JEREMIA 14:15 - BIBEL JAMITA NA DENGGAN

¹⁵ Didok halahi ma mangasahon goarKu bahaso na so tondongon ni parporangan luat on sanga haleon, hape nada Husuru halahi mandok songon i. Au Tuhan, giot paboaonKu tu ho Jeremia, sanga aha na giot baenonKu tu angka panurirang na so Husuru i. BunuonKu ma halahi marhite porang dohot tangkuraparon.

JEREMIA 14:15 ပူးပေါင်းရင်းမြစ်များ

1 RAJA-RAJA 22:25

Dialusi si Mika ma, “Idaonmu do i annon di na masuk ho martabuni tu kamar pudi.”

JEREMIA 20:6

Jana ho ale Pashur rap dohot isi ni bagasmu laing tangkuponna ma ho jana obanonna tu Babel. Disi ma ho mate jana ditanom; laing songon i ma sude donganmu na manangihon angka gabus na nipardokkonanmi.’ ”

JEREMIA 23:30

AloonKu do angka panurirang na palaluhon tona na sian donganna, jana didokkon na sian Au tona i.

JEREMIA 27:15

Didok halahi, manghatai halahi mangasahon goar ni Tuhan, hape na margabus do halahi, Tuhan sandiri mandok, nada Ia marsuru halahi. Hara ni i giot sarsarkononNia noma raja i jana matehononNa rap dohot angka panurirang na margabus tu raja i.”

JEREMIA 6:15

Angkon maila do nian halahi hara ni sude parbuatan ni halahi na jat i. Hape sihapal bohi do halahi jana na so umboto ila. Patunda ni i angkon gabe madabu do halahi songon halak na asing na dung madabu i; abis noma barita ni halahi muda jabat Au manguhum halahi. Au Tuhan, madung mandok songon i.”

JEREMIA 8:12

O hamu bangsongKu, patut nian maila ma hamu hara ni sude halayason na dung nibaenmunu on! Hape hapal do bohimunu jana nada mamboto hahaila. Jadi hara ni i angkon madabu hamu songon halak na asing na dung madabu i; abis ma riwayatmunu muda dung Huuhumi hamu. Au Tuhan, madung mandok songon i.”

JEREMIA 8:13

“Por sajo do nian rohangKu palagutkon bangsongKu songon halak na palagutkon suha ni tanona; hape songon bona ni anggur dohot bona ni hayu ara na so marbatu do bangsongKu; dohot bulungna pe tehe ma pola marmalosan. Hara ni i ma umbaen na Hupaloas halak na leban ro jana mangarajai luat ni halahi.”

ANDUNG 1:19

Hupio do angka donganku hape nada ra halahi mangurupi au. Angka malim dohot pamimpin ni bangso manjalahi panganon laho paudut ngolu hape mate do halahi sudena di angka dalan ni kota.

ANDUNG 2:20

Ligi ma ale Tuhan, pareso ma angka na niparkancitanMi! Dipangan ina do anak haholongan ni rohana, malim dohot panurirang hona bunu di Bagas Ni Debata.

JEHESKIEL 13:14

Madung marniet Au laho mangarumpakkon tembok na nikapurmunu i, giot sarsarkononKu i lopus tinggal ojahanna i sajo. Dondonan ni tembok i ma hamu jana i noma mambaen mate hamu sudena. Jadi gabe botoonmunu ma bahaso Au do Tuhan.

JEHESKIEL 13:15

Hilalaon ni tembok i ma dohot hamu na mangkapuri tembok i sanga songon dia gilap ni murukKu, sego ma tembok i jana mago ma na mangkapuri. Dung i paboaonKu ma tu hamu na dung sarsar tembok i laing songon hamu na mangkapuri i,

JEHESKIEL 13:9

UhumanKu ma hamu, ale angka panurirang na pajojorkon alatan gabus dohot na marnipihon angka parnidaan! Na so tola be hamu dohot mambaen haputusan di bagasan angka sidang ni bangsongKu, sesaon noma angka goarmunu sian rayat ni Israel, jana nada mulak be hamu tu bona bulumunu. Jadi gabe botoonmunu ma bahaso Au do Tuhan Debata.’

JEHESKIEL 14:10

Sarupa do uhuman na giot jagiton ni panurirang i bope angka halak na manjagit sipaingotna.

JEHESKIEL 14:9

Muda adong sada panurirang hona tipu gabe dilehen ia alus na sala, Au Tuhan da na manipu ia. Au Tuhan giot paasingkon ia sian angka halak Israel jana agohononKu ia sian tonga-tonga ni bangsongKu Israel.

JEHESKIEL 33:6

Tapi sugari diida panjago i ro musu hape nada dipalu ia sarune tanda ni bahaya, lalu dibunui musu i angka jolma pardosa i, sian ia do tuntutonKu hamamate ni halahi.

AMOS 7:17

didok Tuhan do, gabe panggampang noma dadaborumi di angka dalan ni kota, jana angka dakdanakmu hona bunu di bagasan porang. Bagi-bagion noma tanomi tu halak na asing, jana ho sandiri mate di tano ni halak sileban noma na so mananda Tuhan. Angkon boanon ma halak Israel tu habuangan dao sian tanona sandiri.”

MIKA 3:5

Dipaoto-oto angka panurirang do bangsongKu, i ma angka panurirang na burju tu angka jolma na mangalehen hepeng, tapi na margoyak ni roha tu halak na so mangalehen. Tu angka panurirang na songon i didok Tuhan ma,

PANGARATAION 18:20

Tapi muda adong sada panurirang na puluk palaluhon tona mamake goarKu, hape nada na Husuru ia mambaen songon i, angkon mate do ia hara ni pangalahona i, laing songon i muse do angka panurirang na manghatahon hata ni debata na asing.

HALUMBAAN 19:20

Gabe tartangkup ma binatang i rap dohot panurirang pargabus na pabaen-baen angka tanda hahomangan di jolo ni binatang i. (Angka tanda hahomangan i do dibaen binatang i paoto-otohon angka jolma na mamake tanda ni binatang i dohot angka jolma na manyomba patung ni binatang i.) Jadi didanggurkon ma binatang i dohot panurirang pargabus i mangolu-ngolu tu bagasan laut api na gara-gara dohot barerang.