JEREMIA 18:16 - BIBEL JAMITA NA DENGGAN

¹⁶ Madung dibaen halahi luat on gabe inganan na jorbut jana gabe sihata-hataan sapanjangna. Sandok halak na mamolus marsiupirkon uluna be hara ni jorbut ni pangkilalaanna.

JEREMIA 18:16 ပူးပေါင်းရင်းမြစ်များ

1 RAJA-RAJA 9:8

Bagas parsombaan on, angkon gabe tiranggong, pola tehe sude halak na mamolus disi gabe homang jana tarsonggot. Dohonon ni halahi ma, ‘Biasi dibaen Tuhan i songon i tu luat on dohot tu bagas parsombaan on?’

2 JUJUR TAON 29:8

Jadi di bagasan hamuruhonNa, diuhum Tuhan ma Jerusalem dohot Juda. Jana torang do diboto hamu sudena, songon dia songgotna dohot jorbutna pangkilalaan ni sude halak di tindakan ni Tuhan i.

MASMUR 109:25

Madung gabe jaya au di halahi, mupir-upir ulu ni halahi marnida au.

MASMUR 22:7

Sude na marnida au mangincahi jana mangalayasi, mamursikkon dohot mangupir-upirkon ulu halahi.

MASMUR 44:14

Dibaen Ho do hami gabe siincahan ni angka bangso, mopeng-openg ma ulu ni halahi lalu mangurkai.

JESAYA 37:22

madung didok Tuhan tu si Sanherib, “Partataan jana pacia-ciaon ni kota Jerusalem do ho, ale Sanherib.

JESAYA 6:11

Marsapa ma au, “Sadia honok ma na songon on ale Tuhan?” AlusNia, “Lopus gabe tinggal sego-segona sajo angka kota jana mamolngit, lopus nada diingani be angka bagas, lopus rumar tano i jana nada tubuan sanga aha.

JEREMIA 19:8

BaenonKu hamamago na mansai jorbut tu kota on, anso sude halak na mamolus sian i tarsonggot jana mangupir.

JEREMIA 25:9

‘PiohononKu ma sude bangso na sian Utara, songon i muse naposongKu si Nebukadnesar raja ni Babel. ArahononKu ma halahi marporang mangalo Juda dohot halakna i sude dohot bangso na humaliangsa. PatimpasonKu sude bangso on rap dohot angka bangso hombarna jana padiaronKu malala sapanjangna. Tarsonggot ma halak na midasa jana panyogiton. Au Tuhan, madung mandok songon i.

JEREMIA 29:18

Kojar-kojaronKu halahi marhite porang, tangkuraparon, dohot nyae masa lopus jorbut pangkilalaan ni sude bangso na satano on marnida na masa tu halahi. Siincak-incahan noma halahi jana goar ni halahi gabe songon bura.

JEREMIA 42:18

Songon dia pangalaluhonKu, Au Tuhan Na Markuaso, Debata ni Israel, di hamumurukKu dohot hosom ni rohangKu tu halak Jerusalem, songon i muse ma palaluonKu hosom ni rohangKu tu hamu na kehe tu Mesir i. Gabe mabiar ma halak mida hamu; incahanna hamu, jana goarmunu baenon ni halak gabe songon bura. Nada idaonmunu be bona bulumunu on.”

JEREMIA 44:12

Jana ampot adong sian halak Juda na teba i na sai marpor ni roha tu Mesir laho maringanan disi, gabe bunuonKu ma halahi. Sude halahi na menek na godang, mate ma di Mesir baenon ni porang sanga hara ni haleon potir. Gabe jorbut pangkilalaan ni halak mida halahi jana palayasonna halahi. Gabe goar bura ma baenon ni halak goar ni halahi.

JEREMIA 48:27

Nada he Moab do najolo na mampartatai halak Israel dohot na pailahon halahi songon dia ma rupani panangko na tardapot halahi?

JEREMIA 49:13

Husumpahon mangasahon goarKu sandiri, anggo kota Bosra gabe inganan na jorbut noma i na nitadingkon ni halak. Partataan ni halak ma i jana baenonna goarna i gabe bura. Sude angka huta na menek na humaliang i gabe tinggal sego-segona noma i sapanjangna. Au Tuhan, madung mandok songon i.”

