, sai paingot-ingotonKu do sude hajahatan ni halahi i. Humaliang halahi do angka dosa ni halahi gabe tangkas do Huida sudena.”

HOSEA 9:1

Ale bangso Israel, ulang be hagodangkon hamu angka ari pestamunu songon angka bangso na asing. Madung ditadingkon hamu Debatamunu jana nada burju hamu tuSia. Di sude luat on, digadis hamu do dirimunu songon panggampang tu Debata Baal, jana sonang rohamunu manjagit gandum na nietong ni rohamunu songon upa ni debata i tu hamu!

AMOS 8:10

PaubaonKu ma angka ari pestamunu gabe siluluton, jana angka ende-endemunu gabe andung. BaenonKu ma hamu marcukur obuk dohot mamake abit goni tanda ni arsak. Gabe songon na tobang-tobang na manangisi parmate ni anakna sisada-sada ma hamu. Marujung ma ari i di bagasan arsak na lobi godang.

MIKA 1:5

Tarjadi pe sudena i hara ni na mardosa jana mangalo do halak Israel tu Debata. Ise dehe na sala umbaen jabat Israel mardosa? Nada he Samaria kota sabunganna sandiri do? Ise dehe na sala umbaen jabat Jerusalem marsomba gana-ganaan? Nada he Jerusalem sambing do?

ZAKARIA 7:11

Tapi nada diantureskon halahi jana mangalo, jana dipaingol do pinggolna anso ulang marbinege.

SURAT NI SI PAULUS TU PARLAGUTAN ROM 3:18

Nada adong biar mida Debata di halahi.”

HAKIM-HAKIM 10:13

Haru songon i pe, laing dihudukkon hamu dope Au, lalu kehe hamu marsomba tu angka dewa. Jadi saonnari nada ra be Au paluahon hamu.