JEREMIA 17:25 - BIBEL JAMITA NA DENGGAN

²⁵ Anggo disitutui hamu do mandalankon angka na Huparentahon, gabe hot ma habangsa ni si Daud juguhan ni pomparanna. Jana manengget kareta ma halahi dohot kudo, halahi rap dohot angka na mora-mora, halak Juda dohot halak na maringanan di Jerusalem, jana kota Jerusalem pe tongtong noma ribur.

JEREMIA 17:25 ပူးပေါင်းရင်းမြစ်များ

2 SAMUEL 7:16

Angkon tongtong do adong pomparanmu, jana baenonKu harajaanmu martahan salolot-lolotna. Na so ra marujung do harajaanmu?’ ”

2 SAMUEL 8:4

Ditaban si Daud do tentara ni si Hadadeser 1.700 halak na markudo, 20.000 halak pardalan pat. Ditadingkon si Daud ma kudo i tuk tu saratus kareta jana lobina i dipatengka ia patna i.

HARURUAR 12:14

Ari on ma ari parningotan di hamu. Angkon pagodangonmunu do ari on laho marningot angka aha na dung Hubaen. Rayahon hamu ma ari on salolot-lolotna.”

JESAYA 9:7

Mur tu godangna do kuasonia, jana tongtong dame harajaannia. Ia ma raja na songon panggonti ni si Daud, marojakan tu hatigoran dohot hasintongan do harajaannia sian mulai saonnari lalu tu salolotna. Angkon tulus sudena i baenon ni Tuhan Na Markuaso i.

JEREMIA 13:13

Jadi dokkon ma tu halahi na giot gohanKu dohot anggur lopus mabuk angka jolma na adong di luat on, angka raja-raja pomparan ni si Daud, angka malim, panurirang dohot sude halak na maringanan di Jerusalem.

JEREMIA 22:2

Dokkon ma: Tangihon ma hata ni Tuhan ale raja ni Juda na juguk di habangsa ni si Daud, ho dohot angka pagawemu dohot rayatmu na masuk tu pintu harbangan on!”

JEREMIA 22:30

“Na dung ditontuhon do jolma i agoan angka dakdanakna jana sai lus di bagasan ngoluna. Sian pomparanna nada adong na marhasil mamarenta di Juda songon raja sian pomparan ni si Daud. Au Tuhan, madung mandok songon i.”

JEREMIA 22:4

Muda disitutui hamu do mandalankon angka na Huparentahon on, gabe hot do habangsa ni si Daud juguhan ni pomparanna. Jana tarbaen halahi ma rap dohot angka pagawena maradu rayat mamolus angka horbangan ni bagas godang on manaek tu kareta dohot kudo.

JEREMIA 25:5

Disuru halahi do hamu manadingkon parngoluonmunu na jahat i dohot angka parbuatanmunu na gok dosa i anso tarbaen hamu hot maringanan di tano pusako na nilehen ni Tuhan tu hamu dohot tu angka ompumunu songon tano pusako.

JEREMIA 33:15

Anggo di hatiha i pilionKu ma sada raja na tigor sian pomparan ni si Daud. Padalanon ni raja i ma hatigoran dohot na sintong di sude luat.

JEREMIA 33:17

Au Tuhan, marjanji do Au paboa na tongtong adong sada raja di Israel sian pomparan ni si Daud;

JEREMIA 33:21

Laing songon i muse ma, madung Hupudun parjanjian dohot naposongKu si Daud, na mandok na giot adong sada sian pomparannia na gabe raja; jana madung Hupudun parjanjian dohot angka malim pomparan ni Marga Levi paboa na tongtong oloan ni halahi Au. Nada tarsesa be angka parjanjian i.

JEREMIA 7:3

Songon on do hata ni Tuhan Na Markuaso i, Debata ni Israel, ‘Pauba ma pangalahomu dohot pambaenanmu anso ra Au maringanan di inganan on rap dohot hamu.’

JEREMIA 7:7

Muda songon i, ra ma Au maringanan rap dohot hamu di inganan on, di tano na Hulehen tu ompungmunu sian na jolo lopus tu salolot-lolotna, luat na dung Hulehen gabe tano pusako di ompungmunu.

PANGARATAION 17:16

Muda raja, nada tola bahat kudona baen di tentarana. Nada tola suruonnia halak tu Mesir laho manobusi kudo, dibaen madung didok Tuhan do na so tola be mulak bangsoNia i tu luat i.

IBRANI 12:22

Tapi anggo hamu, Dolok Sion noma na niadopanmunu bope Kota Ni Debata na mangolu, i ma Jerusalem na di banua ginjang dohot surusuruanNa na marribu-ribu.

1 SAMUEL 8:11

“Songon on ma baenon ni rajamunu i tu hamu,” songon i ma dipatorang si Samuel, “Paksaonna ma angka dakdanakmunu masuk tentara; deba ma i gabe parangan na markareta, deba gabe parangan na markudo, jana na asing i gabe parangan na mardalan pat.