JEREMIA 49:17

Didok Tuhan, “Hara ni godangna parmaraan na mandondoni Edom, jabat do gabe tarsonggot ganop halak na mamolus sian i jana mabiar.

JEREMIA 50:13

Hara ni na muruk Au, gabe tinggal sego-segona noma Babel jana gabe lobu. Sude halak na mamolus sian i gabe tarsonggot jana longang.

JEREMIA 51:37

Timbunan ni na marsegoan noma luat i, inganan partabunian ni anjing riar. Jorbut hilalaon ni halak marnidasa jana sahalak pe nada adong na ra maringanan disi.

JEREMIA 51:43

Gabe inganan na jorbut noma angka kotana, tudos tu padang halongonan na harsang. Nada adong halak na ra maringanan sanga mamolus disi.

JEREMIA 9:11

Didok Tuhan, “Gabe lobu baenonKu Jerusalem inganan partabunian ni sorigala. Mamolngit ma angka kota ni Juda, inganan na so adong be pangisina.”

ANDUNG 1:12

“O hamu angka halak na mamolus di dalan, ligi pe da jana parrohahon. Adong dehe godang ni parkancitan songon na hutaon saonnari, hara ni muruk ni Tuhan i?

JEHESKIEL 12:19

Jana dokkon ma tu pangisi ni kota on; songon on do pandok ni Tuhan Debata taringot tu pangisi ni Jerusalem na di Israel: Angkon humitir ma halahi mangan jana manghutur laho minum anso gariang tano ni halahi angke nada adong be pangisina, hara ni hakejamon ni sude halak na tinggal disi.

JEHESKIEL 27:36

Limpot noma ho sapanjangna. Angka parboniaga di sandok tano on gabe tarsonggot hara ni biarna betak sai ro bagian sisongon i, tung na dangol do ujungmu mago ma ho salolot-lolotna.”

JEHESKIEL 36:3

Hara ni i manyurirangi jana dokkon ma: Songon on ma didok Tuhan Debata. Hara ni musu na di humaliangmu, na mambaen hamu mamolngit jana na marpor ni roha tu hamu anso gabe nampuna ni angka bangso, jana madung dipahata-hata halak hamu.

JEHESKIEL 6:14

Olo antong, pahortangonKu ma tanganKu jana ropuhonKu luat ni halahi i lopus gabe mamolngit mamungka sian halongonan na di Selatan lopus tu kota Ribla di Utara. Sian angka inganan ni halak Israel, sahalak pe nada adong na giot paluaonKu. Jadi gabe botoon ni halak ma, Au do Tuhan.”

HAMALIMON 26:32

Maronco ma luatmu sude, pola tarsonggot angka musumu na marnida i hara ni bahat ni na maronco i.

HAMALIMON 26:43

Tapi angkon jolo rumar do tano i dibaen pangisina, anso tarbaen sonang maradian. Jana bangsongKu angkon mandalani sude uhuman na hona tu halahi hara ni na so ra halahi mangihutkon angka tonangKu dohot parentangKu.

MIKA 6:16

Tarjadi pe sudena i patunda ni na niihutkonmunu ma angka parbuatan jahat na nibaen ni Raja Omri dohot Raja Ahab, anakna i. Diihutkon hamu do antong angka pangalaho ni halahi. Hara ni i roncohononKu ma hamu, jana siincahan dohot silayason ni sandok bangso ma hamu.”

MATEUS 27:39

Mopeng-openg ma ulu ni halak na mamolus disi mangincahi Jesus.

MARKUS 15:29

Sude halak na mamolus sian i, marsiincahi ma tu Jesus, mangalayasi. Mopeng-openg be ma ulu ni halahi mandok, “O, ale Ho na giot mangarumpakkon Bagas Ni Debata jana na giot pajongjongkonna di bagasan tolu ari,

PANGARATAION 28:59

paroon ni Tuhan ma tu ho dohot tu pomparanmunu angka nyae na so tarpamalum dohot angka nyae na mangalangkoti na so haantahan.

PANGARATAION 29:23

Gabe padang na gariang ma angka ladangmunu ditutupi barerang dohot sira. Nada tarsuani be tanona i, jana duhut pe nada ra be tubu disi. Tudos noma tanomunu i tu kota Sodom dohot Gomora, Adma dohot Zeboim na nironcohon ni Tuhan di na gurgur rimasNia.