JEREMIA 15:2 - BIBEL JAMITA NA DENGGAN

² Muda disapai halahi tu ho, sanga na tu dia halahi kehe, songon on ma dokkon alusna, ‘Didok Tuhan, na ditontuhon parmatena hara ni nyae padiar ma mate hara ni nyae. Na kehe tu hamatean, tu hamatean ma! Na kehe tu podang, tu podang ma! Na kehe tu tangkuraparon, tangkuraparon ma! Na kehe tu tabanan, tu tabanan ma!’

JEREMIA 15:2 ပူးပေါင်းရင်းမြစ်များ

JESAYA 10:4

Mate di bagasan porang sajo ma bagianmunu, sanga disarat-sarat songon halak na tartaban. Tapi laing na muruk dope Tuhan jana sai giot manguhumi.

JESAYA 24:18

Sanga ise na marlojong hara ni biarna, madabu ma tu tirangkap, jana na so hona tu tirangkap hona jorat ma. Udan potir diparo sian langit jana humuntal ma ojahan ni tano on.

JEREMIA 14:12

Haru pe puaso halahi, nangkon na ra Au manerge pio-pio ni halahi mangido tolong; jana haru pe dihaulkon halahi tu Au haul situtungon dohot haul gandum, nangkon na sonang rohangKu mida halahi. Tapi marhite porang, haleon dohot hamamasa ni nyae giot pangabisonKu halahi.”

JEREMIA 14:16

Angka jolma na manjagit barita ni halahi i pe bunuonKu do songon na tu halahi i. Ambungkonon ma angka bangke ni halahi tu angka dalan na di Jerusalem jana nada adong na mananomsa. Songon i ma baenanKu tu halahi dohot dongan sabagasna maradu angka dakdanakna. Angkon baenonKu ma halahi manaonkon parbatu ni hajahatan ni halahi.”

JEREMIA 16:4

Marmatean do halahi hona nyae na mambaen mate, jana marmatean ma halahi di parporangan sanga mate tangkuraparon. Sahalak pe nada adong na manangisi halahi sanga na manguburkonsa. Marampar do bangke ni halahi songon rompak-rompak di tano i, jana dipapangani unggas ma i dohot angka binatang.

JEREMIA 19:7

SundatanKu ma di inganan on tahi ni halak Juda dohot Jerusalem. PadiaronKu ma halahi rumpak baenon ni podang ni musu, baenon ni tangan na giot mambuat hosa ni halahi. PadiaronKu ma bangke ni halahi dipapangani angka unggas na di langit dohot angka binatang na di tano on.

JEREMIA 43:11

Giot ro ma si Nebukadnesar jana taluhononnia Mesir. Jana marmatean ma baenon ni nyae masa angka halak na dung ditontuhon mate. Halak na ditontuhon obanon gabe taban, angkatonna ma i gabe taban jana halak na ditontuhon mate di parporangan, mate ma i panganon ni porang.

JEHESKIEL 12:11

Patorang ma tu halahi, sanga aha na dibaenmi gambaran ni na giot tarjadi do i tu halahi, i ma: Gabe pangungsi noma halahi jana tabanan.

JEHESKIEL 14:21

Didok Tuhan Debata i: “DabuhononKu ma uhuman na jumorbut tu kota Jerusalem laho mamusa jolma bope pahan-pahanan. Uhuman i, i ma: Porang, tangkuraparon, binatang panyoro dohot nyae.

JEHESKIEL 33:27

Mangasahon Au Na Mangolu, ninna Tuhan Debata, angkon mate tarbunu noma angka jolma na maringanan di lobu ni kota na sego i. Angka na maringanan di padang-padang, panganon ni angka binatang panyoro noma i. Angka na martabuni di dolok-dolok dohot angka liang, mate ma i baenon ni nyae masa.

JEHESKIEL 5:12

Sapartolu sian jolma na mangingani ho, mate ma i hara ni nyae masa dohot baenon ni haleon potir na masa di kota i. Sapartolu hona sambol baenon ni podang humaliangmu, jana sapartolu nari sarsarkononKu sun tu dia jana paihut-ihuton ni podang sian pudi baenonKu.

JEHESKIEL 5:2

Sapartolu angkon tutungonmu ma i di tonga-tonga ni kota i dung sidung hona hobuk. Sapartolu nari angkon jaljalanmu do i dohot podangmi lalu mardalan ho manghuliangi kota i. Jana na sapartolu nari i angkon sampakkononmu do i tu awang-awang i, jana buruonKu ma i dohot podangKu.

DANIEL 9:12

Tigor do pambaenanMu laing songon na nijanjihonMu tu hami dohot tu angka na markuaso di hami. Umposi do uhumMu tu Jerusalem martimbangkon angka kota na adong di tano on.

AMOS 5:19

Tudos tu halak na marlojong sian singa do pangalahona, hape marsuo dohot gompul. Sanga songon halak na mulak tu bagasna, jana ditungkolkon tanganna tu tembok lalu diturbing ulok!

ZAKARIA 11:9

Dung i hudok ma tu punguan ni biri-biri i, “Nada ra be au marmahani hamu. Na giot mate, padiar ma marmatean, jana na giot marmara, padiar ma marmara tusi. Jadi na deba nari i padiar ma marsimatean.”

HALUMBAAN 13:10

“Sanga ise na angkon hurungon, angkon laing hurungkonon do. Jana sanga ise na mamunu dohot podang, pasti bunuon dohot podang. Hara ni i ma da umbaen na angkon sobar jana setia tongtong anggo halak na badia.”